A Zowɛlle 1 - SEBR SÕNGO

Tẽnga tara nimbãanega

¹ Naaba-Wẽnd taasa goam kãensã a Petuwɛl biig a Zowɛl.

² Nin-kẽemsã yoog-y y tʋba, Zɩɩda tẽnga rãmb fãa, kelg-y neere. Togs-y tɩ d bãng yaa yãmb zamaanẽ bɩ y saam-dãmb zamaanẽ la yell a woto zĩnd yã.

³ Y sẽn ne bũmb ning rũnda wã, wilg-y koɛɛgã y kamba tɩ bãmb me reeg-a n taas b kamba, tɩ y yagensa reeg n taas y yagen-tʋbra-kẽese.

⁴ Menemeeda sẽn dɩ n keese, sʋʋr n loogd ne. Sʋʋra sẽn keese, mogdr-zẽenga loog ne. Mogdr-zẽenga sẽn keese, sʋ-warengo. Sʋ-warenga sẽn keese, pãng-n-vũudri.

⁵ Aya, rã-tɩgdba, gõeem ka ye, yik-y n yãbe. Yãmb fãa sẽn yũud rãam, tɩ noom-y, kelem-y wɛ, tɩ bugsuntund ka wom biis ye la rã-paalg kõn paam n yũ ye.

⁶ Tãb-biis ka tɛk wa sʋʋre n waa n kẽ d tẽngã. B tʋʋla ne sãoongo, b ka tõe n sõd ye. B yɛga keglem, bõnyẽeg rẽnna. B yẽna sɩlem, bõnyẽ-yãang rẽnna.

⁷ B sãamda d bugsuntundu, n vigsd d kankamse. B lagsda b pagdo n basd wil-pɛɛla.

⁸ Kelem-y kʋʋre, wala pag sẽn yãbd a sɩda a sẽn kul paalem.

⁹ Alkama la rãama ka le wat n kõt wẽnd doogẽ ye. Maan-kʋʋdba fãa zĩi ne sũ-sãanga tɩ Soaala ka le paamd waoogr ye.

¹⁰ Pʋta ka le be bũmb ye, tẽnga meng tara fare. Kaaf ka le ket ye. Rãam sɛɛme, tɩ b pa gomd kaam ye.

¹¹ Koaadba ka le mi b sẽn beẽ ye. Bugsuntung koaadba basda raoodo. Alkam pɛɛlga, alkam pugsgu, kooda fãa gill sãamame.

¹² Bugsuntund kʋɩɩme, kankams wãkame, tɩɩg ning sẽn womda biis wa poaloangã, koanga, subdga la pʋta tɩɩg ba a ye ka ning biig ye; fãa zãgsa tobre. Sũ-noog buud ka le be ninsaal sũurẽ ye.

Soaala sɛɛg yõkre

¹³ Yeelg-y sũ-pa-noang futu la kelem-y yã, maan-kʋʋdba, maan-kugra sõgen-kamba. Yãmba, Soaala-Wẽnd sõgen-kamba, gãand-y wẽnd doogẽ n wiisi, n wilg y sũ-sãanga. Alkama la rãama ka le wat n kõt wẽnd doogẽ ye.

¹⁴ Aya, moon-y no-loeer daare, moon-y tig-raaga, tigs-y nin-kẽemsã la buuda fãa tõnd Soaala-Wẽnda roogẽ tɩ y yõk sẽega.

Soaala sũ-puura raare

¹⁵ Way! Da-beed n wate, Soaala-Wẽnd sũ-puura raar n wate. Yaa sãoong raare la Soaala-Wẽnd pãng soaba yals yã.

¹⁶ Ade, tõnd nif ka le yãet rɩɩb ye. Tõnd ka le yãet kɩdeng la sũ-noog tõnd wẽnd doogẽ ye.

¹⁷ Kood paa b sẽbdẽ, b pa tõog n tus tãndagã n yi ye, fãa paa bogdẽ. Alkam ka yãe n tigs ye. Bao yaa vɩɩdo, zãna lʋɩɩme.

¹⁸ Kelg-y rũmsa yãbre! Rũmsa saad n zoeta yaare n baood yamdo n kongdẽ. Piisa meng tara yaoolgo.

Bãngda kosgo

¹⁹ Soaala-Wẽnde, m teesa yãmb n boonẽ. Bugum n dɩt pʋ-weesã. Bug-walma rɩɩ pʋta tɩɩs gilli.

²⁰ Al ba we-rũmsa mens wẽnemda b nens n teesd yãmba tɩ kʋɩlsa fãa kʋɩɩme. Bugma me ka kees yamd ye.