A Ooze 4 - SEBR SÕNGO

Wẽnd bʋʋdo

¹ Naaba-Wẽnd na n yika bʋʋd ne tẽnga rãmba. Dɩlla Israyɛl kamba, kelg-y tɩ woto la b koɛɛga: «Sɩd pʋgb ka ye, nonglem ka ye, Wẽnd bãngr ka ye. B ka le get-m wa Wẽnd ye.

² Ned kãabda a to beedo, n zãmbd-a, n kʋd-a, n yood la a zuud. Nin-zẽmb waa n kẽe tẽngã n yãmbe. Kʋʋda taab rũnna n le kʋ beoogo.

³ Rẽ n so tɩ war na n lʋɩ tẽngã. Neba fãa na n komsame. Yir rũmsi, la yĩngri luiili, al ba mogra zĩma, fãa tara menengo.

Zabr ne maan-kʋʋdba

⁴ La baasg fãa ka neba fãa n na n dɩ rẽ taal ye. Ka neba fãa n tog ne sãbsg ye. Zabra bee ne foo, maan-kʋʋd kãsenga! Maam, Naaba-Wẽnd, n gomd boto.

⁵ Wĩntoogo, fo na n lʋɩɩme, la yʋngo yaa f sõsd-n-taaga, yaa bãngda n na n lake. F ma menga na n kiime.

⁶ Mam buuda neb sãamdame, bãngre kaalem yĩnga, tɩ b ka mi mam sẽn yaa a soab ye. Fo meng ka tʋlg n zãms mam sẽn yaa a soab ye. Yaa rẽ me yĩng la m me ka le rat-fo, f kõn le yɩ m maan-kʋʋd ye. Fo basa m noorã, ma me na bas f kamba.

⁷ Maan-kʋʋdba gill fãa zãaga ne sora sẽn da tuk n kõ-ba. B rɩka maam, ne m sẽn pid ne ziirã n tek ne wẽn-faoogo.

⁸ B rɩlgda b mens ne kũun niyns m buud tõtra sẽn wat ne, n na n kos a yel-wẽna sugri. Dɩlla b sẽn dat bala, yaa m buuda kell n yɩ beegda, tɩ rɩɩba watẽ tɩ b rɩtẽ.

⁹ La ka na n paoog ba a ye, buuda woo, maan-kʋʋdba woo, m na sɩbg b tʋʋm yoodã sẽn tog ne sɩbgr ninga.

¹⁰ B na rɩ la b kõn tɩge, b na yo la b kõn dog kamb ye, tɩ b raaga maam m base, maam b Wẽnde, n na yo b yoobo.

¹¹ M buuda sɩnga zʋbsgo, n dat t'a bugsuntunda kõ-a rãam wʋsgo,

¹² la yaa wẽn-naande, wẽnd sẽn pees ne raado la a tɩ soke. Ra-giig yɩta wãn n wilg sẽn wat beoogo? Ad-y yaa yoob raab n wa b yamẽ n kẽes-b moogo. Yooba la b sẽn bas Naaba-Wẽnd n pʋg wẽn-naandsã.

¹³ B rɩta maand dɩɩb tãms zutu. Kunkuba zut la maanda yũ-nooga rukda. B kẽeda tɩɩs maasmẽ, maasem sẽn noom-ba: wala kʋgse, kankalse, ãoose. Dẽ n wa ne b kom-pugli wã yoobo, n wa ne b bi-pagba wɩɩbgo.

¹⁴ La ka y kom-pugli wã la m na n zab ne ye. Ka y bi-pagba sẽn bas b sɩdb rãmba n yood rap a taaba la m na n zab ne ye. Yaa yãmb la m na n sɩbge, tɩ yãmb n tall-ba n yi kɛɛnga, tɩ b naag n dɩt maand dɩɩbo ne sẽn yood-b wẽnd dota pʋsẽ; tɩ wala yelbũnda sẽn yete: yam kaalg menesda buud tõre.

¹⁵ Woto wã, Israyɛl, fo saka yoobo. Bɩ a Zɩɩda vẽ ne rẽ. Da kẽng-y Gilgal b sẽn boond tɩ b tẽn-sõnga ye, da rʋ-y Betɛl sẽn ya bug-tẽnga ye. Da wẽen-y n yet tɩ ne Vɩɩm Naaba-Wẽnd ye!

¹⁶ Israyɛl tõdga wa nag-yãanga sẽn ka tʋlg t'a yubla reeg raoog ning b sẽn sogd nag koodsa ye. Bõe marsã la a rat tɩ Soaala ges-a wa pe-bi sẽn tar n na n tɩ wãben zĩ yalemsẽ?

¹⁷ Efrayim waoogda bõn-naandse, bas-y-ba,

¹⁸ tɩ b baas b rɩ bɛdã, n yo b yoobã la b sak yãnd ning ra-taasa sẽn tʋk b zug n kẽndã.

¹⁹ Sob-raoog na loog ne b fãa; b maamda yãnd n na n dɩ-ba.