A. Zoobe 29 - SEBR SÕNGO

A Zoob leokr piig la a ye soaba

¹ A Zoob le paasa gomde; ad-a sẽn yeele:

² Ãnna n na n sõng-m tɩ m le yãend kiis niyns sẽn loogã? Daar niynsi Wẽnnaam sẽn da kogend maama,

³ b fitila sẽn waa n wit mam zugẽ, tɩ m kẽnd yʋngo ne a vẽenema,

⁴ wala m sẽn da yaa a soaba m zĩ-lik paallẽ, Wẽnd zooda maasem sẽn waa n buid m doogã,

⁵ Wẽnd-Pãng-Soaba sẽn waa n da ket n be ne maam tɩ m kom-dibli wã ra gũbg-ma,

⁶ bũmb da ka paoog-m ye, bĩisim ka paooge, kaam ka paoog-m ye.

⁷ M sã n da yit tẽnga noorẽ, mam sã n da rɩgl m goeele tigsga zĩigẽ,

⁸ kom-bɩɩba sã n da yãend maam, b loogdame, tɩ nin-kẽemsã yik n yɛs yĩngri, m taoore.

⁹ Tẽnga kãsem-dãmba basda b goama, n dɩk b nus n pĩ b noore.

¹⁰ Nanamsa koeesa ra gĩtame, tɩ b zɛlma tabend b dasendagsẽ.

¹¹ Tʋbr ninga fãa sẽn wʋm m goama da boond-m lame tɩ zu-noog soaba, nifr ninga sẽn yãenda maam ra pẽgdame.

¹² M da fãagda naong soab sẽn kot m sõngre, n paas kɩɩb bil sẽn ka tar teegda.

¹³ Sẽn kiid-ba kãab nooda ra lʋɩta m zugu, la m da kõta pʋg-kõap sũ-noogo.

¹⁴ M da yera sõmblem wa m fuugu, zemsgo n da ya m fuyorgo la m zu-vindga.

¹⁵ M da lebga zoeensa nini, n lebg wobs karse.

¹⁶ M da yaa nimbãan-dãmba ba, maam n da wegsd sãan yɛla n fãagd-a bʋʋd zĩigẽ.

¹⁷ M da kaooda sẽn dat-b n wãb b taaba yẽna, m da yaagda b noorã n gʋsg b sẽn da yõke.

¹⁸ M da yeta m menga: «M sã n wa kiid m gãagẽ, badaar la m na n le wẽneg n vʋʋge wa tɩɩga.

¹⁹ Kooma na ta tɩɩga yẽgna, yʋngo, menem na madg a vãado.

²⁰ M yʋʋra na le tus ne pãn-paalg n sãde, la m nugẽ, m tãpa na le rõos a gĩindi.»

²¹ Ned kam fãa ra maagda a meng n kelgdẽ. Ned kam fãa da reegda m saglgo.

²² M sã n da gom n sɛ, ned ka le yaagd a noor ye, b fãa da reegda m goama a yembr-yembre.

²³ B ra gũuda m leokr wa b sẽn gũud saaga, wa b sẽn gũud sigr saag sẽn kaoosd niibu.

²⁴ M da yõgemda m noor ne-ba, la b ra pa tẽed-m ne rẽ ye, la b ra kokda ne sũ-noogo, bũmb ning fãa sẽn ya kaseto tɩ m ket n dat-b-la ne neere.

²⁵ M da zĩi wa naaba n wilgd-b sore, m da zaoo wa rĩma, m tãb-biis sʋka, m tʋʋmd yaa sũ-sãang sẽn tar b rãmba belsgo.