A. Zoobe 24 - SEBR SÕNGO

Zamaana rãmb yɛl kɛga

¹ Bõe tɩ Naaba-Wẽnd ka kees daar n bĩngi, yɛla sẽn na n puk nin-sõma nifẽ daare?

² Nin-sõma wã toaag kuga la nin-wẽnsa wat n teeme, wagdem dũms la kẽer deegd n teesd yamd zĩiga,

³ tɩ kẽer loogd ne kɩɩb-bil bõanga, tɩ pʋg-kõor naaf tat n tɩ kɩt bobelle.

⁴ Koms rãmba rigdame n yiis sorẽ, lebga tẽnga nimbãan-dãmba zoe n soond zãnga.

⁵ B lebga wa burguma sẽn be we-raoogẽ, tɩ b sãt beoog n sɩng rɩɩb gẽesgo, yaa pʋ-weesã n na n dɩlg b kamba.

⁶ A ka-neng-rãmb n na tɩ wʋr rũmsa yamdo, pʋtẽ, bãmb n na n tõs nin-wẽnsa bugsuntundu,

⁷ la yʋngo b gãe bɩlgemde tɩ b ka tar fuug ye, yaa waoodo, la b pa tar fu-goabg ye.

⁸ Tãmsa zut sa-mina-mina yʋgemda b fut, la rot ka ye, tɩ b kong n kẽed pĩis bogdẽ.

⁹ Kɩɩb bila tõsgda a ma bĩisrẽ, naong soab bobenda a fu-goabga tɩ b yaool n sak n peng-a bũmbu.

¹⁰ B kɩtdame t'a kẽnd a bɩlgemd waare, b zɩlgd-a-la ka-gĩna t'a yaool n kẽnd ne pʋ-vɩʋʋgo,

¹¹ b tãngd-a-la ne oliviye biis sĩm-bila t'a wõt b kaam, ka rẽ bɩ a yɛs rã-rʋgd sʋka tɩ ko-yũud kʋʋd-a.

¹² Tẽnga pʋgẽ b wʋmda yãbre, sẽn pogl b rãmba kũsga sãtame, la Wẽnnaam ka kũmd b nimbãaneg ye.

¹³ Sẽn maand-b wẽnga kisa vẽenem, vẽenem sor ka bãmb sor ye, b pa tagd be ye.

¹⁴ Zĩig sobg yã, tɩ nin-kʋʋd yiki, n na n kʋ naong soaba la nimbãan-neda, yʋng taame t'a na n tʋm wagdem tʋʋma.

¹⁵ Ra-taag me teega zĩ-sobdo, la a gomda a yamẽ: «Ned kõn yãend-m ye.» A takda peende n pil a nenga.

¹⁶ Yaa likẽ la wagdr pood roto. Wĩntoogo a ka yit a roogẽ ye, a ka mi meng tɩ sõor yẽegame ye.

¹⁷ Bãmb fãa gill yamẽ wã, sõora la yel-beedo, sẽn ta b yam yaa yʋngã la tʋʋm-beedã b sẽn tʋmna.

¹⁸ Yãmb yetame: «Tao tao tɩ koom peega nin-wẽnsã n looge, tɩ b tẽng lebg ka bark tẽnga. Ned kõn le yi t'a rabda a bugsuntungẽ ye.

¹⁹ Wala wĩndg sẽn boog waooda tẽnsẽ kooma, koom sẽn gũs wa ka-neema, yaa woto la nin-wẽnsa na n boog tɩ bʋg-tẽng yaag a noor vel-ba.

²⁰ B ma na yĩm b yelle la b na lebg mogd dɩ-noogo. Ned kõn le tẽeg b yell ye. Yaa wa b tiig n kʋʋsa tɩ-wẽnga wila.

²¹ Nim bãmba yikd n namsa paga, a sẽn ka rogd yĩnga, tɩ bãmba rãmb ka kũmd pʋg-kõor ye.

²² La ade, Wẽnd pãnga tõe n looga ne pãn-dãmba, b yikda ne bãmba tɩ b wẽneg n menem moogo.

²³ Wẽnd mi n bas-b lame tɩ b tẽed tɩ bũmb kõn tol n maan-b ye. Mik b nif ket n geta b sẽn tʋmde.

²⁴ Wat n yaa wala b na n le rooga b nenga, mik nenga na n le sulga wala puug sẽn zelgde, n wãk wala ka-zug sʋʋg sẽn kẽbge.»

²⁵ Ad-y m sẽn togsã n ya sɩda n yɩɩd y rẽnna. Da le bool-y-m tɩ pʋ-yags ye! Ãnda n na n tõog n lub-m ne a goama?