A Neemi 13 - SEBR SÕNGO

A Neemi teema bũmb wʋsgo

¹ B waa n karma woto a Moyiiz sebra pʋgẽ tɩ b ra saag n deeg Amonitga la Moabitga neb niyns sẽn waoogd-b Israyɛl Wẽnnaama buudẽ ye.

² Bãng-y tɩ Amonitsa la Moabitsa pa seg Israyɛl kamba ne rɩɩb la koom, b sẽn waa n poog b tẽngẽ ye. Yɩɩd rẽ, a Moab yao a Balaam ligdi, t'a kãab-b kãab wẽnga. Yaa Soaala-Wẽnd n tedg kãab wẽngã t'a lebg kãab noogo.

³ B sẽn karem woto sebra pʋga, b yiisa bu-zẽmba gilli, b buudẽ.

A Neemi sẽn maan yɛsa

⁴ Maan-kʋʋd a Eliyasib la b waa n kõ wẽnd dooga teed gesg kãsengo. Yẽ ne a Tobiya ra yaa rogem la boto yĩnga

⁵ a baoo do-yalengo n kõ a Tobiya t'a bĩngd teedã. Yɩɩ roog ning b sẽn da bĩngd yamleoog kũuna, tɩdarã, lagdã, kooda lemse, rã-paalgã, kaama, b sẽn da reegd bũmb ning fãa Levitsa yĩnga, gũudba yĩnga la maan-kʋʋdba yĩnga.

⁶ Wakat kãng tɩ m da ka be Zerizalɛɛm ye. M da babsa Babilon dĩm a Artazerksɛs, a naam yʋʋmd pis-tã la a yiib soaba. M zĩnda be bilfu la m sẽn paam sore,

⁷ m lɛɛg n waa Zerizalɛɛm. M sẽn ta, m yãenda a Eliyasib sẽn maan ne a Tobiya, n kõ a zĩ-sõngo tɩ f sã n be zĩ-kãng bɩ f ne wẽnd dooga sɩmande.

⁸ M sũur puuga wʋsgo la m kɩtame tɩ b vaag a Tobiya teeda fãa n dɩgl yɩnga.

⁹ M kɩtame tɩ b yɩlg roogã neere, n lebs wẽnd dooga teed bala n bĩng be n paas kũuna la tɩdarã.

¹⁰ M wʋmame tɩ Levitsa da ka le paamd b pʋɩɩr ye, woto bãmb ne yɩɩn-yɩɩndba sẽn da tog n ges wẽnd waoogrã, zoe n diga b pʋ-weesẽ.

¹¹ Dẽ la m zab ne taoor dãmbã n yeel-ba: «Bõe tɩ y pa le get wẽnd dooga yelle?» M boola ned kam fãa t'a le wa rɩk a tʋʋmde.

¹² A Zɩɩda tõre le waa ne koodã, rãama la kaama lemse.

¹³ M dɩka teeda roto n gũnug a Selemiya ne seb gʋlsd a Sadok. M kɩtame tɩ Levitga a Pedaya n paas a Ana, a Zakur biiga, a Mataniya yagenga, wa sõng-ba. Bãmb n deeg pʋɩɩrã n pʋɩt b saam-biisã.

¹⁴ Soaala, yell kãens fãa m sẽn maan y roogã la y pẽgra yĩnga, tẽeg-y m yelle!

¹⁵ Vʋʋsga daare, m waa n yãee neb sẽn wẽkd b sibi n na n maam dãam. Kẽer me ra zɩlga bõeens alkam kalse, rãam, sibi, la zɩɩb buud toor toore, n kẽed Zerizalɛɛm. M yeel-b lame tɩ b ra saag n koos bũmb ye.

¹⁶ Vʋʋsg daar yɛsa, m yãee Tir dãmb tɩ b tond zĩma la teed a taaba n wat n na n koos ne Zɩɩda la Zerizalɛɛm rãmba.

¹⁷ M zaba ne taoor dãmbã n sok-b tɩ yaa bõe yĩnga tɩ b maand wɩɩbdo n pa tũud vʋʋsg daar noore.

¹⁸ Ka woto la y yaab rãmb maan pĩnda la ka rẽ yĩng la Soaala-Wẽnd kɩt tɩ tõnd ne d tẽnga yãend pɛt buud fãa? Bõe tɩ y tõdgd vʋʋsg noore n na n yãng Wẽnd sũ-puuri?

¹⁹ Dẽ n so tɩ m sã n mik tɩ zaabr maasem tat kʋɩlensã n wilgd tɩ vʋʋsg daar taame, m kɩtdame tɩ b pag kʋɩlensã la b ra ka le pakd-b tɩ vʋʋsga raar ka loog ye. M da baooda neb n zĩndg noyẽ wã tɩ zɩɩb ra tõog n kẽ vʋʋsg raar ye.

²⁰ Woto naoor a yi bɩ a tã lɛɛbd kẽer ka paam Zerizalɛɛm pʋg n gãand ye.

²¹ M yeel b la woto: «Bõe tɩ yãmb gãe lalg poore, y sã n le paase, m na kɩt tɩ b yõg yã.» Baraar tɛka b ka le saag n wa vʋʋsg daar ye.

²² M kosa Levitsa tɩ b yɩlg b mense la b gũ ragnoya tɩ b ra le tõdg vʋʋsg daar noor ye. Dẽ yĩng me, Soaala, y nimbãan-zoeer sẽn ka be tɛka, bɩ y tẽeg m yelle la y kũm-ma!

²³ M waa n mikame tɩ Zʋɩf rãmb kẽer pagb yita Asdod, Amon la Moab tẽnse.

²⁴ La b kamba pʋɩ-sʋk ra gomda Asdod dãmb bɩ bu-zẽmb a taab goama n yaool n ka le wʋmd Zʋɩf rãmb goam ye.

²⁵ M zaba ne-ba, n pãb kẽer la m võ b zut zoobdo, n kɩt tɩ b wẽen ne Wẽnd tɩ b kõn le rɩk b kom-pugli n kõ bu-zẽmba ye la bãmb me kõn deeg bu-zẽmba kom-pugli n maan b pagb ye.

²⁶ Ka yell a woto buud n wa ne Israyɛl dĩm a Salomo lʋɩɩs bɩ? Dĩm ba a ye pa wẽneg a Salomo. Soaala-Wẽnd da nong-a lame, Soaala-Wẽnd da kõ-a-la Israyɛl naam la bu-zẽmba pagb kɩtame t'a lak n lʋɩ.

²⁷ Ka segd tɩ b wʋm tɩ yãmb me maana yẽ wɩɩbda ye.

²⁸ Maan-kʋʋd kãseng a Eliyasib biig a ye, a Zoyada ra yaa Orõ dao a Sanebalat rɛɛmba. M dig a lame n zãage.

²⁹ Tẽeg-y nin-bãmba yelle, b sãama maan-kʋʋdb yʋʋre, b sãama zood ning sẽn da be maan-kʋʋdba la Levit dãmb sʋka.

³⁰ M yiisa bu-zẽmba Israyɛl sʋka la m wilga maan-kʋʋdba la Levitsa ned kam fãa tʋʋmd sẽn yaa a soaba.

³¹ M wilga wakat ning b sẽn na n wa ne raado la kood rẽemsa lemse. Tẽeg-y m yelle, Soaala!