A. Zoobe 34 - SEBR SÕNGO

Wẽnd bee bʋʋm

¹ A Eliyu le gomame n yeele:

² Sã n ya ne yãmba, yẽesem dãmba, kelg-y m goama; yãmba, mitba, bi y yoog y tʋbre n kelge.

³ Sɩda, yaa tʋbre n mi gomd noom, wala zelemd sẽn mi rɩɩb noosem.

⁴ D lagem taaba n ges sẽn be neere. D ges ne taaba sẽn ya sõmbo.

⁵ Kelg-y a Zoob sẽn gomd t'a tara bʋʋma, tɩ Wẽnd ket n ningd-a taalã,

⁶ tɩ Wẽnd bʋʋda ka tũud sorã, tɩ b pogl-a lame t'a rat n ki, la yell ka a zugu ye, a ka beeg ye.

⁷ Pʋs n yaa bõe ned la nin-kãnga? Fo leokd-a-la bũmb t'a lɛɛg n yaal-fo la yaoolga ka toe ne-a ye.

⁸ A naaga nin-wẽnsã n dɩk so-yɛnga nin-wẽnsa la a tũud-n-taase.

⁹ Sɩda yẽ n be tẽngr n gomda: «Zems f vɩɩma ne Wẽnd daabã ka kõt ninsaal fɩ.»

¹⁰ Bɩ y kelg-ma, sẽn tar-b yama rãmba, Wẽnd zãra ne wẽnga. Wẽnd-Pãng-Soaba zãr ne wʋg yell kegre.

¹¹ Bãmb n dond ninsaal tʋʋma yõodo, n dond ned kam fãa wala a manesem sẽn tog ne.

¹² Sɩd sɩda, Wẽnd ka tʋmd wẽng abada, Naaba-Wẽnd ka basd sɩd t'a golem ye.

¹³ M sok n gese: ned a to n gũnug bãmb tẽngã laa? Ned a to ka kos bãmb tɩ b ges dũni wã yell koe!

¹⁴ B sã n da tagsdẽ b meng yell bala, n yõk pemsma ninsaalba sẽn vʋʋsde,

¹⁵ nin-vɩɩs fãa kõn naagẽ taab n ki. Ninsaal fãa kõn lebgẽ tẽng tom.

¹⁶ Zoob, f sã n tara yɛla wõore bɩ f modg n kelg-ma, kelg la f wʋm m sẽn na n togs-fo.

¹⁷ Wẽnd sã n ka tũudẽ zemsgo b na tõogẽ n zãẽ dũni wã bɩ? Fo na saag n mong bʋʋd tɩrsa soab bʋʋm bɩ?

¹⁸ Bãmb bal n tõe n yeel dĩma: «Ad-f ka võor ye,» bãmb n tõe n yeel dĩm biisi: «Y sẽn mi yaa zɩɩm daagr bala.»

¹⁹ Wẽnd pa ges n welg bãmb toor ye bãmb nengẽ arzɛk soab pa yɩɩd naong soab ye, b yiiba fãa ya bãmb nug n naane.

²⁰ Vugri bala zĩig sobgdame tɩ kũum deeg tẽng n yãmbe, tẽnga wat n wulumdame n kʋ a soaalba. B tusda naaba ne a pãn-tõogã n lebs kɛɛnga, tɩ rẽ ka tũ ne toog ye.

²¹ Wẽnd neng ka lakd ne ninsaal ye, b dɩkda a nao kẽndra gilli, n mi a tʋʋma.

²² Lik ka be n ya lika n sãamd yãeebo, n sãamd tʋʋm wẽna yãeeb ye.

²³ Ka modgr tɩ Wẽnd bool bʋʋdo, tɩ ninsaal wẽnema tõog n puk b nifẽ ye.

²⁴ B ka sokd la b sik pãn-dãmbã la b bao ned a to n ning b zĩigẽ ye.

²⁵ La yaa b sẽn mi ned kam fãa manesem; yʋn yɛng bala tɩ b sik-ba tɩ neb fẽd-ba.

²⁶ B reegda b wẽnema sɩbgr neba fãa taoore.

²⁷ Nin-kãens da wẽnemda b kãare n tees bãmba; n maand wa b ka mi Wẽnd sẽn dat tɩ b maan ye.

²⁸ La woto b kɩtame t'a ka-neng-soaba la a nug-pa-zãad soaba kong n kelem Wẽnde, la nin-koam kɛleng ka paad n ka lʋɩ b tʋbrẽ ye.

²⁹ La Wẽnd sã n da maanẽ wala b toog ka be, ãnda n na n ning-b taale? B sã n solg b nenga, ãnda n na n yãend-ba? B tõe n dɩka tẽnga naam,

³⁰ n kõ dĩm yoogo, n kõ na-yaalga, la sẽn maanda pãn-tõog bala.

A Zoob rɩta beem ne Wẽnde

³¹ D mak wala ned n yik n yeel Wẽnde: «M namsame n dol m beegrã, m kõn le paas beoog ye,

³² wa-y y toore n wilg-ma m sẽn bas b rãmb n ka sõdgã la m tuuba fãa gilli. M kõn le paas ye.»

³³ Foom a Zoob, fo tagsdame tɩ bõe fo tagsdame tɩ Wẽnd na sɩbg a soab bɩ? Gome, wilg f sẽn tagsde, foo n so yella welgre, ka maam ye!

³⁴ Ad-y yẽesem dãmba fãa, yam sẽn puk b rãmba fãa, na naag maam n yɩ zelemd a ye.

³⁵ D na n naaga taab n yeele: «A Zoob ka mi a sẽn gomd ye, t'a goama ka gomd tɩ tũudẽ ye.

³⁶ A sã n gomd n sõngd nin-wẽnse, bɩ a kell n tall boto.

³⁷ D na yãend tɩ beegr a to n wat n paas a sẽn zẽk a zug ne Wẽndã, t'a na n sɩnga Wẽnd tʋʋr la b sãbsgo, la a na n kɩtame tɩ d maand sãmb-sãmbe, n maand sãmb-sãmb ne Wẽnde.»