Bʋ-kaoodba 3 - SEBR SÕNGO

Buud nins Naaba-Wẽnd sẽn ka wã

¹ Ad buud niyns Soaala-Wẽnd sẽn keese n na n fɛɛs neb niyns sẽn ka zĩnd-b Kanaã zabra wakato.

² Naaba-Wẽnd da ratame bala tɩ sẽn ka bãng-b pĩnd zabã tõog n zãms zabre.

³ Buuda sẽn keesã yɩɩ Filisti dĩm dãmb a nu wã n paas Kanaã rãmba, Sidõ rãmba la Ivitse sẽn da zao Libã tãmsã, sẽn sɩng Baal-Ermõ tãngã n tãag Lebo-Amat.

⁴ Bãmb la Soaala-Wẽnd bas yã n na n fɛɛs a Israyɛl n ges a sã n na n deega noy-niyns a Moyiiz sẽn wilg b yaab rãmba.

⁵ Yaa woto la a Israyɛl pa Kanaã rãmb sʋka, n paas, Ititse, Amoritse, Perizitse, Ivitse, la Zebuzits sʋka.

⁶ A Israyɛl kẽe kãadem ne bãmb kom-pugli, n dɩk a kom-pugli n kõ-ba, n pʋg b wẽn-naandsã.

Bʋ-kaoodba kibare: A Otniyɛl

⁷ A Israyɛl manesem ka ta Naaba-Wẽnd yam ye. B basa Naaba-Wẽnde, n pʋg Baal dãmba la Asera rãmba.

⁸ Yaa rẽ la Soaala-Wẽnd sũur puug ne a Israyɛl tɩ b bas-a a Edom dĩm a Kusãn-Risatayim nugẽ t'a soog-a yʋʋm a nii.

⁹ A Israyɛl kamb kelma Soaala-Wẽnde la Wẽnd kõ-b-la ned sẽn na n fãag-ba. Yɩ-la a Otniyɛl, a Kenaz biiga la a Kalɛb yẽere.

¹⁰ A paama Naaba-Wẽnd vẽnegre n lebg a Israyɛl bʋ-kaooda la a sɩngame n na n zab n fãag a saam-biisi. Naab a Wẽnd dɩka Edom dĩm a Kusãn-Risatayim n sagl a nugẽ. A tõog-a-la zãnga.

¹¹ Yʋʋm pis-naas pʋgẽ, tẽnga ka le rãmbe n wa tãag a Otniyɛl kaalem.

A Ewud

¹² A Kenaz biiga Otniyɛl kaalem poore, a Israyɛl le yik n tʋma sẽn pa noom Soaala-Wẽnde, la Wẽnd tõg-tõga Moab dĩm a Eglõ t'a yik zabr ne a Israyɛl, a sẽn da ka le maan sẽn tat Naaba-Wẽnd yama yĩnga.

¹³ A Eglõ tɩ kosa a Amon kamba la a Amalɛk kamb sõngre. B sẽn bob zabre, b tõoga a Israyɛl, n deeg Zeriko, koms tenga.

¹⁴ A Israyɛl paa a Eglõ, Moab dĩma soolmẽ, yʋʋm piig la a nii.

¹⁵ A Israyɛl kelma Naaba-Wẽnde la Wẽnd kõ-a-la fãagda, a Ewud, Bẽnzame roog dao, a Gera, biiga. A Ewud da yaa gob-tɩɩsenga. Israyɛl kamba wa n yeel-a lame t'a tɩ kɩs fadg a Eglõ, Moab dĩma.

¹⁶ A Ewud kuda sʋʋg sẽn dɩt a noya a yiibu. Yaa sʋʋg sẽn ta kãntɩɩga. A loe sʋʋgã a rɩtgo gere, la a fuuga ra luda sʋʋgã.

¹⁷ A sɩd kẽnga ne ligdã n tɩ kɩs Moab dĩma, a Eglõ. A Eglõ da yaa ned sẽn nob wʋsgo.

¹⁸ B sẽn kɩs ligdã n sɛ b lɛɛg n yiime, yẽ ne sẽn yãag-b ne ligdã.

¹⁹ B taa Gilgal tẽn-kuga zĩigẽ t'a Ewud lɛɛg n wa yeele: «Dĩma, ad-y m tara koɛɛg ne yãmba, la yaa maam ne yãmb koɛɛg bala.» Dĩma kɩtame tɩ sẽn da be-b ne yẽ wã fãa yi.

²⁰ A Ewud kẽeme, dẽ tɩ dĩma zao-la a yĩngr doogã n kokd pemsem. A Ewud yeelame: «Yaa Wẽnd koɛɛg la m wat n na n taas yã, dĩm sõngo.» Dĩma yika tao-tao bala a goeela zugu.

²¹ A Ewud wõoga ne a gobrã, sʋʋga sẽn da sẽbg a rɩtg gerã la a kõsa dĩma pʋga.

²² Sʋʋga rɛɛng meng naag n kẽeme tɩ kaama lɛɛg n bus. A Ewud basa sʋʋga dĩma pʋʋrẽ n ka lɛɛg n feoog ye. A tũu võor n yi n looge.

²³ A reng n maneg n paga yĩngr dooga noor ne a pʋgẽ pagdgã, n bas n tũ võor n yi n looge.

²⁴ A paam n loogame tɩ sõgen-kamba yaool n lɛɛg n wa la b mikame tɩ yĩngr dooga kʋɩleng pagame. Dẽ la b walem taaba: «Daare a fẽegda a yõore rooga pẽg-maasgẽ.»

²⁵ B yalsame al tɩ b yam wa yooda, b sẽn yãe tɩ yĩngr dooga kʋɩlenga kaoosda pakrã. B sẽn kẽes kʋɩlem-bil n pake, b yãee b zu-soaba sẽn ki n dɩga.

²⁶ B sẽn wa n yɛs rooga noor n gũudẽ wã, a Ewud paam n loogame. A ra zoe n looga tẽn-kuga zĩigẽ n tees Seyira sẽnẽ.

²⁷ A sẽn paam n ta Israyɛl tẽnga a peeba baorgo Efrayim tãnga zugu. A lʋɩɩ taoore tɩ Israyɛl kamba pʋg-a n sig tãngã.

²⁸ A yeel-b lame: «Pʋg-y maam tɩ Soaala-Wẽnd dɩka y bɛɛbã, Moabitsã, n sagl y nusẽ.» B pʋg-a lame, b zoeeme n wãag kʋɩlga sẽn tõe n dʋʋg zĩig ningã la ned ba a ye ka paam n dʋʋg Zʋrdẽ ye.

²⁹ B tõoga Moab rãmba. Moab rãmba neb ra ta tus-piiga. Da yaa neb sẽn tar yagd sẽn pidi la zabr sũuri la ba a ye ka põs ye.

³⁰ Badaar tɛka a Moab lebga a Israyɛl sõgne la tẽnga paama laafi yʋʋm pis-nii.

A Samgar

³¹ A Ewud poore yɩ-la a Anat biig, a Samgar. A tõoga Filisti rãmba bãmb na ta kobs-yoobe ne pĩim sẽn tar n kõsd nag-koodse. Yẽ me fãaga a Israyɛl.