A Zonaase 4 - SEBR SÕNGO

Bũmb ning sẽn wat ne Wẽnd sugri

¹ Sugra kũuna ka ta a Zonas yam ye t'a wuk ne sũ-puuri.

² A maana pʋʋsgo n yeel Soaala-Wẽnd woto: «Naaba-Wẽnde, yell a woto la m ra sãmbd m yamẽ rẽ tɩ m ket m ba yiri! Yaa rẽ yĩng la m da pĩnd n zoe n kẽng Tarsis; m da miime tɩ yãmb yaa Wẽnd sẽn tar nimbãan-zoeer la nonglem, n ka puugd y sũur tao tao ye, n lebsd y zelemd sẽn yiisi tɩ sɩbgra vaanẽ.

³ Marsã, Soaala-Wẽnde, bɩ y yãk m yõore tɩ mam kũum são m belem.»

⁴ Tɩ Soaala yeel-a: «Yaa bõe yĩng la fo puugd f sũur woto, fo bee bʋʋm bɩ?»

⁵ A Zonas yaool n yii tẽngẽ wã n tɩ zĩi nin-taoore n get-a. A tii sẽgd roogo n kẽ n zĩnd. A ra gũuda tʋʋmd bʋgo la Soaala na n tʋm ne Niniv rãmba.

⁶ Soaala-Wẽnd kɩtame tɩ tɩɩg sẽn tar woglem la maasem tão n yi sẽn na n yɩlẽ n kõ a Zonas maasem la b woog a sũ-sãangã. A Zonas paama rẽ n noog a sũur wʋsgo.

⁷ La vẽkembeoogo yibeoogo Wẽnd kɩtame tɩ zũnzũur kẽ tɩɩga t'a kʋɩ.

⁸ La sõor sẽn yeege, Wẽnd kɩtame tɩ yaang sob-tʋʋlg yiki; wĩntoog yõoga a Zonas zugu t'a ra na n sobgẽ. A Zonas le boola kũum n yetẽ: «Mam kũum n são m belem.»

⁹ Naaba-Wẽnd soka a Zonas: «Fo sẽn puug f sũur, tɩɩga sẽn ki wã poorã, fo bee bʋʋm bɩ?» T a leoke: «N-ye! Mam sũur sɩd puugame; mam kũum bala n são.»

¹⁰ Tɩ Wẽnd na n leoke: «Fo yãbda tɩ-kãnga kũuma, fo yaool n ka maan bũmb a yĩng ye, ka foo n kɩt t'a yi ye. A tãoo n yii yʋn-yende, a le kii yʋn-yende.

¹¹ Fo ratẽ lame tɩ m da zoẽ Niniv nimbãanega? Ad Niniv yaa tẽn-kãsenga, a kẽedba taa tus koabg la pisi! Neb be-la a pʋgẽ sẽn ka tar b toorẽ yelle n le paas rũms ka tɛka.»