A. Zoobe 39 - SEBR SÕNGO

¹ Fo mii tãmsa zut bʋʋsã sẽn dogd wakat ning bɩ? La fo zoe n wʋma b sẽn kũmd dogem bɩ?

² B pʋga kaoosda kiis a wãna? Wakat bʋg la b rogda?

³ Ad-b yĩgimdidame n doge, n wẽneg n vʋʋs ne toogo.

⁴ B kamba wɩsgdame, b pãnga wat n paasame tɩ b ka tol n yãend põnegr ye, la b wat n looga b sẽn datẽ n bas b ma.

⁵ Ãnna n bas burgumdi t'a saad a yam? Ãn n kõt bõan-wɛɛg soog-m-menga?

⁶ M dɩka zĩ-peela n kõ-a tɩ lebg a na-tẽnga.

⁷ A toog ka be ne tẽng pʋgẽ bʋrg ye. Bõan-kɩɩm ka be n na n yaal-a ne a guug ye.

⁸ A vɛɛsda tãmsã n baood a wãbr zĩiga, n baood yam maasa menga sẽn tõe n paam bilfr bal zĩig ninga.

⁹ We-naaf na sak n yɩ f sõangda, a na sak tɩ f loe a bãgrẽ yʋngo,

¹⁰ f na moadg-a t'a ko pʋʋgo, a na leb fo poorẽ n saremd kaalma?

¹¹ Fo na teeg a pãngã n dɩk f tʋʋma fãa n bas ne-a?

¹² Fo na yet tɩ f bas-a-la ne f kooda tall n taas f zakẽ, n bas-a ne wʋk n sui baoorẽ?

¹³ Naneong tara pɩgsa, la dũni na yiki, t'a pa tol n yɩk wa kʋɩl-pesgo bɩ raong ye!

¹⁴ A basda a gɛla tẽnga, tɩ tẽngã tʋʋlem wek-ba.

¹⁵ A yĩmdame tɩ naoor tõe n tabg-b lame, la we-rũng tõe n wʋk-b lame.

¹⁶ A tara a kamba toogo wala ka yẽ kamb ye, a ka zoet a naonga na n wa yɩ zaalem ye.

¹⁷ Bala Wẽnd mong-a-la yam, b pa kõ-a tags wok ye.

¹⁸ La a sã n yik n na n kʋɩ tĩiga a laada wed raoog ne a wed-dʋʋda.

¹⁹ Yaa foom n kõt weef sũ-keelem bɩ, bɩ foom n ningd a yubla gɛde?

²⁰ Fo tõe t'a yɩk wala sʋʋre; a sã n kelem, rabeem yõkda neb fãa.

²¹ A yɛsa tãnga pennẽ n tibd ne pãnga; a wʋm zabr rãamde, a zoet n dabdame.

²² A toog ka be ne rabeem ye, a sũur me ka kiusd ye, sʋʋg ka wõogd t'a targ ye.

²³ Lok kaglemda a zugu, n paas kãnd sẽn yãgd la kãn-dibga.

²⁴ A yɛsame t'a yĩnga tõsbdẽ t'a na n ning tĩiga, baorgo sã n peebe, a ka le tõe n yaas ye.

²⁵ Sã n peeb fãa, a kelemdame: Ẽee, ẽee! A rɩkda zabra yũug al yɩɩga, a wʋmda tãnsoaben-dãmba tãsga la b bʋʋre.

²⁶ Wɩbg kõbd sẽn pusd to-to wã, fo n wilg-a yam kãnga? A sã n yɛdga a pɩgsã n dɩɩmd wĩntoogo, foo n wilg-a rẽ?

²⁷ Fo n kot panantugri noor t'a yɩk n kul yĩngri, n tɩ maan a tʋko?

²⁸ A gãag zĩig yaa pĩig zugu, a zaoo pĩ-sɩlenga, ned sẽn ka tõe n taẽ.

²⁹ A zaoo be n gẽesd a rɩɩbo, t'a nin tõe n long n tɩ ne rɩɩbã al sẽn zãrẽ.

³⁰ A kamba rɩɩb yaa zɩɩm bala. Dɩgre sẽn be zĩig ninga, be la a be.