A Salmo yɩɩla 1 - SEBR SÕNGO

Nonglem sõasga

¹ Ad yɩɩll sẽn noom n yɩɩd a taab fãa. Yaa a Salomo yɩɩlle.

*(Paga sẽn yeele)

² Kolg n mok m wɛ, m noanga, kolg n mok-m tɩ f nonglem noom-m lame n yɩɩd rãam,

³ n yɩɩd yũ-noog kaama f sẽn dɩk n zɛ f yĩngã. Fo menga kõta sũ-noogo wa yũ-noog kaam sẽn maneg n sɩlge, yaa rẽ me la kom-pugli wã nong-fo n zoet n pʋgd f poore.

⁴ Yõk m nugu tɩ d wudgi, m dĩma, tɩ d wudg n kẽ f roogẽ, tɩ f nonglma noog sẽn yɩɩd sɩdã la d dat n naag taab n kilsi. Ad kom-pugli wã sẽn nong fooma tar bʋʋm!

⁵ M nenga sobr me, Zerizalɛɛm kom-pugli, m baas n tara neerem, wa Kedar dot sẽn pil ne bʋ-sabl gãndo wa roog sẽn tʋɩ ne nufa.

⁶ Da ges-y m yĩnga sẽn soba ye, tɩ rẽ yaa wĩndg tʋʋmde, yaa m ma-biis n yik zabr ne-ma n yet tɩ m pa wĩndgẽ n gũ b tɩɩse. M yaool n da ka mi m meng tɩɩs gũub ye.

⁷ Wilg m wẽ, m noanga, yaa yɛ la f na n kɩɩm f rũmsã, wĩnto-sʋka, yaa yɛ la f na n paam maasem n vʋʋse? Wilg-ma, tɩ m da wa saad n yegd f tũud-n-taasa rũms ye.

*(Rũn-kɩɩmba)

⁸ Pag sẽn ya neer n yɩɩd a taaba, f ka mi zĩig bɩ f pʋg piisã, tees f bulli wã rũm-kɩɩmba sikẽ.

*(Raoã)

⁹ Bãng yaa, m Zoodo, tɩ m yamẽ wã fo wẽnda weef sẽn maneg neere tɩ b zombg rĩm biiga.

¹⁰ F yɛga yaa neeba la f tʋb-londã n pʋgd n saasd-ba. F paasda f yubla neerem ne puud pãnenga. Wanzurf la sãnem la d na n mobg f kamsã.

*(Rʋn-kɩɩmba)

¹¹ D yam la d dõog sãnem tʋb-londo sẽn naag n wẽn ne wanzurf n sog f tʋbã.

*(Pagã)

¹² Bɩ m zĩnd n kokdẽ m ka-nooda yũugu, n gũudẽ tɩ m dĩma yi a rɩɩba roogẽ.

¹³ M noanga lebga wa wisao will sẽn wulum ne yũ-noogo, m sẽn dɩk n dogl m yãoogẽ;

¹⁴ A wẽnda bugsuntundẽ puugu, wala En-Gedi pɛlg pu-killi.

*(Raoã)

¹⁵ M zoodo, fo yaa neere, n-ye, fo yaa neere, kirʋ meng la f nina rõog yã!

*(Pagã)

¹⁶ Fo me yaa neere, m noanga, fo me yaa neer wʋsgo!

¹⁷ D gãaga tʋɩɩ ne vã-miinim, d dooga ra-paadse yaa kʋgsa wila, lalsa la kamsãooga vãado.