A Zonaase 3 - SEBR SÕNGO

A Zonas ne Niniv rãmba

¹ Soaala-Wẽnd gomda le ta-la a Zonas la b yeel-a lame:

² «Yik n kẽng Niniv tẽn-kãsengẽ n togs mam sẽn yeel fooma!»

³ A Zonas sakame n yik marsã n kẽng Niniv. Tẽnga da yaa tẽn-kẽenga, sã n ya ne nao, dasma tãab la f gilgd a n segre.

⁴ A pipi raarã a Zonas ra kẽndame la a moonẽ: «Keta dasem pis-naas bala tɩ Niniv rota wã.»

⁵ Niniv neba tẽe Wẽnd gomdã. B yalsame tɩ b na n loe b noore la b nin-bɛda wala a ka-neng rãmba fãa yeelga sũ-pa-noang futu.

⁶ Niniv dĩma sẽn wʋm gomdã, a siga a zaoorẽ, n yeeg a naam fuugu, n yeelg sũ-pa-noang fuug n tɩ zĩnd tompɛglmẽ.

⁷ Dẽ poore dĩma kɩtame tɩ b moon tẽnga pʋga n yetẽ: «Dĩma ne a kug-zĩidba datame tɩ ninsaal bɩ rũng da rɩ la a ra yũ bũmb ye.

⁸ Ninsaalba la rũmsa na n pila sũ-pa-noang futu. Ned kam fãa kos Wẽnd ne a sũuri la a bas tʋʋm wẽna la pãn-tõogo.

⁹ Ãnda n mi Wẽnd sã n ka na n teeme, n le kʋ b sũuri, n sik b sũ-puurã tɩ d da ki?»

¹⁰ Wẽnnaam sɩd yãeeme tɩ b sɩd maanda b sẽn tõe n na n bas b zʋg wẽnga. Rẽ yĩnga Soaala-Wẽnd basa b zugẽ yɛla taale n ka pids b sẽn da yeela ye.