Bʋ-kaoodba 16 - SEBR SÕNGO

¹ A Sãmsõ yii be n dig Gaza. A yãee pʋg-yoodr zak n kẽ.

² Ned n togs Gaza rãmbã: «Ad-a Sãmsõ waa ka.» Dẽ la b pag tẽnga noore n gũusd-a. B ka maan bũmb a to n paas ye. B ra yetame bala: «Sẽn ya yʋngã, d yaas tɩ beoog vẽeg tɩ d na paam-a n kʋ.»

³ Mik a Sãmsõ me basame tɩ zĩig zʋʋge la yʋn sʋka a tɩ gãda tẽnga noor kʋɩlensã n võog-ba ne b sogdsa fãa n palg a bãoko n tɩ lob-b tãng ning sẽn tot ne Ebrõ wã zugu.

A Dalila zãmbda a Sãmsõ

⁴ Dẽ poore, a Sãmsõ le yãee Sorɛk kʋɩl-bɛɛga noorẽ, paga a ye n bao. Paga ra boondame tɩ Dalila.

⁵ Filisti rãmba soaalba sẽn da ya nin-wẽnsa tɩ yãenda a Dalila n yeel-a: «Belg a Sãmsõ n bãng a pãnga sẽn yitẽ la d sẽn tõe n maan bũmb ninga n tõog n yõk-a n sẽbe t'a ka le be vɩg-vɩg ye. Tõnd ned kam fãa na kõ-f wanzurf wakɩ koeems tusr la koabga.»

⁶ A Dalila tɩ yeela a Sãmsõ: «Wilg maam sẽn tũ ne bũmb ninga tɩ f tar pãng woto fãa, wilg maam d sẽn na n loe-f ne wĩir ninga tɩ f ka tõog n maan vɩg vɩg meng ye.»

⁷ A Sãmsõ yeelame: «Sã n ya tãp wĩ a yopoe sẽn ket n ya maas n nan ka paam n kʋɩ la y rɩk n loe-ma, m pãnga na sɛ tɩ m lebg wa neb a taaba.»

⁸ Filisti rãmba soaalba waa ne tãp wĩ a yopoe sẽn ket n ya maasa t'a Dalila reeg n loe a Sãmsõ.

⁹ A Dalila ra baoo tãb-biis n solg a roogẽ wã. A tãsame: «Sãmsõ, ad Filisti rãmba ta-f lame.» La a Sãmsõ kaoo wĩ wã wala pãnd sẽn kaoode, bugum sã n kolg-a. B ka bãng a pãnga sẽn yitẽ ye.

¹⁰ A Dalila yeela a Sãmsõ: «Fo belga maam n togs sẽn pa sɩda. M kotame tɩ f pelg f pʋga n wilg maam b sẽn tog n loe-f ne bũmb ninga.»

¹¹ Dẽ la a leok yã: «B sã n loe-m ne wĩ paal sẽn nan ka rɩk n sẽb bũmbu, m pãng menemdame tɩ m lebg wa neb a taaba.»

¹² A Dalila sɩd baoo wĩ paal n loe-a n yaool n tãs: «Sãmsõ, ad Filisti rãmba ta-f lame.» A deng n baoo neb n solg a rooga pẽkẽ; la a Sãmsõ kao wĩ wã sẽn da loe a kamsã wala b sẽn kaoogd gaarga.

¹³ A Dalila yeel-a lame: «Fo ket n laada maam n yagd zirẽ la wilg maam b sẽn tõe n loe-f ne bũmb ninga.» T'a na n leoke: «B sã n yidg m gɛm a yopoe wã n wʋg-b ne sʋlg niiri wa peende, m pãnga menemdame tɩ m legb wa neb a taaba.»

¹⁴ A Sãmsõ gũsame t'a Dalila yidg a gɛma n tui niir n wʋge ne koera. A wa n yaool n tãsame: «Sãmsõ, ad Filisti rãmba n tat-fo.» A Sãmsõ, nekame n bagemd a zug n kao koer-bõangã. B kell n ka bãng a pãnga sẽn yitẽ ye.

¹⁵ A Dalila kong n yeela a Sãmsõ: «Fo yɩta a wãn n wẽendẽ tɩ f nonga maam tɩ f sũur yaool n zãr ne maam. Yaa naoor a tãab marsã la fo belg maam, m ket n pa mi f pãn-kãsenga sẽn be f zĩig ning ye.»

¹⁶ Beoog sẽn vẽeg fãa a ra tara dɩdgre la sogsgo t'a Sãmsõ yama wa lak zãnga.

¹⁷ A Sãmsõ pelga a pʋga n yeel-a: «Ad barg zɩ n sɩɩs m zobd ye tɩ b pʋlem-b-la Naaba-Wẽnde tɩ m nan ket m ma pʋgẽ. M zoobda sã n põnge, m pãnga na n sɛɛme, a na n menemame tɩ m lebg wa neb a taaba.»

¹⁸ A Dalila bãngame marsã t'a sɩd pelga a pʋga la a sẽn bool Filisti rãmba soaalba, a yeel-b lame: «Wa-y marsã t'a pelga a pʋg n wilg-ma.» Filisti rãmba waa a nengẽ la b tẽegame n zɩ ligdã.

¹⁹ A Dalila gãnega a Sãmsõ a noẽ t'a gũsi t'a bool dao t'a wa põng a zuga gɛma a yopoe wã. A Sãmsõ pãnga sɩnga woogre n wa tol n menem zãnga.

²⁰ A Dalila tãsame: «Sãmsõ, yik tɩ Filisti rãmba waame!» A nekame la a tagsame: «Sẽn ka pak pĩndã kõn pak rũnna ye, m na põs wa rasem kam.» A ra nan ka mi tɩ Naaba-Wẽnd bas-a lame ye.

²¹ Filisti rãmba paam n yõk-a lame n pẽs a nini, n tall-a n kẽng Gaza. Bee b tɩ baoo bãeens a yi n sog-a la b kɩt t'a bilgd werd-m-toore, n werd zom. Dẽ tɩ b pag-a la bi-bees roogẽ.

²² Zoobda sẽn põngã waa n sɩnga tobre.

A Sãmsõ kũum

²³ Filisti taoor dãmba me waa n tigma taaba n na n maan maoong sẽn ya maoong menga b wẽnd a Dagõ yĩnga la b noog b sũuri. B ra yetame: «Tõnd wẽnda dɩka d bɛ, a Sãmsõ, n sagl d nugẽ.»

²⁴ Zãma wã sẽn ta wẽnda taoore a kils-a lame la a yeelame: «Tõnd wẽnda dɩka d bɛ, a Sãmsõ, n sagl d nugẽ, yẽ n da ya fãad la kʋʋda.»

²⁵ B sũ-nooga ra pida zãnga tɩ b yeel tɩ b wa ne a Sãmsõ t'a maan baobgo tɩ b la. B yiisa a Sãmsõ bi-bees roogẽ n tall-a n wa la a reemame tɩ b gese. B tɩ yalsa a Sãmsõ lals a yiib sẽn zɩt dooga sugr tẽnsʋka.

²⁶ Yaa a Sãmsõ meng n yeel biig ninga sẽn da tat-a wã: «Tall-ma tɩ m paam n sɩɩs lals a yiibã sẽn zɩt dooga sugrã.»

²⁷ Rooga yaool n da pida ne Filisti nin-bɛdã. Rooga zugu, pagb la rap na ta tus a tã n da be be n get a Sãmsõ reema.

²⁸ A Sãmsõ pʋʋsa Naaba-Wẽnde n yeele: «Soaala-Wẽnde, m kos tɩ y tẽeg m yelle. Kõ-y maam dũnna yɛsa yãmb pãngã tɩ m dok m sũur ne Filisti rãmba n dol m nin a yiibã b sẽn pẽsã.»

²⁹ A Sãmsõ bablame n sɩɩs lals a yiibã sẽn da zɩt roogã. A rɩka a goabga n teeg lalg a ye, n dɩk a rɩtgo n teeg a to wã la a wɩka a menga.

³⁰ A tãsame: «Bɩ m ki la Filisti rãmba me ra põs ye.» A sẽn tus lalsã ne a pãnga fãa, rooga bur n lʋɩɩme. A bʋʋga nin-bɛdã la zãma wã fãa sẽn da tigma. A Sãmsõ sẽn kʋ neba a kũuma daare, yɩɩga a sẽn kʋ a vɩɩma tõre.

³¹ A yaopa la a buuda waa n dɩka a yĩngã n tɩ mum Sorea ne Estaol tẽnsʋka, a ba a Manoa yaoogẽ. A Sãmsõ dɩ kãsengo yʋʋm pisi, Israyɛl.