A Nahum 1 - SEBR SÕNGO

Soaala pãnga

¹ Ad Wẽnd sẽn wilg bũmb ninga Elkos tẽng raoa, a Nawum, Niniv tẽng poorẽ.

² Soaala-Wẽnd pa gird n le gõms ye. B sɩbgda tõatba. B sũur sã n yiki, b yaa toaag tɩ looge. B rokda b sũur ne b bɛɛba tɩ sugr kaẽ ye.

³ Wẽnd sũur ka yikd tao-tao ye, b pãnga labsa. B pa tudgd n ges sẽn beega soaba wa nin-sõng ye. Soaala sã n lukd b naoore yaa sobd n fugdi. Sawata yaa wubsgu, b nao wã sẽn zẽkde.

⁴ B tãsda mogrã t'a kʋɩ, n tãs kʋɩlsã tɩ koom fẽbge. Bazã la Karmɛl yamda moogda wa sũtu, Libã puuda sʋʋgdame.

⁵ Soaala sã n sɩɩs tãmsã b vigsda b zĩigẽ. Tãn-bi wã sutame. Tẽnga sẽn tar miungu la a sẽn tare. Ninsaalba me sẽn tar digb la b sẽn tare.

⁶ Soaala-Wẽnd sũura sã n puugi, ãnda n le yɛs b taoore? B sũura puugr wẽnda weoogo, bugum sẽn zombe. Pĩisa meng na n pusame.

⁷ Soaala-Wẽnd yaool n yaa nin-noanga, bãmb maasmẽ la d tog n pa, yel-beeda raare. B geta sẽn be-b bãmb maasmẽ wã yell neere,

⁸ ba ko-wi-bɛda rãmbg raare. B saremda tẽnga lal-gũbra zãnga, la b tusda b bɛɛbã n kẽes likẽ.

Koɛɛg ne Zɩɩda nanamse

⁹ Zɩɩda rãmba, yaa bõe la y tagsd ne Soaala? Ka bãmb n menesd yãmb bɛɛba wa zaalem bɩ? Ad-y bɛɛba ka na n le tõog n maan yãmb bũmb ye.

¹⁰ Bɛɛba wẽnda gõos sẽn tãood b wila n kẽed taaba. Bɛɛba sẽn wat n tɩg rãama n ka le mi gũusgã la bugum na n dɩ-ba wa mo-puka.

¹¹ Ned n yi fo tẽn-peelmẽ, Niniv, ne raab sẽn ya wẽnga; yaa ned sẽn dɩt beem ne Soaalã.

¹² Yaa woto la Soaala leokd Zɩɩda rãmba: «Ba y bɛɛba sõor ya ka tɛka tɩ b wɩɩd ne pãnga, b fãa na n loogame, ba a ye kõn kees ye. M kɩtame tɩ m zɩɩb kao y po-raoogo la m kõn le paas beoog ye.

¹³ M na n sika y zɩɩbo, m na n kaoo y wiyã.»

¹⁴ Yaa woto me la b leokd Niniv rãmba: «Ned kõn le zĩnd moogo n ya yãmb buuda ned ye, n boond yãmb buuda yʋʋr ye. M na n kẽ-la y wẽn-naandsa roogẽ n yiis sẽn kudi ne kutu la sẽn pees ne raoogo. M segenda y yaoogo tɩ mam nifẽ, y ka le be yõod ye.»