A. Zoobe 13 - SEBR SÕNGO

Ned kõn belg Wẽnd ye

¹ Ad-y m nif yãee woto fãa; tɩ m tʋbr wʋme, tɩ m yam deege.

² Yãmb sẽn mi bũmb ningã, mam me mii rẽ, y yama ka yɩɩd-m ye.

³ La yaa ne Wẽnd-Pãng-Soabã la m dat n gome; mam dat n goma ne bãmb n yiis m meng yellẽ.

⁴ Yãmb yẽ, yaa tã-met faado, yãmb yaa m-bũmb-ka-zabd tɩɩm kõatba.

⁵ Ãnna n na n yaa n mum y noorã, tɩ y bãng yam?

⁶ Yoog-y y tʋbre n kelge, tɩ m gom n yiis m meng yellẽ Bɩ y tʋba kelg m noora gomde.

⁷ Yaa Wẽnd yʋʋr yĩng la y gomd n tuut neb bɩ? Yaa Wẽnd sõngr yĩng la y yelgd zirẽ-beed bɩ?

⁸ Yaa Wẽnd bʋʋda sẽn yɛs bũmb ninga zugã la y wat ne y sõngra bɩ?

⁹ Wẽnnaam maag b menga n vɛɛs y pʋga na zems y yĩnga? Y tẽed tɩ y na paam n la bãmb wala y sẽn laad ninsaala?

¹⁰ Ad-y b na waa n zab ne yã tɩ y soos n kẽe a zagl n bas a zagla.

¹¹ Wẽnd ziira ka yɛɛsd yãmba? B ka kẽesd yãmb dabeem?

¹² Y sẽn gãd bũmb ning n tarẽ wã yaa tompɛglem bala, y sẽn dat n lill bũmb ning n paam n goma, yaa tãnd la boll bala.

¹³ Bɩ y sĩnd y noor marsã tɩ maam n na n gome: sẽn na n yɩ a soaba, bɩ yɩ!

¹⁴ Ba sã n na n tũu ne m yõore, mam me na gãd m sẽn gãde.

¹⁵ M mii vẽenega tɩ b na n kʋ-m lame, põasg ka ye. Baasgo, bãmb taoore m na gom n wilg m bʋʋma sẽn beẽ.

¹⁶ Dẽ meng n na n wa ne m fãagre, tɩ m ka tarẽ pʋ-peelem m kõn sak n kolg bãmb ye.

¹⁷ Kelg-y, kelg-y mam goama, wʋm-y m sẽn na n togs bũmb ninga võore.

¹⁸ Ade, mam kosame tɩ b kẽes-m bʋʋdo, la m miime tɩ maam n na n paam bʋʋm!

¹⁹ Ãnna soaba n na n yɩ m bʋʋd-n-taaga? M sã n kong bʋʋm, m saka m na n sĩndi, m na ki menga.

Kosgo

²⁰ M Wẽnnaama zãag-m ne bũmb a yiib bala, tɩ m kõn bao n le solg m meng yãmb taoor ye.

²¹ Zãag-y-m ne y sɩbgr buud fãa. Da yɛɛs-y-ma, da kẽes-y-m dabeem ye.

²² Sɩng-y bʋʋdo, tɩ m na yãe koɛɛg n leoke; la ma me sã n gome, bɩ y leok-ma.

²³ M beega naoor a wãna? M yel-wẽna sõor yaa a wãna? Wilg-y y noor m sẽn tõdge, wilg-y m sẽn kong ne bũmb ninga.

²⁴ Bõe tɩ y solgd y nenga? Bõe tɩ y get-m wa y bɛyã?

²⁵ Y na yɛs n gũusd vãoog sobg sẽn laande, la y rigd mo-paoko?

²⁶ Y na wɩɩg n kao m bʋʋda toaag-toaaga n le kẽesd sʋka beegr sẽn beeg al m yãadmẽ?

²⁷ Bõe tɩ yãmb n dat n sog m nao rabõanga, Bõe tɩ y baood n bãng m sẽn mand fãa, n pʋgd n dɩgsd m nao-kẽndre?

²⁸ Mam vɩɩma ka besd n sʋʋgd a toore, wa yõgdr sẽn sʋgd daoogo, bɩ bugd sẽn kʋʋd fuugu bal bɩ?