A Ooze 11 - SEBR SÕNGO

Wẽnd nonglma n na n yɩɩge

¹ Naaba-Wẽnd goma woto: «A Israyɛl sẽn wa n ya bi-bɩɩga, m sɩng n nong-a lame. Maam n yiis-a m toore, Ezipt tẽnga.

² Dẽ poore m mikame tɩ m sẽn tar-a boaala la a sẽn lakd ne maam n yɩɩd pĩnda. Mam buuda kʋʋda maand, a Baal ne a wẽn-taase yĩnga, la a yõogd tɩdare.

³ Yaool n da yaa maam n zãms a Efrayim kẽna, m da rɩkd-a m nusẽ la a pa tẽeg tɩ maam n da get a yell ye.

⁴ Mam da tat-a-la ne bʋgsem, ne nonglem. Wala ba sẽn maand ne a biiga, n zẽkd-a n na n mok a yɛgdga. M da sukda a rɩɩbã n kõt-a t'a rɩtẽ.

⁵ A Israyɛl kõn le tag Ezipt ye; yaa Asiri n na n yɩ a dĩma. La rẽ yaa a sẽn zãgs t'a kõn le sak maama.

⁶ Dẽ me yĩnga la zabr sʋʋg na n tʋm beedo a tẽnsa pʋgẽ. Lalsa na n lubame, fãa na n sarmame. A sẽn yõg zood yaarã n na n wa ne rẽnda.

⁷ M buuda pa rat n bas a zãmba ye. M bool-a lame n dat n le maneg a yelle la yaa zaalem.

⁸ M pa tẽed, Efrayim, tɩ f na saag n tags tɩ m tõe n bas-f lame ye. M pa tẽed tɩ m na sak n kisg foom ye, Israyɛl? M na n yɩɩ wãna n maan ne f tẽngã wala m sẽn maane ne Adma la Seboyim tẽnse? M maan boto gõeem kõn le sak-m ye, m sũur kõn le gãand ye.

⁹ M pa na n bas tɩ m sũ-puurã maan a sẽn dat ye, m pa na n sãam a Efrayim ye, tɩ maam la Wẽnde, la m pa ninsaal ye; m bee fo sʋka wa nin-sõngo m pa wat n na n wilg m sũ-puur ye.

¹⁰ Ges-y pa-weta sẽn tonge. B pʋgda b Soaala la Soaala boond-b-la ne koɛɛg sẽn vũud wa bõnyẽeg koɛɛg. Pa-weta tusda taab n watẽ, b rʋʋga mogrã n watẽ.

¹¹ Kẽer yita Ezipt wa yirs luin-sugri, tɩ kẽer yit Asiri wa wala. Yaa maam, Naaba-Wẽnd, n le tar-ba n wat b tẽngẽ.