Bʋ-kaoodba 20 - SEBR SÕNGO

Gibea rãmb sɩbgre

¹ Israyɛl kamba fãa yika wa nin-yɛnga, al Dã n ta Beerseba, la al Galaad tẽn-peelmẽ, n wa tigim Mispa, Soaala-Wẽnd sẽn yãk tẽng ning tɩ ya b waoogr zĩiga.

² Buuda kãsem-dãmba, Israyɛl sagsa fãa, zĩnda be: neb tus kobs-naase sẽn tõe n bob zabre.

³ A Bẽnzame kamba bãngame tɩ yaa Israyɛl tõr n wa Mispa. Koɛɛg n wa n yi Israyɛl kamba sʋka: «Wilg-y yel-beeda sẽn sɩng to-to?»

⁴ Tɩ paga sɩda, Levitga, na n yeele: «M da taa Gibea sẽn be a Bẽnzame tẽn-peelmẽ, ne m paga, n na n yõg gãag-soabend tɩ beoog vẽege tɩ m le rɩk m sore.

⁵ Gibea rãmb yika yʋngo n gũbg m sẽn sig yir ningã. B da rat n kʋʋ maam. Sã n ya ne pagã b maan-a-la pãnga tɩ wa tol n tũ ne a yõore.

⁶ M yaool n dɩka m pagã n beese, n tool Israyɛl sagsa fãa tɩ yaa wɩɩbdo n maane, bũmb sẽn wat ne buuda yʋ-sãanga.

⁷ Dɩlla, yãmb fãa Israyɛl kamba, sẽn tigim ka Soaala-Wẽnd taoore, yẽs-y ne taaba la wilg y sẽn na n maanega.»

⁸ Neba fãa yika wa nin-yɛng n yeele: «Tõnd ned ba a ye kõn le kẽ a zakẽ, ned ba a ye kõn le kẽ a roogẽ!

⁹ Ad-d sẽn na n maan bũmb ning ne Gibea rãmba. D na n poeesame n sʋk tãb-biis nins sẽn na n tak zabrã.

¹⁰ Israyɛl sak fãa pʋgẽ, neb piig koabg zugu, neb koabg neb tusr zugu, neb tusr neb tus piig zugu tɩ b tɩ wa ne rɩɩbo tãb-biisa sẽn na n tɩ zab ne Gibea rãmb yĩnga. B na zabame n wa tol n yẽes wɩɩbda sẽn wɩɩb a Bẽnzame tẽn-peelmẽ.»

¹¹ Yɩɩ woto la Israyɛl kamb sũ taab wa nin-yɛnga n na n zab ne tẽngã.

¹² Israyɛl sagsa tʋma neb a Bẽnzame tẽn-peelmẽ. B tɩ sok-b lame: «Yaa bõe tʋʋm wẽns n tʋm y nengẽ?

¹³ Woto wã, yiis-y nin-yaalsa fãa sẽn be Gibea n kõ-d tɩ d kʋ n yẽes rẽgda sẽn bol a Israyɛl gillã.» A Bẽnzame rooga pa tʋlg n kelg Israyɛl kamb a taaba, b saam-biisa ye.

¹⁴ A Bẽnzame kamb yii b tẽnsẽ n wa tigim taab Gibea n na n tak zabr ne a Israyɛl.

¹⁵ B sõda a Bẽnzame kamba sẽn yi b tẽnsẽ n wa Gibea wã, la b paama neb tus pisi la a yoobe sẽn tõe n wõog sʋʋga. Gibea rãmba pa sõd n naag ye. Gibea rãmba da yaa neb kobs-yopoe sẽn mi zabr sõmb sõmbo.

¹⁶ Bãmb sʋka neb koobs-yopoe n da be tɩ b goabg vɩ wa b rɩtgo. Bãmb la zab mitba meng-menga. B sã n ning b loobsa kuga n gẽeg zoob beelle, b lobgd n yõk-a lame.

¹⁷ Israyɛl kamb me sõda taaba. A Bẽnzame toog sẽn kae, b ra yaa tus kobs-naase, n ya zab mitba, al tɩ sʋʋg tʋmd beed b nugẽ.

¹⁸ B rʋʋ Betɛl n na n tɩ sok Wẽnde. Israyɛl kamba yeelame: «Tõnd sʋkã, sak bʋgo n na n yɩ pipi n tak zabr ne a Bẽnzame?» La Soaala-Wẽnd yeelame: «Yaa a Zɩɩda n na n yɩ pipi.»

¹⁹ Vẽkẽmbeoogo, a Israyɛl bobame la yaa Gibea noorẽ la a wẽe a sika.

²⁰ B sẽn yi n na n tak zabr ne a Bẽnzame, Israyɛl kamba fãa tongame n tees Gibea.

²¹ A Bẽnzame yii Gibea la badaare, a kʋʋ zĩig pʋgẽ, Israyɛl kamb tus pisi la a yi.

²² A Israyɛl zãma wã le kenga a sũuri n le tɩ yals pipi raara zĩigẽ.

²³ Israyɛl kamba waa Soaala-Wẽnd taoore n yãb n ta zaabre la b soka Soaala-Wẽnde: «Ket n yaa tɩlɛ tɩ m zab ne m saam-biig a Bẽnzame bi?» Tɩ Naaba-Wẽnd leoke: «Tak-y zabr ne-a.»

²⁴ Daar a yiib soabã, a Israyɛl yiime n le kolg n na n tak zabr ne a Bẽnzame.

²⁵ Badaare, a Bẽnzame sẽn le yi Gibea, zĩig pʋgẽ bala, a kʋʋ Israyɛl kamb tus piig la a nii. B fãa yaool n da yaa tãb-biis sẽn mi zabre ne sʋʋga.

²⁶ A Israyɛl tãb-biisa la a zãma wã waa Betɛl. B zĩnda Soaala-Wẽnd taoore n sɩng yãbre, n loe b noor tɩ wĩndig kẽ, n kʋ yũ-nood maand la laafi kosg maand.

²⁷ Israyɛl kamba soka Soaala-Wẽnde. Segame tɩ wẽnd kãnga, zood kasetã, kuga walsa koglgã, ra bee Betɛl.

²⁸ A Elazar biig a Pinas, a Aarõ yagenga, da yɛsa a sɛɛgẽ baraare. A Israyɛl sokra yɩɩ woto: «M na n basa zabra t'a sɛ ne m saam-biig a Bẽnzame bɩ m tog n kell n paa ne-a?» Tɩ Naaba-Wẽnd yeele: «Kẽng-y, tɩ beoogo m na rɩk-a n sagl y nusẽ.»

A Bẽnzame wãabo

²⁹ A Israyɛl solga tãb-biisi n gilg Gibea.

³⁰ Dasem a tãab daarã, Israyɛl le bobame n na n tak zabr ne a Bẽnzame la b le wa tedga ne Gibea rãmb wa rasem kam.

³¹ A Bẽnzame kamba yi Israyɛl kamba segbo, b sakame n zãag ne b tẽngã la b le sɩnga wa rasem kam n kʋʋd Israyɛl kamba. B kʋʋ tẽn-nabrẽ wã neb pis-tã, Betɛl la Gibea soya zutu.

³² A Bẽnzame kamba yeelame: «Bãmba le lʋɩ d nugẽ wala pipi raarã.» Sã n ya Israyɛl kamba, bãmb da yetame: «D na n zoeeme tɩ b pʋg tõnd n paam n zãag ne b tẽngã, n dɩk soya.»

³³ A Israyɛl neba fãa yika vugri n tong zabr tongre Baal-Tamar. Wakat kãng me la Israyɛl tãb-biis sẽn da solge, pusg wa laoose, Gibea, nin-taoore.

³⁴ Neb tus piig sẽn tũus sõmb-sõmb n wa Gibea noorẽ. Zabra yɩɩ zabre. A Bẽnzame da ka mi tɩ yell n na n pak-a ye.

³⁵ La Soaala-Wẽnd dɩka a Bẽnzame n sagl a Israyɛl nugẽ. Badaare a Israyɛl sẽn kʋ taa tus pisi la a nu la koabga. B fãa gill yaool n da yaa tãb-biis sẽn minim n zab ne sʋʋga.

³⁶ A Bẽnzame mikame t'a konga pãnga. A Israyɛl da basame t'a Bẽnzame kolgdẽ t'a ra teega a sẽn solg b rãmbã Gibea noorẽ.

³⁷ Sẽn solg-ba lɛɛg n kẽe Gibea pʋgẽ n kʋ a neba gilli ne sʋʋse.

³⁸ Yella sẽn waa n da nan ka maana, tãb-biis nins sẽn lik b mense la sẽn da solg-bã da reng n seda ne taab woto: d sã n paam n kẽ tẽngã, bugum la d na n maan t'a bug-zõosa ruk n kul yĩngri,

³⁹ tɩ bãmb sẽn da maan wa b zoetame wã lɛɛg n teeg ne a Bẽnzame. A Bẽnzame sẽn paam n kʋ neb pis-tã a yeelame: «Sɩda bãmba na n le paa tõnd nugẽ wa pipi raarã.»

⁴⁰ Wala b sẽn da sedã, bug zõos ruka yĩngri, tẽnga pʋga, t'a Bẽnzame wẽnemd n mik tɩ ya tẽnga tõre n tilg bugum sẽn kuiis sagãna.

⁴¹ A Israyɛl lɛɛg n teega ne a Bẽnzame. A Bẽnzame yɛɛsame t'a pa sãmb yell ning sẽn lʋɩ a zug ye.

⁴² B zoeeme n kẽ weoogo, a Israyɛl taoore. Pʋgba ra yaa tʋʋlga. Mik sẽn pa yãe n zãage, b wẽneg n lʋɩ sẽn da zoe n kẽ-b tẽnga rãmba nugẽ.

⁴³ Israyɛl kamba gũbga a Bẽnzame, b ka le vʋʋs ne a rigb ye. B tõog-b la Gibea noorẽ, yaang sẽnẽ.

⁴⁴ Yɩɩ neb tus piig la a nii n lʋɩ a Bẽnzame sakẽ. Fãa yɩɩ sẽn da tar b zabr sũuri.

⁴⁵ Sẽn põs-ba wẽnemd n teesa we-raoogo, Rimõ tãnga. Neb tus a nu n pa sor zugu. A Israyɛl pʋga a Bẽnzame n zãag zĩiga, n ta al Gidom, n le kʋ neb tus a yi.

⁴⁶ B zãng fãa sẽn ki baraar yaa tus pisi la a nu, a Bẽnzame sakẽ. B fãa ra mii zabre, b fãa da tara zabr sũuri.

⁴⁷ Neb kobs-yoob bala n paam n ta Rimõ tãnga la b paa be kiis a naase.

⁴⁸ A Israyɛl lebg kẽe a Bẽnzame nebã, n kʋ-ba, ne sʋʋga. Baasda tẽng a ye, n kẽ tẽng a to, baasa nebã, n kẽ rũmsã la sẽn vɩ ne yõor fãa. B sẽn yãe tẽng ning fãa, a Bẽnzame soolmẽ, b ning-a-la bugum.