A Salmo yɩɩla 2 - SEBR SÕNGO

¹ Mam yaa Sarõ bãg-faagẽ puugu, mam yaa bãg-faagẽ lɩɩnga.

*(Raoã)

² M zood bee kom-pugli a taaba sʋka, la a yaa wa lɩɩnga sẽn be pulgumd sʋka.

*(Pagã)

³ M noanga, fo yẽ bee kom-dibli a taaba sʋka wala tɩ-yõodo sẽn be tɩ-yaals sʋka. M zĩ-la m tɩ-nongra maasmẽ n tar a bi-moaama rɩɩbo la b yaa noog m zelemdẽ.

⁴ M noanga tɩgs-m-la ne a nonglma rãam, a nonglma roogẽ.

⁵ Bao-y rɩɩb n kõ-m tɩ m dɩ, sõng-y-m ne bugsuntung biisi tɩ nonglem kom zabda.

⁶ M zug kʋgla m noanga goabga, t'a rɩtg mobg-ma.

*(Raoã)

⁷ M tar y sɛɛga, Zerizalɛɛm kom-pugli, zoe-y weooga walse, zoe-y weooga yĩsã, la y ra nek m zooda ye, la y ra nek m noangã lɛ-lɛ; bas-y m noanga t'a gũs a raab tɛka.

*(Pagã)

⁸ M wʋmda m noanga koɛɛga. Ad-a sẽn gãensd tãms la kunkuba.

⁹ M noanga yaa wa walga bɩ yĩsri biiga. Ad-a sẽn be m dooga poore ad-a sẽn lɩkd peemlɛɛgẽ, ad-a sẽn lɩgsd vẽya.

¹⁰ Ad-a sẽn yɩɩnde n yetẽ: «Wa wɛ, m zoodo, bi-neere, wa wɛ!

¹¹ Zĩig likame, saag yooga zãnga,

¹² Ypud weka zĩig zãnga, yɩɩn nood wakat taame; kelg watreguusgu, a zodgda a yɩɩla, a zodgd-b-la tõnd sɛɛgẽ.

¹³ Gese, kankang yoda a pipi kankama tɩ sãbsa yelgd b yũ-noodo. Wa wɛ, m zoodo, wa wɛ!

¹⁴ M walla solgda a meng pĩis bogdẽ, a solgda a meng pĩisa poore. Sõng tɩ m yãe f nenga tɩ m wʋmda f koɛɛga la a nooma m tʋba. Bãng tɩ f nenga me sakda gesgo.»

*(Biiga ma)

¹⁵ Sõng-y-do n yõg d kẽesã bãmb n na n sãam d tɩɩsa zãnga. La d tɩɩsa zoe n yoda b puudu.

*(Pagã)

¹⁶ M noanga ra kɩɩmda a rũms lɩɩns pʋ-weesẽ la m noang lebga m soolem tɩ mam me lebg a soolem.

¹⁷ Tũ zaabr pems maasgã, tɩɩsa sẽn wat n takd b sulunsugdã n lɛɛg n wa, m zoodo, n lɛɛg n wa wala yãka, wala yãg-bila sẽn lolemd kunkubã.