A Titi 1 - SEBR SÕNGO

Sebra soaba la a pʋʋsgo

¹ Maam a Pol n pʋʋsde. M yaa Wẽnd sõgne; m kẽe a Zezi Krista tʋʋmde n na n sõng tɩ Wẽnd sẽn welg b rãmb toorã paam tẽebo. B paam n bãng sɩda n lebg wẽn-pẽgdba.

² B paam vɩɩm sẽn kõn sɛ saagre me. Vɩɩm kãng la Wẽnd sẽn ka mi zirẽ-beeda ra kãab tõnd al tɩ dũni nan ka naan ye.

³ B wakata sẽn ta, b pidsa b kãabgã ne b Koe-nooga moonego la maam la b kõ noor tɩ m maan tʋʋm-kãnga.

⁴ Dɩlla yaa maam a Pol n pʋʋsd a Tit, m bi-roak meng d fãa tẽeba pʋgẽ. Bɩ Wẽnd Ba nimbãan-zoeere la b laafi tũ Krista a Zezi, tõnd Fãagdã, n sig f zugu!

Kãsem-dãmb tũusgu

⁵ Mam sã n bas foo Krɛt tẽnga yaa sẽn na n yɩla tɩ f yõdg n sigl Tigenga n baase la f ning kãsem-dãmb tẽng-tẽnga wa m sẽn wilgi.

⁶ Kãsem-dãmba togame n yɩ neb sẽn ka tar yell b zugu; sã n ya kãadma, b kẽe-a la vugr bala la b kamb yaa tẽedba; b pa tõe n dõd-b ne wẽng ye, la b mii sakre.

⁷ A sẽn ya Wẽnd zag-gũuda, kãsem-soab tog n yɩɩ nin-tɩrga; a ka mi porbo, a ka mi zẽk-m-menga, a ka mi sũ-puuri, a ka rã-yũuda, a ka baood zaba, a ka baood arzɛk ne zãmb ye.

⁸ A mii gãag-sobendo, a nong n maana neere, a ka mi pir-pir ye, a mii zemsgo, a yaa wẽn-pʋʋsa, a tõe-la a menga.

⁹ A modgdame tɩ bũmb ra keoos a zãmsga pʋgẽ ye, a zãmsga tũudame. A tog n tõogame n sagl sagl tɩrse, n tõog n ning kɩɩsdba yãnde.

Zabr ne zirẽ-be-karen-saam-dãmba

¹⁰ Neb wʋsg n be, la bãnkomsa sʋk la b be n yɩɩda, n ya tõatba, gom-faad-dãmba, la no-noom-dãmba.

¹¹ Da bas-b tɩ b gom ye. Yaa neb sẽn wãad b taab roto, n togsd sẽn pa sõmbe n na n paam n dɩ bala.

¹² Woto la b bãngd meng a ye togsd b poorẽ: «Krɛt tẽng rãmba, zirẽ-be-neb wakat buud fãa, ninsaan-yoodo, dɩt-n-pa-tʋmnẽ-dãmba.»

¹³ B bãngda toagsg yaa sɩda. Dẽnd yĩnga, togs-y bãmb vẽenega tɩ b ra bʋdg n bas tẽeb sɩdã.

¹⁴ B lak n bas Zʋɩf rãmba ne b soalma, n lak n bas sẽn wẽnemd-b kãar n tees sɩdã.

¹⁵ F ya pʋ-peen-neda, f yɛla fãa tũuda pʋ-peelem sore; f sã n ya nin-dẽgdo la f pa tar tẽebo, bõn-sõng me kõn zĩnd f yĩng ye. B yama la b pʋga zãng sobame.

¹⁶ B yetame tɩ b yaa neb sẽn mi Wẽnde, la bãmb meng n lɛɛg n kɩɩsd-b ne b vɩɩm: ad-y b yaa nin-yoodo, tõatba, neb sẽn ka tõe n maan bõn-sõng ba bilfu.