A Ruti 1 - SEBR SÕNGO

A Nowemi ne a Rut

¹ Bʋ-kaoodba wakato la kom lʋɩ tẽngã, tɩ Zɩɩda Bɛtelyɛɛm ned a ye yi ne a paga la a kamb a yiibu n tees Moab dãmb wetẽ.

² Daoã da boondame t'a Elimelɛk, a paga, a Nowemi, a kamba: a Malõ la a Kilyõ. B ra yita Efrata sakẽ, Bɛtelyɛɛm tẽnga, Zɩɩda soolmẽ. B sẽn ta Moab rãmb wetẽ, b paama zĩig n kẽ.

³ A Elimelɛk, a Nowemi sɩda, kiime n bas-a ne a kamba a yiibu.

⁴ Kamba yii kãadem ne Moab kom-pugli: a Orpa la a Rut. Yaa yʋʋm piig la b pa be.

⁵ Kamb a yiibã, a Malõ la a Kilyõ waa n kiime t'a Nowemi lebg a ye, yẽ n ka sɩda, yẽ n ka biiga.

⁶ T'a na n kong n yi a Moab weoogẽ n leb a tẽngẽ tɩ Wẽnd nimbãan-zoeer da leb n waa ne tɩgr be, b neba yĩnga.

⁷ A Nowemi yi-la a sẽn da beẽ wã, yẽ ne a bi-pagb a yiibã. B rɩka sore n na n le wa Zɩɩda tẽn-peelmẽ.

⁸ A Nowemi tees n yeela a bi-pagbã: «Lebg-y, ned kam fãa leb a ma roogẽ la Wẽnd na zã-y b nugẽ, daar fãa, wala y sẽn zã y sɩdb rãmba sẽn ka wã la mam menga.

⁹ Wẽnd na zĩndg-y zĩ-sõngẽ, sɩd-sõng zakẽ.» A sẽn gom n sɛ, a mobg-b lame la bi-pagba sɩngame n zẽk b koɛɛg n tar wiisgu.

¹⁰ B naaga taab n yeel a Nowemi: «Tõnd ka na n leb d ma roogẽ ye. D na n tũu-foo n leb f buudẽ.»

¹¹ T'a Nowemi me na n yeele: «Bõe yĩng la y na n tũ-maam, m kamba, kul-y, m tõe n le roga sɩdb-rãmb n kõ-y bɩ?

¹² Kuli yã, m kamba, leb-y y tẽnsẽ tɩ m lebga pʋg-yãanga, m ka tõe n le yi kãadem ye. Ba m sã n yeel tɩ tẽeb ket n bee me, m sã n yeel tɩ yʋnga bala m na n paama sɩda n dog kamba,

¹³ y na yaas n gũ tɩ b lebg bɛda? Y na mong-y mens sɩda? Ayey! M kamba, m sũ-sãanga looga toogo, a zʋʋga yãmb rẽnna, yaa mam zug la Wẽnd zɩsg b nugã n yɩɩda.»

¹⁴ Kamba le maneg n ninga nintãm. A Orpa mobg-a lame la a leba a ma roogẽ. A Rut zãgs n paa ne-a.

¹⁵ Dẽ la a Nowemi yeel-a: «Ges f tũud-n-taagã, yẽ leba a ba-yiri, a lɛɛg n na n tɩ tũ a saam-dãmb wẽnde. Fo me maan wa yẽ, pʋg-a!»

¹⁶ T'a Rut na n yeele: «Da mak tɩ m na bas-foo, tɩ m na zãag ne foom ye. Fo sẽn dabdẽ, be la m na n kẽnge, fo buuda la m buudu, fo Wẽnd la mam Wẽndã.

¹⁷ Fo sẽn na n ki zĩig ningã be la m kiida tɩ b mum-ma. Sã n ka kũum n welg-d ne taaba, sã n ya m zʋgã n wa ne welgre, bɩ Soaala-Wẽnd sɩbg-m naoor a yi.»

¹⁸ A Nowemi mikame t'a Rut zãgsa loogre t'a sĩnd n bas-a.

¹⁹ B tũu taaba n dig Bɛtelyɛɛm. B taame, tɩ Bɛtelyɛɛm na n yɛɛse, tɩ pagb na n sogs taaba: «Yaa a Nowemi bɩ?»

²⁰ La a yeelame: «Da le bool-y-m t'a Nowemi ye, m lebga a Mara, tɩ Naab a Wẽnd pidsa m yama ne tɩɩsem.

²¹ M da tara fãa m sẽn waa n dabda la Wẽnd ka sak tɩ m lɛɛg n wa ne bũmb ye. Bõe yĩng la y na n kell n bool m t'a Nowemi? Ka Wẽnd nimbãan-zoeer kaset la m dɩ ye, yaa pɛt la m dɩ yã.»

²² Yaa woto la a Nowemi lɛɛg n wa ne a bi-pag, a Rut, Moab bi-pugla. Yaa alkam kɛgenga tigsg wakato la b ta Bɛtelyɛɛm.