A. Zoobe 2 - SEBR SÕNGO

A Zoob bãaga

¹ Daar a ye n le zĩndi tɩ sẽn balemd-b Wẽnda le seg taab Naaba-Wẽnd zãongẽ wã, tɩ Bɛ wã me tũ n wa t'a me na n wilga sẽn be.

² Wẽnnaam soka Bɛ wã: «Fo yita yɛɛne?» T'a leoke: «Maam gõ n gilga moogo n lɛɛg n watẽ.»

³ Tɩ Wẽnnaam leok-a: «Fo tẽeg n gesa m sõgna a Zoob bɩ? A ka tar a to moog ye: a yaa nin-tɩrga, ned sẽn ka tar a toorẽ yelle, n zoet Wẽnde la a zãag a meng ne wẽnga. A kell n pa-la a pʋ-peelma zugu la yaa zaalem la f tõg-m tɩ m fɛɛs-a.»

⁴ La Bɛ wã gõgnemame n leoke: «Yõor la gɛla; ninsaal sẽn tar fãa, a kɩt-a lame n fãag a yõore.

⁵ Dɩlla y sã n tẽeg y nugu n sɩɩs a yĩnga kõaba la a yĩnga nemdo, m mii vẽenega t'a na tʋʋs yãmb.»

⁶ Tɩ Wẽnnaam leok Bɛ wã: «Be neere, a Zoob yɛla fãa be-la f nugẽ, fo yee n da sɩɩs a vɩɩma!»

⁷ Bɛ wã yik n looga Wẽnd taoore. A loba a Zoob yĩng bãaga, sɩnga a nao-pʋga n ta a zug tẽnsʋka.

⁸ A Zoob kong n dɩka sa-pɛɛga n wurd a yĩnga, la a tɩ gãe tampʋʋrẽ.

⁹ Dẽ la a paga yeel-a: «Fo na n kell n vɩɩnda wa ned sẽn ka tar zʋga bɩ? Ges n yaa n tʋʋs Wẽnnaam la f ki!»

¹⁰ La a Zoob leokame: «Fo gomda wa yam kɩdg soaba; tõnd sã n deegd sũ-noog Wẽnnaam nengẽ, bõe yĩnga la d ka na n deeg sũ-sãang me boto?» Ne a yɛla sẽn yɩ a soab fãa, a Zoob ka tol n tʋʋs Wẽnnaam a goamẽ ye.

A Zoob zo-rãmba

¹¹ La yɛl kãensã fãa wa n lʋɩ a Zoob zo-rãmba a tãab tʋbrẽ, la ned kam fãa yi-la a tẽngẽ n wa: yaa, a Elifaz, Tema raoa, a Bildad, Suwa raoa, la a Sofar, Naama raoa. B sega taaba n yet tɩ b na n tɩ kũma a Zoob la b maas a sũuri.

¹² B tool n gesa a Zoob yɩɩga la b ka le bãng-a ye. Tɩ b sɩng yãbre. Ned kam fãa pãrga a fuugu la a wʋka tom n lob yĩngr t'a lɛɛg n dʋʋg a zugu.

¹³ Dẽ poore b zĩnda tẽnga, a sɛɛgẽ, la b paa ne-a dasem a yopoe, wĩntoog la yʋngo. La ned ba a ye ka tõog n yaag a noor n gom ne-a ye, a namsga toolem yĩnga.