A. Zoobe 30 - SEBR SÕNGO

Dũnna fare

¹ Ade, marsã mam lebga kom-bõoneg laado, kamb sẽn ka mi b kẽem waoogr ye. Pĩnda m yaool n da pa get b ba rãmba wa neb sẽn zem baasã m sẽn wubd m zakẽ wã ye.

² Yõod bʋg la m da na n dokẽ ne b nusa tʋʋmde ne neb sẽn da zĩ wa b kiime?

³ B mensa ra kʋɩɩme, nimbãaneg la kom yĩnga, weooga la b ra pɩkda n baood n na n kõ b noore, la weooga me la sẽn pid ne kom la fare.

⁴ Vãad sẽn ya yamsem-yamsem la b ra gẽemd tuuda sɛɛsẽ, b da rɩlgda mens ne kʋɩlgen-bengdo.

⁵ B yiisa bãmb Adem biis sʋka, n kaas-ba tɩ b yaa wagda.

⁶ Tãmsa pɛlẽ la b ra baood zĩis n na n soonde, n soond tẽnga bɩ pĩisa bogdẽ.

⁷ B bee tuuda pʋgẽ n yãbda, b tɩ samda taab gõosa tẽngre,

⁸ n wẽnd gãeemse, neb sẽn ka tar yʋʋre, b sẽn dig n yiis tẽnga pʋg ne rasaba.

⁹ Marsã, maam la b yɩɩn n laadẽ, maam n lebg b baobgo.

¹⁰ B kis-m lame la b zãagda ne maam, b yɛsa m taoore n tar m nenga sẽnesg bala.

¹¹ Wẽnd sika m tãpa wĩiri, la b tusa maam n lubi, la mam taoore bũmb ka be b sẽn ka maand ye.

¹² M dɩtgo, b ka tɛk ye, b gũuga m nao tɩ m lʋɩ, b tuka b sor n ta m sẽn beẽ n na n kʋ-m.

¹³ B kell n gũbga maam n seg zãnga, b baooda m yõor yãkre, la rẽ ka bũmb sẽn ya toog ne b ye.

¹⁴ B wedga m lalg n kẽedẽ, n tusd taaba a tãnda zugu.

¹⁵ Dabeem buud fãa lebg n kẽe maam, tɩ m daooda tũ rẽ n loog wala sobg n dɩk-a, tɩ m yĩn-maasma loog wala sawadgo.

¹⁶ Marsã mam vɩɩma salgda m pʋgẽ n menemdẽ, yaa namsgo daare n vẽeg m yĩnga, n yẽeg-ma.

¹⁷ Yʋngo, toog tara m kõaba n podẽ, m yĩnga tara wɩngre n ka maagdẽ ye.

¹⁸ Wẽnd gãda m fuuga ne pãnga, la yaa wa m fuuga loore n tiig n lebg sẽk n sãrd-ma.

¹⁹ Yaa begdẽ la b lobd-ma, m lebga wubsgu la tompɛglem.

²⁰ Mam zẽka m koɛɛg n boond yãmba, la y pa leokd-m ye, m yɛsa y taoore tɩ ya wa y nina pa ne-m ye.

²¹ Yãmb lebga nin-kʋʋd m yĩnga, tɩ y nugã ne a keelma wẽoogd-m.

²² Yãmb tũnuga maam y sobgo, tɩ y saaga na n ni n boog-ma.

²³ M sɩd miime tɩ y le rat n kẽes-m-la kũum soolmẽ, tɩ bõn-vɩɩl fãa rigda be.

²⁴ Sã n ya sɩda, nuga sã n zẽk n sɛ, ba b rãmba kaasda, sɛɛga yõkr ka le tar võor ye.

²⁵ Sẽn yãbd b rãmbã, m naaga bãmb n yãbe, m sã n ne nimbãan-ned fãa, yaa tɩlɛ tɩ m kũm-a.

²⁶ M da tẽeda sũ-noogo n mik sũ-sãang n wa, m da tẽeda vẽenem, la lik n wa n yãmbe.

²⁷ Mam pʋga roog gudgda wakat buud fãa, beoog sẽn vẽeg fãa yaa namsg la a wat n kõt-m.

²⁸ M yĩnga gãong tekame tɩ m kẽnda, la ka wĩndgã n yõog-m ye. Tigsga zĩigẽ, dẽn m yik n yals n wese.

²⁹ Mam lebga we-baas sõsd-n-taaga, mam tũud-n-taas yaa na-neoondo.

³⁰ Mam yĩnga gãonga sobdame n dʋʋgdẽ, M yĩnga kõab fãa digimda waoodo.

³¹ M kʋnda wãagda kʋʋr yɩɩla tɩ m wɩɩga wiisd ne kʋ-yãbdbã.