A. Zoobe 1 - SEBR SÕNGO

Yel-beed lʋɩta a Zoob zugu

¹ Ned n da be Us tẽnga, t'a yʋʋr boond t'a Zoob. A ra yaa nin-tɩrga, ned sẽn ka tar a toorẽ yelle, n zoet Wẽnd la a zãagd a meng ne wẽnga.

² A roga kom-dibli a yopoe, la kom-pugli a tã.

³ A ra tara piis tus a yopoe, yʋgma tus a tã, niis tusri, n paas bõan-yãans kobs-nu; a zak neb ra yaa wʋsg-wʋsgo. Nin-kãnga n da yɩɩd a taaba Yaang kẽedba sʋka.

⁴ Ade, a kamba da mi n kẽnd n maanda kibsa ned kam fãa yiri, ned fãa ne a daare, la b mi n boonda b tãop a tãabã tɩ b wat n dɩtẽ la b yũud ne bãmba.

⁵ La b sã n mi n wa maan kibs rãmba n gilg b zags fãa n sege, b ba, a Zoob, da boond-b lame n yɩlg-ba tɩ b lebg sõma. Woto wã, vẽkembeoogo, sõor pukri, a ra kʋʋda yũ-noog maoongo bãmb ned kam fãa yĩnga. Bala a da tagsda a yamẽ: «Daar ninga mam kamba maana yel-wẽnde, n beeg Wẽnnaam b sũurẽ.» Yaa woto la a Zoob da maand wakat fãa.

⁶ Daar n zĩndi tɩ sẽn balemd-b Naaba-Wẽnd wa seg taab Naaba-Wẽnd zãongẽ n na n wilg yɛla sẽn be zĩig ninga tɩ Bɛ-kʋdga, Sʋtãana, me tũu n wa.

⁷ Dẽ la Wẽnnaam sok-a: «Fo yita yɛ?» T'a leoke: «Mam gilga moogo n lɛɛg n watẽ.»

⁸ Tɩ Naaba-Wẽnd leb n sok-a: «La fo yãenda m sõgna a Zoob bɩ? A ka tar a to moog ye: a yaa nin-tɩrga, ned sẽn ka tar a toorẽ yelle, n zoet Wẽnde la a zãagd a meng ne wẽnga.»

⁹ Dẽ la Bɛ-kʋdga gõgneme n leoke: «Yaa zaalem t'a Zoob zoet Wẽnnaam nifu?

¹⁰ Yãmb ka wẽ yãgr n gũbg a menga, a zaka la a soolma fãa wɛ? Y ninga a tʋʋm fãa barka, a rũmsa yẽnegda tẽnga pʋtẽ.

¹¹ La yãmb ye n tẽeg y nug n sɩɩs a paoongã, m mii vẽenega t'a na tʋʋs yãmba.»

¹² Wẽnnaam yeela Bɛ wã: «Dẽ ka yell ye, a paoongã, fãa be f nugẽ, gũus bala n da sɩɩs a meng ye.» Tɩ Bɛ wã yik n loog Wẽnnaam taoore.

Yɛl niyns sẽn pak a Zoob

¹³ Daar a ye, a Zoob kamba da rɩtame la b yũud, b kẽema yiri.

¹⁴ La ned a ye n wa a Zoob nengẽ n wilg-a: «Fo niisa da koodame, tɩ bõan-yãansa da wãbd yamdo pʋʋga noorẽ.

¹⁵ Saba fãadb kell n wa kʋʋ nebã n loog ne rũmsã; maam m ye tãa bala n põse n zoet n na n wa togs fo.»

¹⁶ Yẽ sẽn nan ket n gomda, la ned a to sẽn wa, n yeele: «Ad Wẽnnaam bugum yii yĩngri n lʋɩ; a yõoga fo piisã la f nebã, n dɩ-b zãnga. Maam m ye tãa bala n põse, n zoet n na n wa togs fo.»

¹⁷ Yẽ soaba ka paam n gom n sɛ ye la ned a to sẽn wa n yeele: «Kalde rãmb sẽn welg sags a tãabo zoe n kẽe rũn-kɩɩmbã n kʋ-ba, n loog ne yʋgma wã. Maam m ye tãa bal n põse n zoet n na n wa togs fo.»

¹⁸ Yẽ sẽn da ket n gomda la ned a to sẽn wa n yeele: «Fo kom-dibli la f kom-pugli da bee b kẽema yiri n dɩtẽ la b yũuda,

¹⁹ la sob-kãseng sẽn yi we-raooga yaanga waa n zũndga zaka kɩrems a naasã t'a lʋɩ n buug kambã n kʋ. Maam m ye tãa bala n põse, n zoet n na n wa togs fo.»

²⁰ Dẽ la a Zoob yik yã, n pãrg a fuugu, n põng a zugu; dẽ poore, a lʋɩɩ tẽnga, a yãnvabga

²¹ n yetẽ: «Mam yii m ma pʋgẽ bilemde, mam na n leba bilemde. Wẽnd da kõome, Wẽnd le reegame. Bãmb yʋʋr paam pẽgre.»

²² Ne yella sẽn yɩ toog ne-a wã, a Zoob ka maan wẽng ye, a ka tʋʋs Wẽnnaam ye.