Bʋ-kaoodba 19 - SEBR SÕNGO

Gibea wɩɩbdo

¹ Wẽnd kãng t'a Israyɛl da nan pa tar dĩm ye. Levit a ye n da kẽed Efrayim tãmsa sʋka. A waa n dɩka pag n paase, a waa n dɩka Bɛtelyɛɛm bi-pugla n maan a paga. Bɛtelyɛɛm bee Zɩɩda tẽn-peelmẽ.

² B moora waa n yõsga taaba tɩ paga leb a ba zakẽ, Zɩɩda Bɛtelyɛɛm tẽnga. A paa be sẽn ta kiis a naase.

³ A sɩda bʋʋga-a lame n wilg-a sẽn segd la a paam t'a le rɩk yir sore. Sɩda ra yii ne a yamba la a bõeens a yiibu. Paga tall-a lame n kẽes a ba zakẽ. Paga baaba yãend-a lame t'a yik ne sũ-noogo n wa seg-a.

⁴ Rɛɛmba kos-a lame t'a pa da-yɩten-daare. B rɩɩme, b yũume, b gãanda ra-yɩten-daare.

⁵ Daara a naas soaba Levitga ne a neba yika pĩnda n na n loog la a rɛɛmba yeelame: «Dɩ-y bilfu, n yẽeg y gĩini ne buri tɩ y na yaool n dɩk sore.»

⁶ Tɩ b zĩnd n dɩ la b yũ, bãmb b yiibu, tɩ rɛɛmbã, paga ba, yeele: «M kot-f lame tɩ f sak n gãand yɛsa tɩ yɩ f sũ-noogo!»

⁷ Raoa sẽn yik t'a na n looge, a rɛɛm le rɩdg-a lame t'a le gãand be.

⁸ Daar a nu soaba, Levitga sãda beoogo n na n looge la paga ba le yeel-a lame: «M kot-f lame tɩ f reng n dɩ la y paa n ta zaabre.» La b yiiba naaga taab n dɩ.

⁹ A sẽn bob n na n loog ne a pag la a yamba, la rɛɛmba sẽn le yeele: «Gese, wĩndig lʋɩɩme, zĩig zoe sobgame, gãand yʋngã yɛsa n noog d sũuri. Beoogo y na yik pĩnd n loog y tẽngẽ.»

¹⁰ Raoa zãgsame n yik n dɩk a sor ne yʋngo n ta Zebuze rãmb tẽnga. (B boond-a lame tɩ Zerizalɛɛm yɛsa.) Da yaa yẽ ne a paga la a yamba la a yaanwaoor bõeens a yiibu.

¹¹ B sẽn waa n kẽed Zebuzitsa tẽng tɩ zĩig sobgame. Dẽ la yamba yeela a zu-soaba: «Wa-y tɩ d kʋʋg d sorã n yõg gãag-soabendo n gũ beoogo.»

¹² Tɩ zu-soaba leok: «D pa na n kẽ bu-zẽn-dãmb tẽngẽ ye, neb sẽn ka kĩ ne a Israyɛl ye, d na n taa Gibea.

¹³ A yeela a yambã: d mogd n paam Gibea bɩ Rama n gãand.»

¹⁴ B le rɩka sore n digd taoore. B sẽn paam n kolg Gibea sẽn be a Bẽnzame tẽn-peelmẽ la wĩndg sẽn lʋɩ,

¹⁵ tɩ b bʋdg n tũ Gibea n yõg gãag-soabendo n na n gũ beoogo. B sẽn kẽ tẽngã b paa raagẽ wã. Ned ba a ye ka bool-ba a zakẽ n kõ-b roog ye.

¹⁶ Zĩiga sẽn sobge, nin-kẽem a ye yi a pʋʋgẽ n watẽ. Da yaa Efrayim tãmsa ned sẽn wa n kẽed Gibea. Gibea rãmba yaa a Bẽnzame yagense.

¹⁷ A rooga a neng n yãe Levitgã sẽn zĩ raagẽ wã ta sok-a: «F yii yɛ, f rabda yɛ?»

¹⁸ T'a yeele: «D yii Bɛtelyɛɛm, Zɩɩda tẽn-peelmẽ la yaa Efrayim tãmsa poor tẽnsa la d data. Yaa be la m da be. M da taa Bɛtelyɛɛm, a Zɩɩda tẽn-peelmẽ n lɛɛgdẽ la kaanẽ m ka paam gãag-soab ye.

¹⁹ M yaool n ket n tara yamdo m bõeensa yĩnga, dɩɩb la rãam me keta maam ne m pagã la m yamba yĩnga. Bũmb ka paoog ye.»

²⁰ Dẽ la Nin-kẽema yeel yã: «Ne y kẽnd-kẽnde! Bas-y tɩ m deeg y sãando la y ra pa raagẽ wã ye.»

²¹ A tall-b lame n kul a yiri n bao yamdo n kõ bõeensã, n bao koom n kõ neba tɩ b so, n bao rɩɩb n kõ-b tɩ b rɩ la rãam n kõ-b tɩ b yũ.

²² B sẽn waa n ket n dɩtẽ la tẽnga nin-yaals sẽn sũ taaba n wa yɛs n tar ne zaka soaba: «Yiis raoã sẽn sig fooma n kõ-do tɩ d sõs ne a.»

²³ Zaka soab yiime n gom ne bãmb woto: «M saam-biisi, pa segd ye, da maan-y bi-beelem ye. Daoã yaa mam gãag-soaba, da maan y sẽn ya wɩɩbd ye.

²⁴ M tara bi-pugla, sẽn nan pa kul sɩd ye, m na rɩk-a n kõ yã. Maan-y y sẽn data ne yẽndã la y sẽn baood ne raoã yaa wɩɩbdo sẽn pa segd ye.»

²⁵ B pa sak n kelg ye, tɩ raoã kong n yiis a pagã n kõ-ba. B yõg-a lame, n yaal-a tɩ beoog vẽeg. Sõor sẽn wa n pukdẽ la b bas-a.

²⁶ Beoog sẽn vẽeg tɩ paga lɛɛg n kẽed zakẽ la a sẽn lʋɩ a sɩda sẽn da be roog ninga noore n kell n pa be tɩ sõor puk zãnga.

²⁷ Sõor sẽn puki, a sɩda yiime n na n le rɩk a sore la a sẽn lak rignoore, a yãee a paga sẽn tẽeg n gãe.

²⁸ A sɩda yeel-a lame: «Yik tɩ d looge!» A pa wʋm kʋrkʋr ye. A rɩk-a lame n palg a bõanga n ta a yiri.

²⁹ A sẽn ta yiri, a rɩka a sʋʋga n ges a pagã n pase, n pase, zĩis piig la a yiibu. Dẽ poore a toola paga neong Israyɛl tẽn-peelma fãa.

³⁰ La ned ning fãa sẽn yãend yellã ra yeta a sũurẽ: «Israyɛl kamb sẽn yi Ezipt tɛka n ta rũnna zĩ n yãend yell a woto buud ye.» Levitga ra kõo noor kãngã a sẽn tʋm b rãmbã: «Gom-y woto ne Israyɛl kamba: Zĩ bug la b yãe yell a woto buudu, a Israyɛl sẽn yi Ezipt tẽng tɛk n tãag rũnna? Dɩlla tags-y, yẽs-y ne taaba la y leoke.»