A. Zoobe 6 - SEBR SÕNGO

A Zoob zabda ne a zo-rãmba

¹ A Zoob le yaaga a noor n yeele:

² M nongẽ lame tɩ m sũ-sãangã yaẽ la bũmb sẽn tõe n mage, tɩ m sũ-kãbrã tarẽ magdga!

³ M tẽed t'a zɩsame n yɩɩd mogr noorẽ bĩisri; ya rẽ la yiis gomd biig n togs lebg toog ne m no-gãndo.

⁴ Wẽnd-Pãng-Soaba pɛɛma kõsa maam n gilgi, la m fõosa b zẽnema zãnga, Wẽnd sẽn yiisd bũmb ning fãa tɩ tõe n yɛɛs ninsaala, m seg-b-la zãng kasi, b zãng bobame n na n zab ne maam.

⁵ Burgumd na yãbd kom yamd noog sɛɛgẽ? Ka rʋʋgd loalg yamdo t'a le mi kɛleng ye.

⁶ Rɩ-sãbsgo tog n dɩɩme n ka ning yamsem bɩ? Gel-kood nooma noorẽ bɩ?

⁷ M pa rat rɩɩb a woto buud ye, namsg ka bur sẽn sakd dɩɩb ye.

⁸ La ãnd n na n sõng tɩ m kosga pidsi, n sõng tɩ Wẽnd kõ-m m sẽn saagde?

⁹ Wẽnd sã n da sakẽ n neem maam b teoogẽ, n wãagẽ maam wa sʋlg sẽn wãagd a peende!

¹⁰ M sũur na maagẽ, m sũur na yɩẽ noogo, m namsg kẽenga pʋgẽ, la rẽ yaa m meng sẽn tar kaseto, tɩ m pa tol n kɩɩs Sõmblem-Naaba noor ye.

¹¹ Mam na n yãee pãng yɛɛnẽ n yaas n gũ; m kũuma sẽn ya tɩlɛ, m vɩɩma yõod la bʋgo?

¹² Mam keelma taa pĩig dẽnd bɩ? Mam yĩnga tara zũud keglem bɩ?

¹³ M sẽn gũud sõngr ninga ka loog n tɩ yag vɩʋʋgẽ bɩ? Zĩ bʋg la m kẽed n paam n põse? Saagr bilfr menga ka le ket m nengẽ ye.

Tẽng zug zooda ka zood ye

¹⁴ Toog sẽn wʋm a soaba tog n paama a tũud-n-taasa sõngre, ka rẽ a kõn zoe Wẽnd-Pãng-Soaba nif ye.

¹⁵ M saam-biisa yɩɩ sõm-zitba, b zoe n looga wa koom, wa koom sẽn zoe n bas kʋɩl-waoko.

¹⁶ Waooda sã n nan ket bilfu, kʋɩlsa wuk n yɛsame, kooma sẽn da gũsa boogd n watame,

¹⁷ zĩiga sẽn wɩng bala, kʋɩlsa kʋɩtame, tʋʋlga fẽbgd-b-la zãnga.

¹⁸ Ko-yũud mii n wa legla toandba n legl-ba n kẽes moogo, n legl-ba n tɩ menes we-raoogẽ.

¹⁹ Tema toandba, Saba leebdba nin kargda weoogã, tɩ koom sẽn na n furg la b baooda, n tẽed tɩ kʋɩl-waoka na pids b tẽebo,

²⁰ mik b sẽn kolge lebga teeg lemde, tẽeb loogame n bas b rãmb ne yɩɩre.

²¹ Ad-y yaa woto me, maam ne yãmb sʋka, y sẽn yãend m bãaga la y sẽn yɛs ne yɩɩre.

M kongra la bʋgo?

²² Da-bʋr la m yeel yã: «Wa-y n kõ-y kũuni, wa-y n zam-y maam y sẽn tare?

²³ Wa-y n yao m bɛya tɩ m paam n põse, wa-y n fãag-y-m pãn-tõoga soab nugẽ.»

²⁴ Tẽeg-y fãa n wilg mam tɩ m na sĩndi, wilg-y maam m tudugra zĩiga.

²⁵ Togs sɩd ka mot noor ye. Togs-y y sẽn yãend m nengẽ tɩ ya goalenga, togs-y-m m goalenga sẽn golmẽ.

²⁶ Yãmb bilgda y na yãe kegre m goama pʋgẽ wɛ? A ka-neng-soab goam me yaa bõe tɩ ka gom faad sobg sẽn loogd ne bala?

²⁷ Y na sak n bas tɩ b koos kɩɩba a sẽn ka tɛɛgd yĩnga, n bas tɩ b koos y zoa sẽn ya y zoa menga?

²⁸ Ade, wɩsg-y y meng n doog n ges-ma, m na saag n yag-y zirẽ bɩ?

²⁹ Lebg-y n wa yã la y da maan zãmb ye, bi y lebg n wa tɩ m yiis m meng yellẽ.

³⁰ Mam zelemde n yagd zirẽ, bɩ sɩd la m ka mi n bakd ne zirẽ-beedoo?