Bʋ-kaoodba 17 - SEBR SÕNGO

A Mika kibare

¹ Ned n da kẽed Efrayim tãmsã t'a yʋʋr boond tɩ Mika.

² A Mika wa n yeela a ma: «Wanzurf wakɩ koeems tusr la koabga n wa n menem f roogẽ la fo kãaba b rɩkda beedo tɩ tol n lʋɩ m tʋbrẽ, ade, yaa maam n da rɩk-ba.» A ma wã leokame: «Bɩ Soaala-Wẽnd ning-f barka, m biiga.»

³ A Mika lebsa a ma wanzurf wakɩ koeems tusr la koabgã. Ad-a ma wã sẽn yeele: «Mam meng n da rɩk ligd kãnga n kõ Naaba-Wẽnde, n gũudẽ tɩ foom, m biiga, wa rɩk-ba n dõog nin-naand n kõ-ma. Woto wã m le lebsd-b-la foom.»

⁴ Dɩlla paga sẽn wa n lebs a biiga ligdã, a keesa wanzurf wakɩ koeems kobs-yi n kɩs yõaka. Yõaka yẽneg-b lame n mams nin-naande t'a Mika tol n baoo zĩig a roogẽ n ning-a be.

⁵ A Mika zakẽ wã b ra zoe n sela kug peesem bũmbu. A kɩtame tɩ b tol n maam wẽn-naande la nin-naands sẽn paamd waoogre. A yãka a biig a ye n kõ maan-kʋʋr naam.

⁶ Sasa kãng tɩ Israyɛl da nan pa tar dĩm ye, tɩ ned kam fã da maand a sẽn date, a sẽn tẽed tɩ sõmbame.

⁷ Bi-bɩɩg a ye n da be tẽngã. A ra yita Bɛtelyɛɛm, Zɩɩda tẽn-peelmẽ; a rooga sak da yaa a Zɩɩda saka, a ra tʋmda Levit tʋʋmde, a ra yaa tẽnga sãana.

⁸ A ra yii Bɛtelyɛɛm n na n bao tẽng sẽn sakd-a n kẽ. A sẽn kẽne a waa n ta a Mika zaka, Efrayim tãmsa zutu.

⁹ A Mika sok-a lame: «Fo yita yɛ?» T'a leoke: «M ya Levitga, m yii Bɛtelyɛɛm, Zɩɩda tẽn-peelmẽ; m saad n baooda zĩig sẽn sakd-m n na n kẽ.»

¹⁰ A Mika leok-a lame: «Sã n ya boto, bɩ f wa mam zakẽ n lebg m ba la m maan-kʋʋda tɩ m na kõ-f wanzurf wakɩ koeems piig yʋʋmde, m paas rɩɩb la futu.» A Mika goma woto n dɩdg Levitgã,

¹¹ t'a sak n na n zĩnd, n lebg wa zaka biiga.

¹² A Mika kõo Levitgã maan-kʋʋr naam. A paa zakẽ be n lebg maan-kʋʋda.

¹³ Dẽ la a Mika yeel yã: «M sẽn paam tɩ Levit kãnga lebg m maan-kʋʋdã, m miime tɩ Soaala-Wẽnd na ges m yell neere.»