Bʋ-kaoodba 11 - SEBR SÕNGO

¹ Galaad daoa, a Zɛfte, da yaa tãnsoab sẽn pid ne sũuri. A ba sẽn da boond tɩ Galaad rog-a-la ne pʋg-yoodre.

² Galaad kãng tom-paga roga kamb a taaba, kom-dibli la kom-pugli. La b sẽn waa n bɩ b riga a Zɛfte. B yeel-a lame: «Fo kõn naag tõnd n dɩ d ba paoong ye tɩ f yaa pag a to biiga.»

³ A Zɛfte zoe n zãaga ne a ba-biisi n tɩ kẽ Tob tẽnga. Be a ra wʋka nin-yaalse n saad n takd zaba.

⁴ Sẽn wa n kaoos bilfu, tɩ Amonitsa yik zabr ne a Israyɛl,

⁵ Galaad nin-kẽemsã tʋmame tɩ b bool a Zɛfte Tob tẽnga.

⁶ B yeel-a lame: «Wa, n yɩ d tãnsoaba tɩ d zab ne Amonitsã.»

⁷ Dẽ la a Zɛfte leok-ba: «Ka yãmb n dɩ beem ne maam n dig-m n yiis m ba zakẽ laa? Bõe tɩ toog tar-y marsã, tɩ y baood m zĩiga?»

⁸ Nin-kẽemba yeela a Zɛfte: «D sã n lɛɛg n baood foo rũnna, d datame tɩ fo wa kẽ-do, n zab ne Amonitsã, n lebg d naaba, n lebg Galaad tõr naaba.»

⁹ T'a Zɛfte yeele: «Y sã n bas-m tɩ m lɛɛg n wa tak zabre ne Amonitsã n tõog-ba, ne Naaba-Wẽnd sõngre, m na sak n lebg y naaba.»

¹⁰ Tɩ nin-kẽemba paas: «Bɩ Wẽnd yɩ d kaset soaba, d sã n ka maan wala d sẽn yeelã.»

¹¹ A Zɛfte kẽnga zabre ne Galaad nin-kẽemsã la neba sakame t'a lʋɩ b taoore. A Zɛfte le togsa b goama fãa, Mispa, Naaba-Wẽnd taoore.

A Zɛfte ne Amonitse

¹² A Zɛfte tʋmame tɩ b tɩ yeel Amonitsa dĩma: «Bõe n be maam ne foom tẽnsʋka n sek zabre tɩ f wat n na n tak zabr ne m tẽnga?»

¹³ Amonitsa dĩma leoka a Zɛfte sẽn tʋm b rãmbã: «Ade, a Israyɛl sẽn yi Ezipt tẽnga, a waa n deega m soolem. Yɩɩ Arno kʋɩlga n ta Yabok la Zʋrdẽ. Lebs maam m soolem tɩ ket n maasa.»

¹⁴ A Zɛfte le tʋma neb Amonitsa mengẽ,

¹⁵ tɩ b tɩ yeel dĩma: «Woto la a Zɛfte koɛɛga: A Israyɛl ka reeg fɩ a Moab la Amon tẽn-peelmẽ ye.

¹⁶ A Israyɛl sẽn yi Ezipt a pãrga we-raoogo n ta Rudum Mogrã n yaool n dig Kadɛs.

¹⁷ B A Israyɛl zĩnda be n tʋm tɩ b yeel Edom dĩma: ‹Kabr tɩ m bʋdg f soolma n looge.› La Edom dĩma pa kelg-a ye. A toola Moab dĩma nengẽ la yẽ me ka sak ye. Dẽ la a Israyɛl kong n pa Kadɛs.

¹⁸ Dẽ poore b pãrga we-raoogã n gil Edom ne Moab tẽn-peelem n wa Moab yaanga. B wẽ-la b sika Arno kʋɩlga rʋʋre, la b pa kẽ Moabitsa tẽngẽ tɩ Arno kʋɩlga la a toaaga.

¹⁹ A Israyɛl zĩnda be n tʋm neb Amoritsa dĩm a Siyõ nengẽ, Esbõ tẽnga. A tʋmame tɩ b yeel dĩma: ‹Kabr tɩ m bʋdg f soolma n ta m sẽn dabdẽ.›

²⁰ La a Siyõ zãgsame, a tigma a zab-zabdba Yaas tẽnga la a sɩnga zabre ne a Israyɛl.

²¹ A Israyɛl Wẽndã dɩka a Siyõ ne a nebã n sagl a Israyɛl nugẽ, t'a Israyɛl tõog-ba. A Israyɛl sẽn deege yɩɩ Amoritsa soolem zãnga,

²² sẽn sɩng Arno bãg-faaga n ta Yabok kʋɩl-bɛɛga, sẽn sɩng yaang we-raoogã n tat Zʋrdẽ.

²³ Soaala-Wẽnde, Israyɛl Wẽndã, n sõng tõnd tɩ d deeg Amoritsa soolem. Bõe tɩ fo rat marsã n dig-d n yiisi?

²⁴ Fo sẽn kẽed tẽng ningã ka fo wẽnd a Kemos n kõ-f-la? Bãng tɩ tõnd me tara sore n kẽ tẽng ning d Soaala sẽn kõ-d tɩ d sooge.

²⁵ Fo yɩɩda Moab dĩm a Balak, a Sipor biiga laa? Fo pa ne t'a Balak pa yaas n maan nokoeemd ne a Israyɛl? Fo pa ne t'a Balak pa saag n tak zabr ne a bɩ?

²⁶ Ya yʋʋm kobs-tã marsã la Israyɛl kamba kẽed Esbõ la Aroɛr ne b tẽn-toose, n paas tẽns nins sẽn be Arno kʋɩlga noorã, bõe tɩ ta rũnna tɩ y ka rig-ba n yiisi?

²⁷ Mam ka maan kegr ne foom ye la fo maana wẽng ne maam n tak zabr ne ma. Bɩ Wẽnd sẽn ya Bʋ-kaoodã, kao Israyɛl ne Amoritsa bʋʋdo.»

²⁸ Amoritsa dĩm baas n ka kelg a Zɛfte sẽn taas-a koees niynsa ye.

A Zɛfte pʋlengo

²⁹ Soaala-Wẽnd vẽnega a Zɛfte yam. A tũ Galaad la Manase n sãag n ta Mispa-Galaad soolem n yi be n dʋʋg Amonitsa toaaga.

³⁰ A Zɛfte pʋlma Naaba-Wẽnd a pʋlengo n yeele: «Y sã n sõng tɩ m tõog Amoritsa,

³¹ ned ninga fãa sẽn na n yi pipi m zakẽ wã n seg-ma, yẽ soab lebga Wẽnd pʋɩɩre la a na lebga yũ-noog maoong bũmbu.»

³² A Zɛfte tɩ kẽe Amonitsa tẽn-peelmẽ n zab ne ba la Naaba-Wẽnd dɩk-b lame n sagl a nugẽ.

³³ A rig-b-la Aroɛr n kolg Minit (tẽns pisi la a reeg yã); n dig-b n ta Abɛl-Keramim. A tõog-b-la sõma; Amonitsa sulga b zug a Israyɛl taoore.

³⁴ A Zɛfte sẽn wa n lɛɛg n wat Mispa, a tẽngẽ, yaa yẽ meng bi-pugl n yi n seg-a ne gãngãoog bila la a saoodẽ. Da yaa a bi-yende, a ka paam biig a to, pag bɩ raoa sã ka yẽnda a ye tãa.

³⁵ A Zɛfte sẽn yãend-a, a kẽesa a fut n yetẽ: «M biiga, f kẽes-m-la yell sẽn ka be tɩɩm, fo waa n tʋʋg-m-la zu-beedo! M goma wʋsg Naaba-Wẽnd taoore, m pʋlma Wẽnd la m ka le tõe n lebs m zelemd ye.»

³⁶ La bi-pugla yeel-a lame: «M ba sõngo, yãmb pʋlma Wẽnde, yãmb goma wʋsg Naaba-Wẽnd taoore, bɩ y maan wa y sẽn yeele. Soaala sõng-y lame tɩ y rok y sũur ne y bɛɛba, ne Amoritsã.»

³⁷ A le paasame: «Ad-m sẽn kot y bũmb ninga: Bas-y-m ne m meng kiis a yiibu. M na rʋ n yeeb tãmsã zut ne m tũud-n-taase n yãb m sẽn na n kong rogem sũ-noogã.»

³⁸ A Zɛfte yeel-a lame: «Kẽnge, m biiga!» La a bas-a-la kiis a yiibu. A yii ne a tũud-n-taase la a rʋʋ tãng zugu la a yãba a menga.

³⁹ Kiis a yiiba poore a lɛɛg n waa a ba zakẽ la ba pidsa a pʋlemde. A ka paam n yi kãadem ye. Ad-y yaa rẽ n wa ne rog-n-mik kãngã:

⁴⁰ Yʋʋmd yʋʋmd fãa, Israyɛl kom-pugli kẽnd n yãbda Galaad dao a Zɛfte bi-pugla, dasem a naas tõre.