A Salmo yɩɩla 4 - SEBR SÕNGO

*(Raoã)

¹ Ad-f be neere, m zoodo, ad-f sɩd be neere. Peenda ludame n bas nina yɩnga. Põeer-bi-yooll bala n tar f neerem. Zoobda yɛdga f poore n zẽkdẽ la b sigd wa bʋʋs sẽn dʋʋd Galaad tãnga, n kũudẽ la b roogdẽ.

² F yẽna pelga wa piis sẽn wors paalem la sẽn so koom. Yẽna fãa be-la b zĩisẽ, ned kam fãa tara a pak-n-taaga.

³ F no-ganda moosem: gĩs miuugu rẽnna, f zelemda yaa bõn-neere. F yɛga nukda f zug peenna.

⁴ F yubla yaa rog-roge la bũmb ninga sẽn kolg-a ne neerem, ya-la a Daviid gasgo sẽn me ne kug gilsi. Gãong woo sẽn yagl n gilga na ta tusri, la yaa tãb-biis sẽn pa yɛɛsd-d bũmb dẽnna.

⁵ F bĩs a yi wã, bãng bulli a yiibu bãng yĩsr kamb a yi sẽn wãbd yamdo lɩɩns pʋ-wɛɛgẽ.

⁶ M na n tũu zaabr pems maasga, tɩɩsa sẽn wat n takd b sulunsugdã, tɩ m dat n wa rʋʋ tãmsa la kunkubã sẽn wulumd ne gondreyẽoog yũugu, n wulumd ne tɩdar yũugu.

⁷ Fo yaa neer zãnga, m zoodo, bũmb-bulen-buug ka paoog-f ye.

⁸ Yi Libã n wa, m zoodo, yi Libã n wa ne ziiri. Sig Amana n wa, sig Senir la Ermo n wa, zãag f meng ne bõnyẽes la ãbs tãmse, n wa.

⁹ Ad-f nifr kamsg bala la m sũura sẽn tosd kaam, m zoodo. Ad sãnema pãneng sẽn luund f kokorã loet-m-la f soolmẽ, wa b sẽn loet bi-bɛɛga ne bãn-kagbre.

¹⁰ Fo nonglma pids-m-la ne sũ-noogo; m zoodo, m tão sõngo, fo nonglma pids-m-la ne sũ-noogo, sẽn yɩɩd dãam sẽn wat ne a soabã. Yũ nood niyns fo sẽn dɩk n zɛ f nenga noom-m lame n yɩɩd kaam buud fãa.

¹¹ M zoodo, ad-f noora goama yaa wa sɩ-kaam; sɩɩd la f rɩɩbo, bĩisim la f koom, f futa yũug yaa Libã rẽnna.

¹² M zoodo, ad-f yaa wa zẽedo sẽn gũbg yãgre, m tão wã yaa wa zẽed sẽn gũbg neere. Yaa bulg sẽn page.

¹³ Zẽeda yaa tẽn-noogẽ zẽedã, n tar bʋgsem, n womd a pooloomse, tɩ-biis sẽn sakd diibo. Tɩ-puuda me yelgda b yũugu.

¹⁴ Tɩɩg fãa ne a yũ-noogo: wala yulunyuug rẽnna, gondreyẽoog rẽnna, tɩdar dẽnna, naglɛng rẽnna, wisao rẽnna, ka-noog fãa sẽn tar n zɛɛd yĩng rẽnna.

¹⁵ Fo kooma bunda a toore, n zãgsd zẽedã, a bunda a toore n sigd Libã tãnga.

*(Pagã)

¹⁶ Goaabg sobdo, yik-y, rɩtg sobdo, zoe-y n wa-y. Bui-y m zẽedã t'a tɩɩsa yũug yãng tɩ m noang wa kẽ n dɩ a tɩ-nood biisi.