A. Zoobe 5 - SEBR SÕNGO

Wẽng yita yɛ?

¹ F bolgda ãnna t'a wa leok fo, Zoob? F na n goma ne Wẽnd yamba a bõe, malɛk sõng a bõe la f na n gom ne?

² Sɩda, sũ-toogo n kʋʋd ka-yõod-soaba, tɩ zoe-bõn baasd yalma.

³ Mam yãenda nin-yoog zak sẽn piuugdi, la m wẽneg n kãaba a zaka beedo:

⁴ «Bɩ a kamba bolg sõngre n konge, bɩ bʋʋd zĩigẽ, b bʋʋda yɩ toogo, la ned da sõng-b ye.

⁵ A wãka sẽn kõ-a kood ninga lebg kom sẽn tar a soab rɩɩbo, b kao a gõosa yãgrã n kẽ n wʋke, a ba sẽn bas ne a fãa gilli, bɩ zɛɛdba loog ne!»

⁶ Yɛl kɛga ka pusgd tẽng n yi abada, nimbãaneg me ka bund wa kood n yi ye.

⁷ Ninsaal yẽ dogame n na n wʋm toogo wa bug-pãrg sẽn baood n na n zom moogo.

⁸ M sã n da yaẽ foo, yaa Wẽnd la m na n taasẽ m koɛɛga, m bʋʋda yaẽ-la bãmb n na n bʋ-ma.

⁹ Bãmb tʋma tʋʋm kãsense sẽn zʋʋg ninsaal yam. B tʋʋma yãgda ne neerem la b yaa kõn-bãng-n-sõde.

¹⁰ Bãmb n zãgsd tẽnga ne b sa-koom, pʋta paamda koom n yɛs ne tɩgre.

¹¹ B dat n zẽka nin-bõoneg zutu, la b kõ neng sẽn gãnem b rãmba fãagre.

¹² B sãamda sɩlem dãmba magbo, n kɩt tɩ b geels fãa pa fãado.

¹³ Bãmb n yõkd sɩlem dãmba b sɩlma bẽdgẽ, bãmb n dengd n puk zãmb rãmba zãmbo.

¹⁴ Wĩnto-sʋka, zãmb dãmba fãooda lika, n babend wĩnto-sʋka wa yʋn-sʋka.

¹⁵ Wẽnd fãagda naong soaba, t'a põs a bɛɛb sʋʋga n põs b yẽna, n põs b nug-yẽese sẽn ya barse.

¹⁶ Yaa boto la nimbãan-ned lɛɛg n bilgd tɩlgre, tɩ nin-wẽng fãa za wĩir n yɛsẽ.

¹⁷ Sɩd sɩda, sũ-noog soaba la Wẽnd sẽn demsd a soab kẽnde! Bɩ f sake, Zoob, n tũ Wẽnd-Pãng-Soaba saglse.

¹⁸ Wẽnd n wat ne toogo la b wat ne pemsem, bãmb n kaoogd ne b nus n lɛɛg n wobge.

¹⁹ B na n yiis-f-la yɩɩr a yoob pʋgẽ, la a yopoe soaba na n gil n bas-f lame.

²⁰ Kom wẽnde, b na fãag-f ne kũum, la f põsda sʋʋga, zabr wakato.

²¹ Zelem toaag soab sãbsg kõn sãbs-f ye, f kõn maan dabeem ne beoog yel-beed ye.

²² Kom la tẽn-kũum ka loe f zug ye, f ka rigd we-rũng poorẽ ye.

²³ Bũmb kõn sɩɩs f pʋʋg ye, kugr kõn fẽrg a pʋʋgẽ ye, rũng kõn wõrg bũmb ye.

²⁴ F zak pida ne laafi, f rũmsa wãbneg zĩigẽ yamd kõn paoog ye.

²⁵ F na n yãee f buuda fɩɩre, la f yagens na n yãmba zĩiga wa moog sẽn dɩ pʋ-wɛɛga.

²⁶ F kõn zarbe n yaool dɩk yaada sor ye. F kooda rengd n kalsame, n kals n sam zĩ yɛnga, tɩ f ket n pid ne vɩɩm dẽ poor marsã la kũuma na n yaool n wa.

²⁷ Tõnd vɛɛsame la d yãendame la sɩd yaa woto, Bas tɩ b wilg-fu, n paas f bãngre, Zoob.