A. Zoobe 33 - SEBR SÕNGO

Ninsaala, maan gũusgu

¹ Zoob, maag f meng n kelg m goama, yoog f tʋbre n kelg m toagsgã.

² M yaagda m noore, tɩ m zelemd leebd m goama.

³ M sũ-tɩrga koɛɛg la m na n yiisi, la m noor na n togsa sɩd bala.

⁴ Wẽnd n fʋʋs b pemsem m yõorẽ, Pãng-Soaba maasmẽ la m vɩ.

⁵ Fo sã n tõe, bɩ f leok-ma, segl f menga n gũ-ma.

⁶ Gese, maam ne foom yaa bũmb a ye, Wẽnd taoore, b yiisa maam tãndẽ wa foom.

⁷ Woto wã f ka tog bas tɩ m goama yɛɛs-fo, bɩ n tẽ tɩ m baood n na wilg-f-la m pãng ye.

⁸ Fo n gom tɩ m tʋbr wʋme, f koɛɛga rãamd ket n tat-m lame, la f ra yetame:

⁹ «Mam yaa sõng zãnga, m ka yɩ tõat ye yel-wẽnd ka m zug ye,

¹⁰ ne rẽ fãa Wẽnd baooda yɛla n dogend m zugu, la b get maam wa bɛyã.

¹¹ B balga m naoor ne kutu, m pa tõe nang bũmb tɩ b ka bãng ye.»

¹² La zĩ-kãnga wã m na yeele, Zoob, tɩ f konga bʋʋm. Bala Wẽnd yɩɩda ninsaala, la b na yɛs n wẽed no-koeemd ne ninsaal, sɩda?

¹³ Bõe yĩng tɩ fo maand zabr ne-ba n yet tɩ b pa leokd b sẽn sok-b bũmb ningã, n yaool n mi tɩ ka modgr tɩ b wilg b sẽn maande?

¹⁴ Wẽnnaam bẽta yell dũnna n gome, n bẽd yell a to n gom beoogo, la rẽ pa wat neba yamẽ ye.

¹⁵ Tõe n bẽda ne yʋng zãmsdo bɩ likri, yaamsa sã n mii n lub ninsaalbã.

¹⁶ Wakat kãnga, b watame n gomd ninsaal tʋbrẽ, n wilg vẽenega b sẽn dat t'a gũus ne bũmb ninga,

¹⁷ sẽn na n yɩlẽ tɩ ninsaal bas a tʋʋm wẽna, tɩ sẽn maana raooda me tuub a wilg-m-mengã.

¹⁸ Woto a zãagda a meng ne yaoogo, la a zãag a vɩɩm ne kãna sẽn wat ne kũum.

¹⁹ Wakat ninga b demsda ninsaala n gãneg-a t'a gãe n bẽedẽ, tɩ tooga sãag n kẽ a kõaba,

²⁰ tɩ rɩɩb sã n ta a noorẽ bɩ a rat n wʋke, t'a yam lak ne a rɩ-noodo.

²¹ A yĩnga kʋɩtame tɩ b neẽ, t'a kõaba sẽn da busã, sãd n dʋr yɩnga.

²² Wakat kãng la a kẽnd n yegd a yaoogo, wakat kãng la b bas-a nin-kʋʋdba nusẽ.

²³ Wakat kãnga, a sã n paam tɩ malɛk yaas a sɛɛgẽ, ned sẽn tũus neb tusr sʋka, n tõe n taas-a Wẽnd koɛɛga neere, la a wilg-a a tʋʋm-pakre,

²⁴ a sã n paam t'a zoe a nimbãanega n yeel a: «Da bas-y t'a sig yaoogẽ, tɩ m paama a vɩɩma rondo n na n kɩse,»

²⁵ a yĩnga lebd n bʋkame, n lebg wa a sẽn da yaa a soaba a bi-bɩɩlmẽ.

²⁶ A na n pʋʋsa Wẽnnaam sẽn nong-a n kelem sũ-noog a sẽn ne b nengã, neng ning sẽn kõt ninsaal sõmblema.

²⁷ A tara yɩɩn-kãnga n yɩɩn neba taoore: «Mam da maana yel-wẽnd n bʋdg moogo, la Wẽnd ka sɩbg-m wala m sẽn da tog ne ye

²⁸ Bãmb fãaga m sɩɩga ne kũum, la m vɩɩma na n le koka b vẽenem.»

²⁹ Ade, wã fãa la Wẽnd tʋmda, naoor a yi, naoor a tã, ninsaal yĩnga,

³⁰ sẽn na n yɩlẽ t'a tɩlg kũum, tɩ nin-vɩɩs vẽenem bui-a.

³¹ Zoob, maag f meng neere n kelg maam, sĩnd f noore tɩ m na n le goma me yɛsa.

³² Fo sã n tara koɛɛga n na n gome bɩ f gome tɩ m dɩ f sõmblema kaseto,

³³ sã n ka rẽ bi f sĩnd n kelg maam, sĩnd f noore tɩ m zãms f yam sẽn pid yam.