A Ooze 6 - SEBR SÕNGO

¹ Y gomda woto: «Wa-y tɩ d leb Wẽnd nengẽ. Sãmpogra yaa bãmb sãmpogre, la b na le sãoog-d lame; b sɩbg-d lame la b na n loe-la d noadã.

² B na n vʋʋg-d-la dasem a yiibu, dasem a tãab poore; b na n le yik-d lame. D na n le vɩɩnda bãmb taoore.

³ D ning pãnga n bãng tɩ bãmb la Wẽnde. N-ye, d modg n bãng tɩ bãmb la Soaala! B waoonga pa tõe n vaal ye. Yaa wala sõore, a ka tõe n ka puk ye. B na n wa-la d nengẽ wala sẽoogo sẽn wat ne a saaga tɩ zĩ-lik paalele me wat ne a rẽnna n le bʋk tẽngã.»

⁴ La bãng-y tɩ Soaala na n leokame: «Yaa bõe la m na n maan f yĩnga, Efrayim, bõe la m na n maan f yĩnga, Zɩɩda? Y sẽn nong maam ne nonglem ninga wẽnda yibeoog sawadgo, n ka zɛɛd wɩlgr ye, n wẽnd meenem n ka zɛɛd mesgr ye.

⁵ Rẽ yĩnga la m zabd ne yã. M zabd-y-la ne bãngdba koeese, la m wilgd-y lame tɩ y babsda y kũum. M sẽn yals sɩbgr ninga na n puka vẽeneg wa sõore.

⁶ M sẽn data yaa nonglem lʋɩ taoore n yɩɩd maanda kʋʋbo; la b bãng tɩ maam la Naaba-Wẽnde, la rẽ n yɩɩd rũmsa nemd sẽn kãbd bugmẽ.

Israyɛl wɩɩbdo

⁷ Sã n ya yãmba, bãngdba, y maana wa neb a taaba n ka pids y sẽn kãab ye, y zãmba maam.

⁸ Galaad yaa bi-bees tẽnga, b kẽndame tɩ zɩɩm raagd n pʋgd b poore.

⁹ Sikɛm sor zugu, maan-kʋʋdba solgdame n tek n kʋʋd neba wa so-gɩtba, la rẽ yaa yel-beedo.

¹⁰ Israyɛl tẽn-peelmẽ, m yãenda yel-yoodo. A Efrayim yooba longa a Israyɛl tõre.

¹¹ La foom me, Zɩɩda, m na n kẽ-la m pʋʋgẽ n tigs m tigsga, tɩ m datame marsã n maneg m buuda yelle.»