A Salmo yɩɩla 5 - SEBR SÕNGO

*(Raoã)

¹ M wata m zẽedẽ wã, m tão sõngo, m wat n na n tõsa bi-sõma, biis sẽn tar yũ-noogo, m wat n na n dɩ-la m sɩɩdo, m sɩ kaam, m wat n na n yũ m rãam la m bĩisim. Wã-y n dɩ-y yã, m zo-rãmba, la y yũ, la y tɩgs y meng ne nonglem.

*(Yɩɩn-yɩɩndba) *(Pagã)

² M da gõeeme la m sũura pa gõe ye. M wʋmda m zoa sẽn kabsde n yetẽ: «Pak m wɛ, m zoodo, m tão sõngo, m noanga, pak-m wɛ, dog ne neerem soaba! M zuga mada ne meenem, m zobda tosda yʋng meenem.»

*(Raoã) *(Pagã)

³ La m zĩnda pʋgẽ n leok-a: «M zoe n yeega m fuugu, m ka na n le yeelg-a ye. M zoe n peka m nao, m ka rat n le rẽgem-b ye.»

⁴ M zoa tʋma a nug kʋɩlenga võorẽ tɩ m pɛleng yɩke.

⁵ Tɩ m yɩk tɩ m na n pak-a tɩ ka-sõngã m sẽn zɛ wã na n kao wa tʋʋlgo n mad kʋɩlenga pagdga.

⁶ M pakame tɩ m noanga kẽ, mik a lɛɛg n zoeeme. M yama bondgame. M yii n pʋg-a lame m baoo-a lame la m pa yãend-a ye, m bool-a lame la a pa leok-m ye.

⁷ Sẽn gũud-b tẽnga seg-m lame, sẽn kargd b tẽnga yʋngã seg-m-la lal-gũbra zugu, B pãb-m lame, b pogl-m lame, b tol deega m bãg-paagã.

⁸ M tar y sɛɛga, Zerizalɛɛm kom-pugli, y sã yãenda m noangã, bõe la y na n leok-a? Leok-y m noangã tɩ m sũur bẽedame, tɩ nonglma yik-m-la bãaga!

*(Yɩɩn-yɩɩndba gomda ne pagã)

⁹ Fo zoa wã tara bõe n yɩɩd a taaba? Dog ne neerem soaba, fo zoa wã tara bõe n yɩɩd a taaba tɩ f yõkd d sɛɛga?

*(Pagã)

¹⁰ M zoa wã neng yaa rasãng nenga. Rasãmb tusr lagem taaba, tɩ yẽnda lʋɩ b taoore.

¹¹ A zuga yaa wa b bolga sãnem sẽn yɩlge. Zobda gila wa ga-bi sabla, n lob sabl wa salsang kõbdo,

¹² A nina yaa wa kʋɩl-wall dẽnna, kʋɩl-wall sẽn be koom noore, kʋɩl-wall sẽn pelg wa a soo bĩisim.

¹³ A yɛɛma tobda wa googo, tɩɩs sẽn tar yũ-noog googo. A no gãnda pɛɛla wa lɩɩng puugu a noora sɩlgda noogo.

¹⁴ A nusa pida ne sãnem zũya la kug neeb kagse. A pʋga yaa pɛɛlg wa goore, n pɛ muizãan kẽega.

¹⁵ Karga yaa wa kugr la b pees yã tɩ nao wã ya waa b rõoga sãnem. A sẽn wẽnd yaa Libã kʋka, ka be taar ye.

¹⁶ A goama yaa gom-noodo, a bũmba fãa tara yamleoogo. Ad-y m zoa wã yaa woto, ad-y m noãnga yaa woto, Zerizalɛɛm kom-pugli.