A. Zoobe 20 - SEBR SÕNGO

A Sofar leokr a yiib soaba

¹ A Sofar, Naama daoa, n deeg gomdã n yeele:

² M tagsame la m dat n leok-f lame, m yãgdame n na n yiis m sẽn mi.

³ Gomd la m wʋm yã, sẽn yɩ m tʋʋre, la ad-m yama sẽn kõt-m tɩ m leoke.

⁴ Fo zɩ tɩ al zamaan woko, Wẽnd sẽn ning ninsaal tẽng zug tɛka,

⁵ fo zɩ tɩ nin-wẽng zu-noog kõn yɩ woko? Nin-wẽng sũ-noog ka longd daar ye.

⁶ Ba a zuga woglem tõkd saaga, ba a zug sɩɩsd sa-gãongã,

⁷ a na menema wa rẽgdo, b kõn le bao a zĩig ye, tɩ sẽn da mi-a sokdẽ: «A kẽe yɛ?»

⁸ A menemda wala zãmsdo, ãnd n na n le yãend-a? A sẽn yɩ pɩʋla, tɛk la tɛka.

⁹ Nif sẽn minem a yãeebo kõn le yãend-a ye, a zaka meng ka mi a sẽn tɩ solgẽ ye.

¹⁰ Na yɩ modgr ne a kamba tɩ b lek naong rãmb sãoogo, a meng nus n na n vaag n kõ a taaba.

¹¹ Ba a yĩnga kõabã nan ket n kegmẽ, n ket n kegmẽ wala bi-bɩɩg rẽnna, fãa naagdame n bus tomẽ.

¹² Wẽng da yaa wa sɩɩd a noorẽ, dẽ la a ra wukda a kokoɛ

¹³ n mogsd a noosma, n ka tol n vʋʋsdẽ ye,

¹⁴ mik a rɩɩba na n põoga a pʋgẽ, n lebg wag-toaag zẽnem.

¹⁵ Lebga modgr tɩ laoga sẽn da wʋk n sama, yiis n pʋɩ. Wẽnd na kɩtame t'a wʋk-a.

¹⁶ Yaa põeer zẽnem la a ra mogsd n venda, põeerã noor n na n lɛɛg n kʋ-a.

¹⁷ A nif kõn le yãend kʋɩlsa ye, a kõn le yãend a kʋɩlsa sẽn fõt ne sɩɩd la bĩisim ye.

¹⁸ A sẽn paam n ka tõe vel la a wʋkda, a sẽn leeb n paama fãa, a kõn dɩ b yõod ye.

¹⁹ A sẽn wẽg naong rãmba la a pa ges b yellã, a sẽn zãgs meebo n zuud dot n kẽedẽ wã,

²⁰ a pʋga sẽn sak yão-beed yĩnga, a laog ba a ye kõn põs ye.

²¹ Bũmb ba a ye sẽn da ka põsd a velma a sũ-nooga kõn kaoos ye, t'a meng n vel fãa vugri.

²² Tɩgr wẽnde, kom na n kẽe a zaka, nimbãan-neba nus na n naaga taab n kud-a.

²³ A sẽn ket n baood n na n pids a pʋga wakato, la Wẽnd sũura na n fudg ne-a. Sũura sẽn fudg n daagã n na n wẽneg n waag-a.

²⁴ Yaa kut zab-teoog la a zoet n na n põse, yaa zũud tãp n na n lub-a.

²⁵ A takda pĩima n feoog a lʋgrẽ, la pĩima sẽn yi sãoorẽ wã lebga waood la rigbu.

²⁶ Lik na n yãmba a rooga pẽgs zãnga, Bugum n dɩt-a t'a yaool n ka ne a tugund ye; sẽn pa a rooga pʋg fãa lebga bõne.

²⁷ Yĩngr dãmba puka a beegrã, tɩ tẽng zug rãmb yik ne-a.

²⁸ A rooga sẽn da pid ne paoong ninga fãa loogame, wala koom sẽn fãood ne pãnga n tees a teesgo.

²⁹ Ade, Wẽnd donda nin-wẽng fãa woto, woto la pʋɩɩr a sẽn paamd Wẽnd nengẽ.