A. Zoobe 28 - SEBR SÕNGO

Wẽnd yam zulung pẽgre

¹ Zĩis ka kongd sẽn na n tu bogdo n vaag wanzurf ye, sãnem yɩlgr zĩis ka baood n ka yãend ye.

² Kut tuuda tãngẽ n vaage, zũud yẽnegda kuga n sɩlge.

³ B widigda bugum n gaas tẽngã n zulgi, n ta zĩ-likẽ n buk kug sabla.

⁴ B zãagda neba sẽn kẽedẽ wã n wedg bogdo, zĩig ninga so-loaadba sẽn ka tatẽ wã, la boka pʋg la neb lengd wĩ zutu.

⁵ Tẽnga sẽn dɩlgd ninsaalã la bugum dɩ n sãam fãa.

⁶ Yaa kuga pʋg la b yiisd kug neeba, kẽeg yom, yaa bãmb zomẽ la b yãet sãnem.

⁷ Sɩlsa ka yãend so-kãens n dɩk ye, wɩbsa nif pa seg-b ye.

⁸ We-rũng naoor nan ka tab-b ye, bõnyẽeg zɩ n pɩʋʋg be ye.

⁹ Ninsaal zaba ne pĩ-kegemde. Ninsaal wura tãmse n tãag b seese.

¹⁰ B weeda pĩisi, n tuk soy, bɛd la bõonego la sẽn be yõod fãa ninsaal nif yãend-a lame.

¹¹ B kʋɩɩsda kʋɩls ko-nini, n yiisd sẽn da solg wĩndga.

Yam zulung sẽn beẽ

¹² La m na sok n gese, bãngr pidung yãeta yɛ? Yam sẽn pid yam zak tii yɛɛlẽ?

¹³ Ninsaal ka mi a yõod saagr ye, a ka be nin-vɩɩs sʋk ye.

¹⁴ Bʋg-tẽng yetame: «A ka be m nengẽ ye.» Tɩ mogr me yeele: «A ka be m pʋgẽ ye.»

¹⁵ A ka tõe n tek ne sãnem gilgu ye. Ka magd wanzurfu n da-a ye.

¹⁶ Ofir sãnem ka tõe n dɩk n mak-a ye, tɩ b pa gomd kug neeba buud toɛ-toɛ ye.

¹⁷ A yõod ka tek sãnem la nin-gɛtg rẽnd ye, a pa tek sãnem laok sẽn tekẽ ye,

¹⁸ tɩ b pa gomd kug-neeb la bõn-neeb a taab ye. Yam pidung baoob n são miuzãan neeba.

¹⁹ Nubi kug moam neeba yaa zaalem, sãnem yõod yaa bilf a taoore.

Yam pidungu yaa dũni Naanda soolem

²⁰ La m sok n gese bãngr pidung yita yɛ? Yam sẽn pid yam yãeta yɛ?

²¹ Nin-vɩɩg nif pa segd-a ye, yĩngr luiili pa yãet-a ye.

²² Bʋg-tenga, kɩɩmkulgu rãmba yetame: «A kibar bal n lʋɩ d tʋbrẽ.»

²³ Wẽnnaam b yembre bala n bãng a sore, la a menga sẽn beẽ.

²⁴ Yɩɩ wakat ninga b sẽn sulg n ges dũni wã zãnga, n ges bũmb ning fãa sẽn be saaga tẽngre,

²⁵ n na n sigs sobda pãnga, la b yãk toaag n kõ kooma.

²⁶ Yɩɩ wakat ning b sẽn wilg saagã a niib sasa la b tuk sor n kõ sawadga ne a bʋ-raasã.

²⁷ Yɩɩ wakat kãng la b yãend yã la b pẽg yam pidungu, wakat kãng la a bas tɩ b yãenda a sẽn tõe bũmb ninga.

²⁸ B yaool n yeela ninsaalba: «Soaala nif zoeese la bãngr sẽn pid bãngre, la yam sẽn pid yam la zãag f meng ne wẽnga.»