A Ooze 7 - SEBR SÕNGO

¹ Soaala n gomd woto: «M da sɩng n na n yiis m buudã a nimbãaneg pʋgẽ, m sɩngame n na n sãooga a Israyɛl bãasã, la wakat kãng la m yãend a Efrayim yel-wẽna, n yãenda a Samari yel-yoodã. Ned kam fãa tudgda a sõsd-n-taaga, wagdb kẽeda roto, fãadb gɩta soya.

² La ned ba a ye yaool n ka tags ye tɩ mam, Naaba-Wẽnd, nee wẽngã b sẽn maanda ye. Ad b wẽnema sẽn na n lɛɛg n dɩ-ba. B sẽn maana fãa rɩga m taoore.

³ B solgda b wẽnema n maand laad tɩ dĩma la a kug-zĩidba kelgdẽ.

⁴ B fãa baooda b taab pagba. B wẽnda wʋng sẽn wɩnge tɩ looge, tɩ b pa le ningd daado, bura zom sẽn wẽ tɛka n gũud a wukri.

⁵ Dĩma kibs daare, yaa kug-zĩidba n sɩngd yũubu. Rãama tʋmda a tʋʋmde tɩ ned fãa gomd yaare.

⁶ Sẽn dat-b zɩɩma n daagã sũura kɛɛdame la a moogd wa sare. B gãnegda b sũura yʋng tõre la beoog sẽn wat n vẽegdẽ t'a widga wa bugum sẽn zom weoogo.

⁷ B fãa sũur sẽn moog wa sare, ya kombɛɛmba la b kʋʋda. B dĩm dãmba kʋʋr kelemdame n pʋgd taaba. La ned ba a ye ka tẽegd n yõk Naaba-Wẽnd sɛɛg ye.

Sõngra kosa zĩig a to

⁸ A Efrayim wẽnda bu-zẽmbã. A wẽnda miisgu sẽn pa lebge n bɩ bogre.

⁹ Sãambã n sɛt a pãnga t'a ka miẽ ye. A zoobda zoe n lobda peendo t a zɩ tiiri.

¹⁰ A Israyɛl zẽk-m-menga n sãamd-a, a ka lɛɛgd n wat maam a Wẽnda nengẽ ye. Yɛla lʋɩ-la a zug toor-toore, la b pa bao m zĩig ye.

¹¹ Efrayim yaa yirga, a kota Ezipt sõngre n bas n yik n tees Asiri.

¹² A sẽn waa n dabd be wã la a pusg m tãooga. La m tãooga yõk-a-la wa luiila n sɩbg-a wala yella sẽn dog a zugã sẽn tog ne.

A Israyɛl yaa sõm-zɩta

¹³ A Efrayim kamb zug yaa beedo. B zoet n zãagda ne maam. Bũmb ning sẽn wa ne b wãaba la woto. B zẽka b zug ne maam. M sẽn waa n baood n na n fãag-ba la b yik ne b zirẽ-beedo.

¹⁴ B sã n boond n kot sõngre, b ka boond ne pʋ-peelem ye. B basda b meng n lʋɩ n gãe n waasdẽ, b kɩɩsda b yĩnga ne barse n tẽed tɩ b pʋt na wom biisi, n yɩɩge, tɩ b bugsuntund na wom n yɩɩge. La woto wã yaa ne maam la b zabda.

¹⁵ Mam da kenga b kanga, n da kõ-b pãnga, la wẽng bal la b tagsd-m poorẽ.

¹⁶ B sẽn baood a soab zĩiga, ka maam ye. Ned ka tõe n teeg-b ye, b lebga tãp sẽn golme tɩ b ka le tõe n tão n yõk bũmb ye. B nanamsa na n paa tãpẽ tɩ b goama yaa tɩtaam goama, Ezipt rãmb sẽn na n wʋm n pusg laado.