A. Zoobe 8 - SEBR SÕNGO

Beegr fãa wata ne a sɩbgre

¹ A Bildad, Suwa raoa, sɩnga goama n yeele:

² Zoob, fo na n kell n tara yɛla toagsg woto, n gomd goam sẽn kaood sɩlmana?

³ Wẽnd-Pãng-Soaba tõe n tedga bʋʋm? Naaba-Wẽnd tõe n bʋʋ tulma?

⁴ Fo kamb sã n beeg Wẽnde, Wẽnd-Pãng-Soaba, basd-b-la ne b yel-wẽnde.

⁵ Fo menga, sã n baood Wẽnde, n yõkd b sɛɛga,

⁶ f sã n ya pʋ-peen-needa la nin-tɩrga, Wẽnd na gũ-f goabg la rɩtgo, n le zaoolg fo f sõmblema zugu.

⁷ Fo sẽn da yɩ a soab pĩnda na n lebga zaalem sã n mak ne beoog rẽnna.

Pĩnd dãmba kaseto

⁸ Sok pĩnd dãmba, gese, sok n ges b yaab rãmba sẽn seg bũmb ninga.

⁹ Tõnd dũnna kamba, tõnd nan mii bõe, d vɩɩm ka maasem bal sẽn buid tẽnga bɩ?

¹⁰ Pĩnd dãmba na gom n wilg-fu, b pʋtẽer na yiis yelbũna.

¹¹ «Rudum yita yɛ tɩ ka bãoogẽ? Kʋɩlg moog tõe n bɩ tɩ koom ka beẽ?

¹² Koom ka be, kʋɩlg moog kiidame t'a nan puudẽ, a rengda a taab n kʋɩ tɩ b pa kũug-a ye.»

Wẽn-yĩms maanda a menga

¹³ Ad-y sẽn yĩma Wẽnnaam yell me yaa boto; nin-wẽng sẽn gãe n tẽed fãa paada sãoogo.

¹⁴ A ra-tɛɛgdg na n kaoogame la a sẽn teega yaa sʋlg gaam-gaam.

¹⁵ A sã n dell a roogo, tɩ roog kɩlle t'a maneg n gĩd kẽnkẽ tɩ roog lʋɩ.

¹⁶ Sẽn ka mi a Wẽnde, wẽnda tɩɩga tɩɩga tobame n yɛs wĩndgẽ, a yɛdga a wila n lud tɩɩs a taaba.

¹⁷ A yẽgna sʋg n kẽe kuga n kẽ n gaam kuga pẽgsẽ.

¹⁸ Mik b sã n võog-a a sẽn da yɛsẽ wã b na wẽen tɩ tɩɩg zɩ n zĩnd be ye.

¹⁹ Yaa woto la sẽn yĩm-b Wẽnda pʋɩɩre. Bãmb zĩigẽ tɩɩg a to n na n yi.

Sũ-noog kãabgo

²⁰ Abada, Wẽnd ka basd nin-tɩrg kɛɛng ye, la b ka sõngd yɛl kɛga rãmb ye.

²¹ Wẽnd na n le pidsa f noor ne laado, f noor na n le wuka ne kilsgu.

²² Fo bɛɛb na sud ne yãnde, nin-wẽens rot na sarem zãnga.