A. Zoobe 4 - SEBR SÕNGO

A Elifaz saglgo

¹ A Elifaz, Tema raoa, goma ne a Zoob woto:

² M mi tɩ m sã n gome m na n paasa f naongo m yaool n ka tõe n le sĩnd n paas ye.

³ Gese, fo menga sagla neb kʋʋngo, n da kengd yaams sẽn tar b rãmb sũuri.

⁴ Sẽn da reegd-a fo saglgã da le paamda raoodo; sẽn pãsd-a n lʋɩtẽ da le paamda pãnga.

⁵ Marsã, taa foo tɩ fo burd n lʋɩtẽ, tooga sãaga foom tɩ f ka le mi f sẽn kẽedẽ ye. Yel-beeda taa foo marsã tɩ f basd raoodo, taa foom marsã tɩ f yɛɛsdẽ.

⁶ Fo yeelame tɩ f tũuda Wẽnde la f vɩɩma ka tar goaleng ye, bõe tɩ f ka na n kell n zĩnd ne f saagre?

⁷ Tags n gese, ka-yell-soab a bõe la nin-tɩrg a bõe la yel-beed peeg n loog tɩ fo mii?

⁸ Mam sẽn mi bala, yaa tɩ f sã n bʋd nimbãanega f sã n bʋd zãmbo, f tigsda zãmbo la nimbãanega.

⁹ Neb sã n tʋm n puug Wẽnd sũuri, b fʋʋsd-b lame tɩ b menem, n menem wa saag sobgo ne mo-paoko.

¹⁰ Wẽnd n tõe tɩ gɩgemd sĩndi tɩ bõnyẽ-bi yɩ lamboama.

¹¹ We-rũmsa tõe n konga rɩɩb n ki, tɩ b kamba sẽeg taaba!

Yʋng zãmsdo

¹² M zãmsdẽ, koɛɛg n waa n walme, la m tʋbr wʋma bʋrbʋre.

¹³ Yʋng zãmsd sẽn waa n lengd m tagsgo tɩ Adem biisa gãe wa bõn-kɩɩmse,

¹⁴ yɛɛsg n digimd-m waoodo, n kɩt tɩ m kõaba wẽ taab koe-koe!

¹⁵ Pemsem n wẽ m nengã valɛll, tɩ m yĩnga kõbd fãa yik n yɛsẽ.

¹⁶ Ned n da yɛs m taoore la m da ka mi a soab ye, m da nee bũmb bal sẽn yɛs m taoore. Fãa ra yaa sɩɩ, la m waa n wʋma koɛɛg:

¹⁷ «Adem biig tõe n bʋʋ tɩrga, a bʋʋda tõe n yɩɩ tɩrga n yɩɩg Wẽnd dẽnd bɩ? Ninsaal sõmblem tõe n yɩɩga a Naanda rẽnd bɩ?

¹⁸ Gese, Wẽnd sũur ka peel ne b buuda kamb ye, b malɛk rãmba nengẽ menga b nee bũmb wa gãeemdo.

¹⁹ M na n yeelame tɩ bõe marsã ne nin-tãndã, ne sẽn ya-b tom-pʋlempʋk rãmba? Bãmb na n bedsa wa karenga.

²⁰ Yibeoog n ta zaabre tɩ goama gilame, bilf-bilf bala b wat n menema zãng fas.

²¹ B rooga tii ne pɛɛla la a wĩ wã zoe n loodame. B yalemdã n dɩt-b zãng kas.»