A Zʋʋde 1 - SEBR SÕNGO

Sebra soaba

¹ Maam a Zɩɩd, Krista a Zezi sõgne, a Zak saam-biiga, n pʋʋsd Wẽnd Ba sẽn nong b rãmbã, n bool-b la b bĩng-b toore Krista yĩnga.

² Bɩ y paam zembala, Wẽnd nimbãan-zoeere, b laafi la b nonglem!

Bũmb ning sẽn wa ne sebra gʋlsgo

³ M kom-nongdse, m da tʋlla wʋsgo n gʋls yãmb bũmb a ye poorẽ, d fãa sẽn paam fãagra poorẽ. Waa n lebga pakre ne-ma tɩ m gʋlse n segl-y tɩ y zab tẽeba yĩnga, tẽeb ning nin-sõma wã sẽn deege la sẽn ka bõn-tɛɛmdgã.

⁴ Neb n soos n kẽ sʋka la bãmb dãmb poorẽ la b ra tog n yeel al daar zãra: Ad neb sẽn ka mi Wẽnd waoogre n teemd tõnd Wẽnda yel-sõmde t'a lebgd yoobo la b basd kɛɛnga d Zu-soab la d Soaala, a Zezi Krista.

Zirẽ-be-mitba

⁵ M dat n tẽeg-y lame, yãmb sẽn mi yɛla fãa zãngã, tɩ Soaala sẽn fãag b neba n yiis-b Ezipt tẽnga, b lɛɛg n kʋʋ kɩɩsdbã.

⁶ Sã n ya ne malɛgs niyns sẽn bas-b tɩ b naama fãage, tɩ b kong n dig-ba n yiis b sẽn da beẽ, b bao zĩig n balg-b bãeens sẽn ka tõe n kao. B balg-b la likẽ n gũud bʋ kãsenga raare. Sã n ya malɛgs niyns sẽn bas-b tɩ b reeg b kãsengo tɩ b ka pa b naama zugu, b bĩnga bãmb bʋʋda ra-kãsenga yĩnga la b sẽb-b lame tɩ b be likẽ, wakat buud fãa.

⁷ Yaa yoob so-yɛng la Sodom la Gomor dãmba me rɩk yã, b me maan wɩɩbdo la b sɩbg-b lame, neb a taaba zãmsg yĩnga, ne bugum sẽn ka kiid lɛ-lɛ.

B tʋʋsda Wẽnde

⁸ La ade, wala b yika gãeemdo, bãmb me rẽgemda b yĩnsi la b sãbsd yĩngr soaalba, yĩngr na-rɩtba.

⁹ Malɛk kãsm a Mikayɛl sẽn yik zabr ne Sʋtãan tɩ b maand no-koeemde a Moyiiz yĩnga poorẽ, a ka saag a paoogr ye. A yeelame bala: «M basd-f la ne Wẽnde!»

¹⁰ Bãmb yẽ paoogda-b sẽn ka mi, la b sẽn mi bũmb ningã b mi-a-la ne ninsaal yam bala, wala rũng sẽn mi, la rẽ ka wat ne bũmb a to tɩ ka b menesg ye.

Bãmb dãmb wẽnem

¹¹ La yell bee zirẽ-be-mitba zugu; b rɩka a Kaẽ sorã n kẽ moogo; b tudga a Balaam tudgrã, ligd daab yĩnga; b ki-la b tõdgr pʋgẽ wala a Kore.

¹² B kɩtdame tɩ y sã n dat n lagem taab n dɩ bɩ ka baasd neer ye. B rɩta noogo tɩ yãnd ka tar-b ye, n pit b pʋse. Ad-y b lebga sawat faad sobg sẽn tar n looda. B lebga tɩɩs sẽn wom n sɛ, n ki b wilẽ la b kʋɩ b yẽgnẽ, n võ n dɩga.

¹³ Ad-y b yɛsa ne yãnde tɩ b na lɛɛg wʋb wa mogr pʋg sẽn dãmbe t'a wʋbd a ko-puudu. B wẽnda yĩngr ãds sẽn kẽnd yaare la sẽn lebg lik soolem yʋʋm tõt sɛɛb yĩnga.

¹⁴ Yaa bãmb fãa poorẽ la a Enok, d yaab a yopoe soab a Adem poorẽ, leok bãngr leokre: «Soaala waa ne b nin-sõma, zãma kõn bãng n sõde,

¹⁵ tɩ b na paalg nin-wẽnsa fãa b tʋʋm-wẽna yĩnga la b sẽn gom tɩtaam goama yĩnga.»

¹⁶ Yaa bãmb n tar gom-bi, n tar guglengu, n tũud b yĩnga yamleoogo, n gomd wilg-m-meng goama la b belgd neb n na n paam n dɩ.

Maan-y tẽegre

¹⁷ Sã n ya yãmba, m kom-nongdse, tẽeg-y Soaal a Zezi Krista tʋʋm-tʋmdba sẽn wilg bũmb ningã.

¹⁸ B ra yet-y la woto: «Dũni wã sɛɛb wakato neb n na n zĩndi n mi b taab laado la b pʋgd b minim-wẽnse.»

¹⁹ Bãmb dãmb n wat ne welgre. B basa b yam sõnga pʋgbo n vɩ wa rũmsi.

Taab nonglem sẽn dat bũmb ninga

²⁰ Sã n ya yãmba, m kom-nongdse, keng-y taab pelse ne y tẽeb sõngo la a Vʋʋsem Sõng sɛɛg yõkre.

²¹ Pa-y Wẽnd nonglem pʋgẽ n paam n dɩ Soaal a Zezi Krista nimbãan-zoeer yõodo yʋʋm sẽn ka be sɛɛb yĩnga.

²² Neb niyns sẽn ket-b n zĩi n sãmbdẽ wã, sõng-y tɩ b tẽeba lebg kẽnkẽ.

²³ Fãag-y sẽn lʋɩ-b bugmẽ; kũm-y sẽn ket-bã nimbãanega; maan-y rabeem ne-ba, la y ra sɩɩs fuug b sẽn yeelg meng ye.

Wẽnd pẽgre

²⁴ Wẽnd yɛngã sẽn tõe n zãag yãmb ne lʋɩɩs buud faa la a tõe n yals yãmb b ziira taoore, tɩ rabeem sɛ, tɩ sũ-noog pid zãnga,

²⁵ d Wẽnd la d Fãagda, paam pẽgre, naam, pãnga la tõogo, a Zezi Krista maasem yĩnga, tɩ yʋʋma tong taaba n tõnt sɛɛbo. Amina!