A. Zoobe 7 - SEBR SÕNGO

Tẽng zug vɩɩma: tʋʋm wakato

¹ Ninsaal vɩɩm tẽng zug yaa bõe, sã n ka yem-da-tʋʋma tʋm n baase? Beoog vẽegd-a-la tʋʋmd zugu, tɩ sẽoog wa reeg sɩpaolgo.

² Wala yem-daoog sẽn sesd n baood maasem, wala tʋʋm-tʋmd sẽn gũud a yaoodo,

³ m gũume la kiuug fãa waa ne a belgre, tɩ yʋng fãa wa ne a yaamse.

⁴ M sẽn lʋɩ m gãagẽ tɩ m na n gãande la m sẽn sokd m menga: «M na n yika wakat bʋgo?» Zĩig sã n sobg la a sẽn sobge, beoog ka le pʋgd ye, tɩ m gãe n zʋbsdẽ n gũud sõore.

⁵ Rẽgd la karense wʋma maam, tɩ m yĩn-gãongã wukd ne meto.

⁶ Mam daara zoee tʋʋlg-tʋʋlga, n yɩɩd koeer-wamde. La gĩsga sẽn taa a tɛkã, wʋgb me sɛ yã.

⁷ Tẽeg-y yã, Wẽnde, tɩ m vɩɩma yaa noor pemsem la m nif kõn le teeg sũ-noog bada.

⁸ Adem biig nif kõn le teeg maam ye, m loogdame la yãmb bal y ye n ket ne maam.

⁹ Wala sawadg sẽn wɩlg n looge, sẽn lisa bʋg-tẽng kõn le puk ye,

¹⁰ a kõn le kẽ a zakẽ ye, a yir dãmb kõn le sok a yell ye.

¹¹ Dẽ n kɩt tɩ m ka na n sĩnd ye; ba m na gomd la m sesdẽ, m na gome, m na n gom n wilg tɩ m pɛtã n wa ne m guglgu.

¹² M yaa mogra bɩ bõn-ninda sẽn be a pʋgẽ wã, tɩ y bao gũudb sẽn na n gũusd m yikr la m gãaga?

¹³ M sã n yeele: «M na n paama yolsgo m gãagẽ, m debra zugu m namsgã na wooge,»

¹⁴ y wat n yɛɛsd-m-la ne zãmbsdo.

¹⁵ Mam sẽn tull la sãrg m menga, mam kũum n são m yĩnga vuubu.

Bɩ Wẽnd bas-ma!

¹⁶ Ad-y m ya n yɛɛme, m ka na n vɩɩnd daar fãa ye. Bas-y-ma tɩ m daara loogda wa bug walem.

¹⁷ Ninsaal pus n yaa bõe tɩ y mams-a wa bũmb sẽn pid ne yõodo, wa bũmb sẽn sek y ning-a sʋka?

¹⁸ Y lɩkd n get-a-la yibeoog fãa, n dat n bãng a gãag sẽn yɩɩ a soaba;

¹⁹ Y na n basame n ka le ges-ma tɩ m yãe vɩʋʋg n vel m kolkood bɩ?

²⁰ M sã n maana yel-wẽnde, yel-wẽnda maand-y-la bõe waare, tɩ y tar m gũusgu wĩndg la yʋngo? Bõe yĩng tɩ y nif kell n tuk maam woto? M zãab paasda yãmb zɩɩb bʋgo?

²¹ Y sɩd ka tõe n bas m beegra taale, n mum y nif n kõ sugri? Bala sã n yɩ bilfu tɩ m yaa tom y na n babl n bao-m lame la rẽ tɩ m ka ket ye.