Bʋ-kaoodba 12 - SEBR SÕNGO

A Zɛfte kũum

¹ Efrayim neb n tigim taaba n dʋʋg Zʋrdẽ, n tees Safõ n tɩ yeel a Zɛfte: «Yaa bõe yĩnga la f yi n tɩ tak zab ne Amonitsã n ka bool tõndo tɩ d wa yãag-fo? Tõnd na n yõog-f la bugum, foo ne f zaka!»

² Dẽ la a Zɛfte leok yã: «Maam ne m neba ra zĩi ne yɩɩre la Amonitsa da tar-d lame n namsdẽ. M bool-y lame tɩ y wa sõng-ma la y ka wa fãag-m ye.

³ M sẽn yãe tɩ ned ba a ye ka wat m sõngre, m ka zoe kũum ye, m boba zabr ne Amonitsã la Soaala-Wẽnd sõng-m lame tɩ m tõog-ba. Y sẽn tigim taab n na n wa zab ne ma võor la bõe?»

⁴ A Zɛfte me boola a saam-biisi tɩ b tak zabr ne Efrayim dãmba la a tõog-b lame. Efrayim dãmb da yetame: yãmba, Galaad rãmbã, yãmb yaa a Efrayim neb sẽn zoe n wa nok a Manase bala.

⁵ Woto Galaad dãmb tɩ yalsa neb zĩis nins Efrayim neba sẽn tõe n dʋʋg Zʋrdẽ, n paam n gɩdg-ba. B sã n yãend ned sẽn wat n na n dʋʋg kʋɩlgã, b sokd-a lame: «Fo yaa Efrayim ned bi?» A sã n yet tɩ ayoo,

⁶ b kot-a lame t'a yeel: Sibolɛt, la yẽ yetame: fibolɛt, b zelemda lakr da ka a ye ye. B wẽnegd n yõka sẽn luk a meng bãongã la b kodgd-a-la kʋɩlga noore. Yaa woto la Efrayim dãmb ki yã, bãmb na ta tus pis-naas la a yiibu.

⁷ A Zɛfte sooga taoor Israyɛl yʋʋm a yoobe n yaool n ki la yaa a tẽngẽ la b mum-a, yaa Galaad tẽng Mispa.

A Ibsã

⁸ A Zɛfte poore a Ibsã n soog taoor Israyɛl. A ra kẽeda Bɛtelyɛɛm.

⁹ A kom-dibli yɩɩ pis-tã, a kom-pugli me pis-tã. A kẽnga tẽng a to n bao kom-pugli n kõ a kom-dibli la a yiisa a kom-pugli wã me ne buud a to rãmba. A rɩɩ kãseng yʋʋm a yopoe.

¹⁰ A kiime tɩ b mum-a Bɛtelyɛɛm.

A Elon

¹¹ A Zabulõ ned n led a zĩiga: a Elon. A rɩɩ kãsengo yʋʋm piiga.

¹² A kiime la b mum-a-la Ayalõ, Zabulõ tẽn-peelmẽ.

¹³ A Elon poore yɩɩ Piratõ daoa, a Illɛl biig a Abdõ, n soog taoor Israyɛl.

¹⁴ A kamb da yɩɩ pis-naase, a yagens pis-tã, n da zombd bõeens pisopoe sẽn ya poala. A sooga kãsengo yʋʋm a nii.

¹⁵ Piratõ daoa, a Illɛl biig a Abdõ, sẽn ki, b mum-a la Efrayim tẽn-peelmẽ, a Amalɛk tãng zugu.