A Neemi 12 - SEBR SÕNGO

Maan-kʋʋdba la Levitse

¹ Ad maan-kʋʋdb la Levits niyns sẽn tũ-b a Salatiyɛl biiga, a Zorobabɛl, ne a Zozuwe n wa: a Seraya, a Irmeya, a Ezra,

² a Amariya, a Maluk, a Atus,

³ a Sekaniya, a Rewum, a Meremot,

⁴ a Ido, a Ginetoyi, a Abiya,

⁵ a Miyamin, a Maadiya, a Bilga,

⁶ a Semaya; a Zoyarib, a Yedaya,

⁷ a Salu, a Amok, a Ilkiya, a Yedaya. A Yesuwa wakatẽ bãmb n da ya maan-kʋʋdba la Levitsa sags kãsem-dãmba.

⁸ Levitsa sʋka ad-a Yesuwa, a Binuwi, a Kadmiyɛl, a Serebiya, a Yewuda, a Mataniya. Yaa a Mataniya ne a yaopã n da so pẽgr yɩɩlã.

⁹ B saam-biis a Basbukiya ne a Uni n da zĩ n tot bãmba, n yɩɩnẽ n sokd bãmba.

¹⁰ A Yesuwa n dog a Zoakim, a Zoakim n dog a Eliyasib. A Eliyasib n dog a Zoyada,

¹¹ a Zoyada n dog a Zoana, t'a Zoana dog a Yaduwa.

¹² Ad neb niyns sẽn da ya-b maan-kʋʋdba sags kãsem-dãmba a Zoakim wakato, a Seraya roogẽ: a Meraya; a Irmeya roogẽ: a Ananiya,

¹³ a Ezra roogẽ: a Mesulam; a Amariya roogẽ: a Zoana;

¹⁴ a Meliku roogẽ: a Zonatã; a Sebaniya roogẽ: a Zozɛf.

¹⁵ A Arim roogẽ: a Adna; a Meremot roogẽ: a Elkayi,

¹⁶ a Ido roogẽ: a Zakari; a Ginetõ roogẽ: a Mesulam;

¹⁷ a Abiya roogẽ: a Zikri; a Z... roogẽ: a Miniyamin; a Moadiya roogẽ: a Piltayi.

¹⁸ A Bilga roogẽ: a Samuwa; a Semaya roogẽ: a Zonatã,

¹⁹ n paas a Zoyarib roogẽ: a Matenayi; a Yedaya roogẽ: a Uzi.

²⁰ A Salayi roogẽ: a Kalayi; a Amok roogẽ: a Ebɛr;

²¹ a Ilkiya roogẽ: a Asabiya; a Yedaya roogẽ: a Netaneyɛl.

²² A Eliyasib, a Zoyada, a Zoana la a Yaduwa sẽn waa n ya maan-kʋʋdba sags nanamse, gʋlsa sebr zugu Levitsa yʋya, Levits niyns sẽn da ya-b sags nanamse. Woto me b gʋlsa sebr zugu me maan-kʋʋdba la yɩɩ woto n tãag Pɛrs dĩma a Dariyus naam.

²³ Sã n yaa a Levi yagensã, buuda kãsem-dãmb gʋlsa na-rota sebrẽ la gʋlsga teka a Eliyasib yageng a Zoana naam.

²⁴ Levit dãmba kãsem-dãmba: a Asabiya, a Serebiya, a Zesuwa, a Kadmiyɛl biiga da zĩ n tota Levits a taaba n na n yɩɩl Soaala pẽgr la b kils bãmba, b wakata sã n gilg n sege tɩ b le rɩk tʋʋmd wẽnd doogẽ. B ra tũuda Wẽnd sõgen a Daviid sẽn da siglã.

²⁵ Dagno-gũudbã a Mataniya, a Basbukiya, a Obadiya, a Mesulam, a Talmo la a Akub n da gũud teda sẽn da bĩngd rot niyns sẽn me n pẽneg wẽnd dooga rignoya.

²⁶ Yɩɩ boto a Zoakim, a Yesuwa biiga la a Zosadak yagenga wakatẽ. Boto me komber a Neemi wakatẽ la a Esdras wakatẽ. A Esdras la maan-kʋʋd ning sẽn da vẽena ne Soaala noorã.

Lal-gũbra bark ningri

²⁷ Zerizalɛɛm lal-gũbra kibsa yĩnga, b tɩ yiisa Levitsa b sẽn da be zĩig ning fãa n wa ne-b na-tẽnga. Da togame tɩ sũ-nooga yɩ kãsenga, tɩ b yɩɩl bark pʋʋsg yɩɩla, tɩ kɛm wẽ, tɩ pends la ruuds wãage.

²⁸ A Levi kamb sẽn ya-b yɩɩn-yɩɩndba fãa waame. B yii tẽns niyns sẽn da pa zãr ne Zerizalɛɛm bɩ Netofa,

²⁹ b yii Bɛt-Gilgal sɛɛgẽ, Geba la Azmavɛt sɛɛgẽ, tɩ b ra pa zãag Zerizalɛɛm n me b tẽnsa ye.

³⁰ Maan-kʋʋdba la Levit rãmb deng n yɩlga b mense n yaool n yɩlg zãma wã, kʋɩlensã la lal-gũbrã.

³¹ M kɩtame tɩ Zɩɩda nanamsã dʋ lal-gũbrã. M welga yɩɩn-yɩɩndbã sags a yiibu. Pipi saka dʋʋ lal-gũbra zug tẽnsʋka, b teesa rɩtgo, la Tãmpʋʋra Noor la b tũyã.

³² A Osaya n pʋg-b ne a Zɩɩda nanamsa bogre,

³³ bãmb poore a Azariya, a Ezra, a Mesulam,

³⁴ a Yewuda, a Bẽnzame, a Semaya, a Irmeya.

³⁵ Bãmb poore da yaa maan-kʋʋdba la b ra zãada tõntõodo. Bãmb poore, a Zakari, a Zakur biiga, a Asaf yagenga. Yẽnda poore, a Mikaya, a Mataniya, a Semaya la a Zonatã,

³⁶ A Zonatã tũud-n-taase: a Semaya, a Azarɛl, a Milalayi, a Gilalayi, a Maayi, a Netaneyɛl, a Yewuda, a Anani. Bãmb da zãada yʋʋm teedo, Wẽnd sõgen a Daviid sẽn da kɩt tɩ b maane. A Esdras, noora mita, n da be nin-bãmb taoore.

³⁷ B sẽn ta ko-bundma noorã, b ta teedsã sẽn dʋʋd a Daviid na-yirã. B rʋʋ lalga zug n ne dĩma roog sẽn wẽneg n dɩg b taoore la b kell n kẽname n ta kooma noorã, n tees tẽnga yaanga.

³⁸ Yɩɩn-yɩɩndba bogr a yiib soaba teesa goabga, maam, a Neemi, pʋg-b-la lalga zugu, tɩ zãma wã bogra pʋgd m poorẽ. D taa bugtoaalsa ro-lug-lugã, n ta zĩig ning lal-gũbrã sẽn tɩ yɛdg zĩig ningã.

³⁹ D yii be n loog a Efrayim noore, a Yesana noore, kʋɩl-zẽeda noore. D sẽn loog a Ananeyɛl ro-lug-lugi la neb koab ro-lug-lugã, d waa n looga Piisa noore n ta gũudba noore.

⁴⁰ Yɩɩn yɩɩndba sags a yiibã taa wẽnd doogã. Mam me yalsame, maam ne taoor dãmba sẽn da yãagd-ma.

⁴¹ Maan-kʋʋdba a Elyakim, a Maaseya, a Miniyamin, a Mikaya, a Eliyoenayi, a Zakari la Ananiya da peebda tõntõodo.

⁴² N paas a Maaseya, a Semaya, a Elazar, a Uzi, a Zoana, a Malkiya, a Elam la a Ezɛr. A Izrayiya, yɩɩla naaba, kɩtame tɩ yɩɩn-yɩɩndba tãs tɩ sãde.

⁴³ Baraare b kʋʋ maamd ka tɛka la ra yaa kibs kãsenga. Soaala ra pidsa b buuda ne sũ-noog kãsenga. Zerizalɛɛm pabga la kamba me wilga b sũ-noogo la bʋʋra ra sãta al yɩɩga.

Maan-kʋʋdba la Levitsa pʋɩɩre

⁴⁴ Wẽnd kãnga b yãka neb sẽn na n ges kũuna neba sẽn tar n watẽ wã. Yaa Maan-kʋʋdba la Levit dãmba sẽn da tog n paam bũmb ninga b tẽnsẽ la b soolmẽ, wala kood rẽemsã lemsã la kũun a taabã. A Zɩɩda zãng da tara sũ-noogo tɩ maan-kʋʋdba la Levitsa tʋʋmd da yaa sõma.

⁴⁵ Wẽnd maag bãmba, Soaala-Wẽnd da paamda waoogre tɩ zãma wã paamd yɩlgre, bãmb ne yɩɩn-yɩɩndbã la ragno-gũudbã, wala a Daviid la a biig a Salomo sẽn da yals bũmb ningã.

⁴⁶ Pĩnd-pĩnda, a Daviid ne a Asaf wakatẽ, b yãka yɩɩn-yɩɩndb taoor dãmba la b ra yɩɩnda pẽgr la bark pʋʋsg yɩɩla.

⁴⁷ Yaa rẽ yĩnga la a Zorobabɛl la a Neemi wakatẽ, b ra dɩlgda yɩɩn-yɩɩndbã la ragno-gũudba, wala sẽn segde. Levitsa da reegda maanda kũun sõma wã la b ra taasda maan-kʋʋdbã, a Aarõ yagensã, b rẽnna.