A. Zoobe 22 - SEBR SÕNGO

Ad ka zaalem la Zoob paam sɩbgr ye

¹ A Elifaz, Tema daoa, n wa ne a leokre:

² M sok n gese sẽn pida ne raooda sõngda Wẽnd wãn wãna? Ninsaal bãngr zulunga nafda ãnda sã n ka a meng bala.

³ Pãng soab a Wẽnd toog bee ne fo sõmblema? Bõe la f paasd Wẽnd ne f zʋga tekre?

⁴ B yɛɛsda-foom n na n gom n yiis b meng yellẽ bɩ? Foo n na n lebg b bʋʋd-n-taag bɩ?

⁵ Sã n ya sɩda, f tʋʋm dẽgda labsa. F yɛl kɛga ka tar tɛk ye.

⁶ Fo ra reesda boabla f saam-biisa nengẽ, fo reesa b fut n bas-b tɩ b kẽnd bɩlma.

⁷ Ko-yũud sẽn tar a soaba kõn paam koom f nengẽ ye, kom sẽn tar b rãmba, fo mongd-b-la rɩɩbo.

⁸ Fo sẽn tar pãngã, fo n da so tẽngã, Wẽnd sẽn maan-f zu-noogo, f reega tẽngã n yãmbe.

⁹ Pʋg-kõapa waa fo bõsgo tɩ fo kʋls-b zaalem, la kɩɩb-bi wã nus yɛɛ ne f tʋʋma.

¹⁰ Yaa rẽ yĩnga la b karg bẽdgo n gilgi-fu, tɩ f mi n yik n tar digbu.

¹¹ Wakat ninga yaa lika, tɩ fo ka le neẽ ye, wakat ninga yaa ko-kẽeng n loogd ne-fo.

A Zoob ka rat n deeg ye

¹² Ade, Zoob, yaa woto la f tagsda: Wẽnd ka tʋg n be al sagãnẽ wã bɩ? Ges ãdsa zĩiga sẽn zãr ne tõndo.

¹³ Bãmb sẽn tɩ be yĩngrã la f yeel yã: «Wẽnd mii bõe, b nif tõe n yãe sẽn be sawad-sablga poor sɩda?

¹⁴ Bala sawatã tagma wʋsgo n lut b nini. Yaa saaga sẽn karg n gilga bal la b ne.»

¹⁵ Fo rat n tũu kʋdem-wẽnnẽ sorã, sor ninga nin-wẽng fãa sẽn da tũuda laa?

¹⁶ Bãng tɩ b looga ne-ba tɩ b daar nan pa ta ye, b ra zaoolga b meng ko-zoetem zugu.

¹⁷ Bãmb sɩd da gomda ne Wẽnd woto: «Zãag y ne tõndo.» B goma woto n tẽed tɩ Wẽnd-Pãng-Soaba ka tõe n maan-b bũmb ye.

¹⁸ Maam, a Elifaz ka tõe n sak bada tɩ nin-wẽnsa gom wa b sẽn gomda ye, tɩ Wẽnd n da yaool n pids nin-wẽnsa zagsã ne sũ-noogo, B yik n zãag ne b zirẽ-be-goama!

¹⁹ Nin-tɩrsã na n kɩdma sũ-noogo b lʋɩɩsa yĩnga. Pʋ-peelem soab na n laa bãmb n yetẽ:

²⁰ «D bɛɛba konga pãnga bugum n dɩ b paoongã tẽma!»

Zems-y taaba, foo ne Wẽnde

²¹ Maneg f yell ne Wẽnde, tɩ sɛ, woto f sũur na le yɩ noogo.

²² Kok b zãmsga sẽn yit b noorẽ, deeg b koees n ning f sũurẽ.

²³ Fo sã n lɛɛg n le kẽ Naaba-Wẽnde, la f kɩt tɩ zãmb buud fãa zãag ne f zaka, na zemse.

²⁴ Tɩ lob f sãnem gila tomẽ, lob Ofir sãnem gila kʋɩlga koomẽ.

²⁵ Naaba-Wẽnd na lebg sãnem neere fo yĩnga, n lebg wanzurf baoor fo yĩnga.

²⁶ Dẽ la Naaba-Wẽnd na n pids-f ne sũ-noogo. Dẽ me la f na n doog f nenga n ges Wẽnd-Pãng-Soaba.

²⁷ F sã n bõs-ba, b na reeg f kosgo, tɩ fo me tũ rẽ n pids f pʋlengo.

²⁸ Fo sẽn sed fãa na baas neere, la f sor na yɩ vẽenega f taoore.

²⁹ Neb kẽer sã n bas raoodo, f na tõog n yeel-ba: «Yik-y!»

³⁰ Bãmb n doogd neng fãa sẽn sũuri. Ba yell sẽn be b rãmb zuga na n paama fãagre. B nug sẽn pa rat sɩbgrã n na n wa ne tɩlgre.