Bʋ-kaoodba 10 - SEBR SÕNGO

A Tola

¹ Sẽn fãaga a Israyɛl a Abimelɛk poor yɩ-la a Tola, a ba la a Ypa, a yaab la a Dodo. A ra yaa a Isakar sakẽ neda la a ra kẽeda Samir sẽn zao Efrayim tãng zugu.

² A Tola kaoo Israyɛl bʋʋd yʋʋm pisi la a tã n yaool n ki la b mum-a-la Samir.

A Yayir

³ A Tola poore a Yayir n kao Israyɛl bʋʋd yʋʋm pisi la a yiibu.

⁴ A Kamb yɩɩ pis-tã, n zombd bõeens pis-tã, n kẽed tẽns pis-tã sẽn ket n boond dũnna t'a Yayir tẽnse, a Galaad tẽn-peelmẽ.

⁵ A Yayir kiime tɩ b mum a Kamo.

A Zɛfte

⁶ Israyɛl kamb le sɩng n maana sẽn ka noom Soaala-Wẽnde. B waooga Baal dãmba la Astarte dãmba n paas Aram, Sidõ, Moab wẽnd dãmba, Filisti la Amonitsa wẽnd dãmba. B Basame n ka le waoogd Naaba-Wẽnd ye.

⁷ Yaa rẽ la Soaala-Wẽnd sũur puug ne a Israyɛl tɩ b rɩk-a n sagl Filisti rãmba la Amonitsa nusẽ.

⁸ A Israyɛl yãee naong la pɛta yʋʋm piig la a nii pʋgẽ. Sẽn nams-ba n yɩɩg, yɩɩ Israyɛl kamb niyns sẽn da be-b Zʋrdẽ rʋʋnde, Galaad tẽn-peelmẽ.

⁹ Amonitsa me yikame n dʋʋg Zʋrdẽ n tak zabr ne a Zɩɩda, a Bẽnzame la a Efrayim. A Israyɛl nimbãaneg waa n sɩd lebga wʋsgo.

¹⁰ Wakat kãng marsã la b yaool n kelem Wẽnde, n yetẽ: «Tõnd beega yãmba tɩ tõnd basa yãmb, d Wẽnnaam, n pʋgd Baal dãmba.»

¹¹ Dẽ la Soaala-Wẽnd leok-ba: «Ezipt rãmba, Amoritse, Amonitse, Filisti rãmba,

¹² Sidõ, Amalɛk la Madiã rãmb sẽn waa n tar yãmb toogo tɩ yãmb kelem n bool-ma, m zãgsame tɩ m kõn fãag yãmb b nusẽ bɩ?

¹³ Yaa yãmb n bas maam n pʋg wẽnd dãmb a taaba. Ma me toog ka le be ye, m kõn fãag-y ye.

¹⁴ Tɩ waas-y ne wẽnd dãmb nins sẽn ta y yam. Bool-y tɩ b fãag yã y yel-pakr pʋgẽ.»

¹⁵ A Israyɛl leokame: «Tõnd kongame, maan-y ne tõnd wala y sẽn date, yãmb yee n fãagd dũnna bala!»

¹⁶ B tɩ yiisa wẽn-sãamsã b zagsẽ n le pʋg Naaba-Wẽnde. Naaba-Wẽnd ka le tõog n bas a Israyɛl t'a nams ye.

¹⁷ Amonitsa tigima taaba la b wẽ-la sik Galaad. Israyɛl me tigsa a nebã n wẽ a sik Mispa.

¹⁸ Galaad neba la a taoor dãmb yeela taaba: «Nin-bʋg n na n wa zab ne a Amon doogã n kõ-do? Nin-kãng na lebg d naab Galaad tẽn-peelmẽ.»