Bʋ-kaoodba 14 - SEBR SÕNGO

A Sãmsõ yikãadem

¹ A Sãmsõ kẽe Timna, dar a ye, la a yãee bi-pugl Filisti kom-pugli wã sʋka.

² A sẽn leb yiri a tɩ togsa a ba la a ma la a yeelame: «Bi-pugl la m yãe Timna, Filisti kom-pugli wã sʋka, bao yã n kõ-m tɩ m maan m paga.»

³ La a ba ne a ma naag a taab n yeel-a: «Pagb n ka be f saam-biisa kom-pugli wã sʋka la f buudẽ wã bɩ? Yaa bõe tɩ f na n bao nin-dẽgd kamba? La a kell n yeela a ba: Yaa yẽ la m dat tɩ y bao kõ-ma tɩ yẽ n ta mam yam.»

⁴ A ba ne a ma ka bãng tɩ ra yaa Soaala-Wẽnd daab ye, tɩ Soaala-Wẽnd da baooda Filisti rãmba noore, tɩ wakat kãnga yaa Filisti rãmba n da rɩt naam a Israyɛl zugu.

⁵ A Sãmsõ rɩka Timna sore la a sẽn wa n kolg Timna rãmb pʋto a yãee bõnyẽ-pol sẽn segd-a la a ningd rãamde.

⁶ Naaba-Wẽnd pãng kẽe-a lame, a ra ka zãad bũmb ye la a sẽn sog bõnyẽegã a yaang-a lame, wala bulla. A yaool n ka saag n togs a ba bɩ a ma ye.

⁷ A kell n tũ a sore n tɩ sõs ne pagã Timna la a yam kẽe-a lame.

⁸ Sẽn maan dasem a wãna a Sãmsõ lɛɛg n waame tɩ b yi kãadem. A sẽn tek n bʋdge n na n ges bõnyẽega rɩgre, a mikame tɩ sĩ n kẽe-a n maan b sɩɩdo.

⁹ A yãka sɩ-vaka n ta taoore n lemb-a, n kees n tɩ kõ a ma la a ba tɩ b rɩ la a pa saag n wilg a sẽn paam sɩɩda zĩig ninga ye, bõnyẽega rɩgrẽ.

A Sãmsõ yelbũndi

¹⁰ A Sãmsõ sẽn ta a paga ba-yiri b maana kibs kãsenga ne rɩ-noodo. Bãmb me rog-n-mik la rẽ.

¹¹ B sẽn yãend-a, tẽnga rãmb baoo kom-bɩɩs pis-tã tɩ b na n pa ne-a.

¹² A Sãmsõ yeel-b lame: «M na n wẽe-y-la yelbũndi. Y sã n tõog n wegs-a n wilg maam a võore, rasem a yopoe wã pʋgẽ, m na kõ-y fut pis-tã la m na le paas pis-tã tɩ y yeelgdẽ n tedgdẽ.

¹³ La y sã n pa tõog n wilg a võore, yaa yãmb n na n kõ fut pis-tã n le paas pis-tã sẽn na n yeelgdẽ n tekdẽ.» B wẽneg n yeel-a lame: «Tão f yelbũndã, d kelgdame.»

¹⁴ A yeelame: «Dɩɩb yii rɩ-rɩt noorẽ, tɩ bõn bʋgsgo yi pãnga-nar-soab nengẽ.» Rasem maana a tã, b pa tõog n wa ne baobga võor ye.

¹⁵ Daar a nu soaba, b yeela a Sãmsõ pagã: «Belg f sɩdã n bãng kibara võore n wilg-du, ka rẽ d na yõog-f bugum, foo ne f ba wã yiri. Yãmb boola tõnd ka n na n fã d sẽn tar la?»

¹⁶ Yaa woto la a Sãmsõ paga sɩng a pʋgb ne nintãm la a yetẽ: «Fo ka nong maam ye. Fo tãoo yelbũnd m saam-biisã la fo pa wilg maam a võor ye.» Dẽ la a Sãmsõ leok yã: «Awa! M sẽn ka wilg a võore m ba la m ma, m yɩta a wãn n wilg-a foom?»

¹⁷ Bãng-y tɩ paga yõka yãbre la rasem a yopoe raarã, a Sãmsõ kong n wilga yelbũndã võore t'a ra yɛɛ ne a pagã la paga rɩkame n tɩ togs a saam-biisi.

¹⁸ Dɩlla, dasem a yopoe daarã, a sẽn waa n nan ka kẽ gõeem, tẽnga kom-bɩɩba yeela a Sãmsõ. «Bõe n ya noog n yɩɩd sɩɩdo, la bõe n tar pãnga n yɩɩd bõnyẽega?» Dẽ me la a Sãmsõ leok-ba: «Yãmb sã n da ka sogẽ mam nag-sadgã n ko y koobo, y kõn wekẽ m yelbũnda ye.»

¹⁹ A Sãmsõ yika ne Naaba-Wẽnd pãnga, n kẽ Askelõ n kʋ neb pis-tã n yees b futã n kõ neb niyns sẽn wilg b yelbũnda võore la a lɛɛga ne sũ-puuri n kul a ba zakẽ.

²⁰ Timna rãmb yõdg n dɩka a pagã n kõ pʋg-reema rãmb nin-yende.