A Neemi 1 - SEBR SÕNGO

A Neemi pʋʋsgo

¹ Ad-a Akaliya biig a Neemi sẽn togse. Kislewu kiuugu, a Artazerksɛs sẽn waa n dɩt a yʋʋm pisi naam, tɩ m da bee Suz pʋgẽ, tẽng sẽn tõe n zab n fãag a meng pugẽ.

² M yao a ye sẽn boond tɩ Anani waa ne neb sẽn yi Zɩɩda. M sẽn sok-b Zʋɩf rãmb yelle, yembda sẽn dɩ n keesa yelle, Zerizalɛɛm yelle,

³ b leok m lame: «Yembdã sẽn dɩ n kees tɩ b lɛɛg n wa b tẽngẽ wã tara pɛt la yãnde. Sã n ya Zerizalɛɛm lal-gũbrã, a yaa begse la kʋɩlensa dɩɩ bugum.»

⁴ M sẽn wʋm dẽ m lʋɩɩme n sĩng yãbre, m paa sũ-sãang pʋgẽ dasem a wãna, n loe m noore la m pʋʋsa Yĩngr-Soaala taoore.

⁵ M yeel-b lame: «Naaba-Wẽnde, Yĩngr-Soaala, Pãng sẽn kẽesd dabeem soab la yãmba. Wakat buud fãa y nonglma pʋgda sẽn nong-b yãmb la b reegd y noya.

⁶ Bɩ y yoog y tʋb la y puk y nini la y kelg y yamba pʋʋsgo. Yaa wĩndg la yʋng marsã la m tar pʋʋsgo, y kamba yĩnga la m wilgd beegr ning d sẽn beeg yãmbã. Maam ne m saam-biisa sɩd beegame.

⁷ Tõnd ka maan neer ye, d ka reg y noya, y saglse la dog-n-mik ning y sẽn kõ a Israyɛl ne a Moyiiz noora ye.

⁸ Tẽeg-y gomd ninga y sẽn ning y sõgen a Moyiiz noorẽ. Yaa woto la y ra yeel-a: ‹Y sã n yɩ tõatba, y na sẽeg buud a taab sʋka.

⁹ Y sã n le gãd maam, n deeg m noya, y sã n tũ-ba, ba ya mooga satmẽ la b loog ne y nebã, m na tɩ tall-ba n wa tẽng ning m yʋʋr sẽn na n paam pẽgrã, m sẽn yãk tɩ ya m waoogr zĩigã.›

¹⁰ Ade, yaa bãmb la y sẽn fãag ne pãnga la rugdu.

¹¹ Soaala, kelg-y y yamba pʋʋsg neere. Kelg-y y buuda pʋʋsgo tɩ b nonga yãmba n pẽgd y yʋʋra ne rabeem. M kot y lame tɩ m tʋʋmd zĩnd yõodo la y sak tɩ dĩma deeg-m neere.» Tʋʋmd ning m sẽn da paam dĩma nengẽ, yaa n pʋdgd dãam n kõt-a t'a yũuda.