A Ooze 13 - SEBR SÕNGO

Buuda sɩbgre

¹ A Efrayim sã n da gomda, ned fãa da rigda rabeem. A ra lʋɩ-la a Israyɛl buuda sagsa taoore. La yel-kãseng la a rogl a zugu, tɩ yẽ n yik n waoog a Baal. Rẽ me n wa ne a kũum.

² La marsã a yagensã ket n be-la a tudgra pʋgẽ. Efrayim neba rõogda wẽn-naandse. B wanzurf la b rɩkd n yẽnege n kõ-a b sẽn dat bũmb ning fãa wẽnego. Yaa tʋʋmd-mit bal tʋʋmde la ne rẽ fãa b yetame: ‹D na n kʋʋ maand n kõ-a.› Yãmb sẽn getã, ninsaal na waoog nag-bi? Dẽ ka yelle?

³ Yaa rẽ la b na n menem wa yibeoog sawadgo, wala meenem sẽ mesgd pĩnda, wala mo-paoko saag sobg sẽn zẽk n zãag ne zɛɛga, wala bug-zõos sẽn tũud peem-lɛɛg n yita.

⁴ Bãnge, Israyɛl tɩ Ezipt yiib tɛka, maam la f Soaala-Wẽnde. F ka mi Wẽnd a to wa maam ye la pʋs n ka be me ye. Fãagd a to ka ye, sã n ka maam.

⁵ Mam bãnga foo zĩ-pɛɛlẽ, ko-yũud tẽngẽ.

⁶ M yɩ-la f pe-kɩɩma, m kõ-f lame tɩ f rɩ la f yũ n tɩge la f zẽka f zug ne maam, f yĩma m yelle, ko-yũud tẽngẽ.

⁷ Dẽ me la m lebg wa bõnyẽega yãmb yĩnga, m lebga wa ãbga sẽn wũg sor noorẽ.

⁸ M na n yɩɩ toaag ne yãmba wa gɩgem-padre sẽn ne tɩ b yõkd a biiga la m na n basa m barsa tɩ b tʋm b tʋʋmde. Baas na wa n wãb yã, we-rũmsa na bees yã.

⁹ Israyɛl, m sãam-f-la zãnga; ãnda n na n le wa sõng-fo?

¹⁰ Fo rĩma bʋl n bee yɛ, ka yẽ n da tog n wa fãag-f laa? Fo kãsem-dãmb bɛɛ, n na n sõng fo? Ka bãmb n tog n ges f yell laa? Yaa foo n da kose, Israyɛl, tɩ m kõ-f dĩma, la kãsem-dãmba.

¹¹ M sũur puugame tɩ m kõ-f dĩm dãmba, m sũur puugame tɩ m le reegd-ba.

¹² A Efrayim beegra fãa sõd n dɩgame. M tara a beegra kaseto la kaseta ka tõe n menem ye.

¹³ A na n wʋma toogo wa pag sẽn kũmd dogem. A biiga na n yɩɩ bi-yalma. A rogma daar tatame t'a tõdg waoongo.

¹⁴ Tog n yɩɩ pakr ne maam tɩ m fãag-b kũum soolmẽ, Kũum, f basa f zab-teeda yɛɛlẽ? Nimbãan-zoeer kõn zĩnd ye.

¹⁵ A Efrayim be-la mo-pukẽ wã n paasd a paoongo. La sob-tʋʋlgo n yit zĩ-peen-daagẽ n watẽ. Yaa Soaala n tʋm-a. Koom kõn le bul ye. Arzɛk fãa, sẽn be yõod fãa na n loogame.