A Ruti 3 - SEBR SÕNGO

A Booz ka-kɛɛre

¹ A Nowemi wa n yeela a bi-pag, a Rut: «M biiga, ka segd tɩ m pids f sũ-noogo n bao zĩig n kõ-f bɩ?

² Mik a Booz ne tõnd yaa rogem la yẽ n bas foo tɩ f pʋg a rakõapa. Bãng tɩ rũnna zaabrã a na n tɩ yelga a ki zɛɛgẽ.

³ So koom, bao ka-noog n zɛ, bao fu sõma n yeelg, dɩk zɛɛga sore la ra sak t'a bãng tɩ yaa foo tɩ ka a rɩɩba poor ye.

⁴ A sã n wa na n gãande, f na bãng a gãaga zĩiga. Wa marsã, n pilg a naoẽ wã n gãande. Yẽ n na wilg foom marsã yɛla sẽn na n yɩ-la.»

⁵ A Rut leokame: «M na maan wala f sẽn togs-ma fãa.»

⁶ A Rut sẽn kẽng zɛɛgẽ wã a maana wala a ma sẽn togs-a.

⁷ A Booz dɩɩme la a yũ, n yik ne sũ-noogo n tɩ gãand n yegl a ka-rʋrã. A Rut kolgame n bao zĩig a naoẽ n gãande.

⁸ Zĩig wa n zʋʋgame t'a Booz rigemd n nek n ges n mik tɩ yaa pag n gãe a naoẽ,

⁹ t'a na n sok: «Foo la a bõe?» T'a yeele: «Maam la y yem-poak, a Rut. M kos tɩ y tẽeg y fuuga noor n pil-ma tɩ yãmb me tõe n dɩ-la a Elimelɛk yõodo.»

¹⁰ A Booz yeelame: «Wẽnd na ning f bark, m biiga, fo sẽn maand marsã wã yaa neer n yɩɩd waoogr ning f sẽn waoog buuda pĩnda tɩ f ra tõe n baoẽ la arzɛk rãmba bɩ naong rãmba sẽn ya kom-bɩɩba n yi kãadem ne bãmba.

¹¹ Da maan dabeem ye, m na maan f sẽn dat fãa. Ade Bɛtelyɛɛm tẽn-tõra miime tɩ f yaa pag sẽn be yõodo.

¹² La m sã n tõe n welg m roagda raboogo, bãng tɩ m ka m ye ye. Ned a to n le pẽ ne rogma n yɩɩd maam.

¹³ Dɩlla pa ka yʋngã la beoog yibeoogo m na wilg roagdã t'a sã n dat-fo, a na yao a sẽn tog n yao bũmb ningã tɩ f yaool n kul-a. A sã n yeel t'a yam ka foo, m wẽend ne Wẽnd tɩ m na reeg-fo, la pa ka n ta beoogo.»

¹⁴ A Rut paa a gãagẽ wã. A Booz yika zĩiga sẽn wa n ket n ya pʋlʋm-pʋlʋm tɩ ned ka tõe n bãng a to n bake. A ra yeta a meng tɩ ka tog tɩ b bãng tɩ pʋg kãnga n wa zɛɛgẽ wã ye.

¹⁵ A neka a Rut n yeel-a: «Tẽeg f fuugu.» T'a tẽege, t'a ning ka beel wam a yoobe t'a tʋk n lɛɛg n wa yiri.

¹⁶ A Rut sẽn poog la a Nowemi sẽn yeele: «Tɩ yɩɩ wãna, m biiga?» La a Rut togsa fãa.

¹⁷ A le paasame: «A Booz n kõ maam koodã n yet tɩ pa segd tɩ m lɛɛg n wa zaalem ye.»

¹⁸ A Nowemi yeelame: «M biiga, zĩnd ne laafi tɩ d wa bãng yɛla sẽn na n baas to-to. Nin-kãnga kõn bao vʋʋsem tɩ baas neera ka baas rũnda bal ye.»