A Ooze 1 - SEBR SÕNGO

Sebra tʋɩɩsgo

¹ Bũmb ninga sẽn be sebr kãnga pʋga: yaa koees niyns Soaala-Wẽnd sẽn taas a Oze, a Beeri biiga. Yɩ-la a Zowas biig a Zeroboam sẽn waa n ya Israyɛl dĩma. Sã n ya Zɩɩda dĩm dãmba, yɩ-la a Oziyas, a Zotam, a Aas la a Ezekiyas wakato.

A Oze yikãadem

² Ad Soaala-Wẽnd koeesa sɩngre, koees niyns a Oze sẽn deeg n taas-dã. Soaala-Wẽnd yeela a Oze: «Kẽng n bao pʋg-yoodr a ye, n maan f paga. A sẽn na n dog kamb niynsã kõn deeg f raboog pʋɩɩr ye. Tẽnga rãmb basa maam, b Soaala. B maana wa pʋg-yoaad sẽn bas a sɩda.»

³ A Oze sɩd kẽng n tɩ kẽe ne a Gomɛr, a Diblayim bi-pugla. A Gomɛr rɩka pʋga n dog bi-ribla.

⁴ Soaala-Wẽnd yeela a Oze: «Pʋd biiga tɩ Zizreyɛl, tɩ sã n yɩ bilfu m na rok m sũuri ne Zizreyɛl zɩɩma raagda. M na n kɩtame tɩ naam sɛ a Israyɛl roogẽ.

⁵ Daar a ye, Zizreyɛl tẽn-nabrẽ wã, a Israyɛl tãb-biisa na n konga pãnga.»

⁶ Paga le rɩka pʋga, n dog bi-pugla. Tɩ Naaba-Wẽnd yeele: «Pʋd-a t'a Lo-Ruama, a pʋg-beoogo, tɩ marsã tɛka mam yam laka ne Israyɛl buud neba fãa; m ka leb n nong-b ye.

⁷ Yaa ne a Zɩɩda buuda la m yama na n kell n pa. Yaa maam b Wẽndã n na n fãag-ba. La m fãagrã ka na n tũ ne loko, ne sʋʋga, ne zabre, ne weefo, bɩ ne wed-dʋʋd ye.»

⁸ Paga sika a Lo-Ruama, n leb n dɩk pʋga, n dog bi-ribla.

⁹ Tɩ wẽnd leb n yeele: «Pʋd biiga t'a Lo-Ami, a Sãana, tɩ yãmb a Israyɛl kamba lebga m sãamba. M ka le yaa a Be-n-beẽ, yãmb yĩng ye.»