A. Zoobe 35 - SEBR SÕNGO

A Eliyu leokr a tãab soaba

¹ A Eliyu n kell n tall goama:

² M ned sõngo, Zoob, fo sã n yet Wẽnde: «M be bʋʋm, m ka bʋʋm fãa yaa bõn-yɛng ne maam,»

³ fo tẽedame tɩ Wẽnd taoore, f goama tũuda sore?

⁴ Ad-m sẽn na n leok-foo, foom ne f zo-rãmba.

⁵ Nak n ges saaga neere; ges sawatã sẽn lug to-to b pa zʋʋg foo n kul yĩngr sɩda?

⁶ Fo sã n maan yel-wẽnde bõe n maand Wẽnde? Fo beeg-b naoor yaka, b nod bʋgo la f rãmsda? Fo ka maand-b fɩ!

⁷ Fo sã n ya nin-tɩrg me, bõe la f kõt-ba? Yaa f bõe la b reegd f nugẽ?

⁸ Yaa f taaba bala la f wẽnema namsda, Adem biis bala la fo sõmblema nafda.

⁹ Nanamsa sã n maand b neba pãn-tõogo, b neba ka pẽgd ye. B boonda goabg la rɩtg tɩ b wa fãag-ba.

¹⁰ Ned ba a ye ka tẽegd n yeele: «Wẽnd la m Naanda bɛɛ? D sẽn mii n kilsd a soab ne yʋnga bɛɛ?»

¹¹ Bãmb n yaool n pukd d yam n yɩɩd we-rũmsa vɩɩm, n yɩɩd luiili wã rẽnna.

¹² Wilg-m-meng rãmba la nin-wẽnsã sã n zãad tõnd toogo tɩ d bool Wẽnd me, ad-y b pa leokd ye.

¹³ D tar waasgo me, yaa zaalem, Pãng-Soaba ka wʋmde, b ka kelgd wa d yiisa gomd sẽn be yõod ye.

¹⁴ M pa tẽed tɩ b na leoke, f sã n wa yɛs n gomda tɩ f yiisa f koɛɛga daar zãra la f ket n ka ne-b ye la f ket n gũuda b leokre,

¹⁵ M pa tẽed tɩ fo tara bʋʋm ye, Zoob, fo sã n tagsd tɩ Wẽnd pa sɩbgd yel-wẽnde.

¹⁶ Woto wã fo goama fãa yaa gom faado, fo gomda wʋsgo, la f ka mi f sẽn yet ye.