A Miise 7 - SEBR SÕNGO

Bãngda sũ-sãanga

¹ Kato! Mam lebga wala ned sẽn wat tɩ-biis tõsbo b tõsba soansoaag poore; wala ned sẽn baood sib-gĩini sãbg sẽn kao poore. Bugsuntung biig la f da rata, kankamd la f da rata, fãa sɛɛme.

² Nin-sõma menema tẽngã. Nin-tɩrg ba a ye ka le be ye. B fãa baoodame n na n daag zɩɩm, beoog vẽegdame tɩ b gẽesd taaba.

³ Sã n ya wẽng maanego, b nusa tõee rẽ neere. Naab tõe n maan-f-la neere la rẽnd a reng n wilg a me sẽn date. Bʋ-kaooda rengd n deega kũuni. Taoor soaba rengd n wilga a raab waglse.

⁴ Sẽn são a taaba ket n wẽnda gõaaga. Sẽn pida ne zemsgo yaa gõ-tuugu. Bãngdba sẽn wilg raar ninga sẽn ta, y sɩbgra raara sẽn ta y yika ne ba. Dẽ me la b zĩ ne yãnd la pɛta.

⁵ Ra tẽe-y yak sẽn togs ye, Da reeg-y y zoa sẽn dõogd ye. Da yaag-y y noore ba y meng pag taoor ye.

⁶ Biig tʋʋsda a ba, bi-pugl tãoosda raoodo ne a ma, bi-paga sẽoosda a sɩd ma. Ned kam fãa bɛ yaa a zak rãmba.

⁷ La sã n ya ne maam, mam geta Soaala-Wẽnde, m fãagr bee m Wẽnnaama nugẽ la yaa bãmb la m saagda, la yaa bãmb n na n deeg m kosgo.

Buuda pʋʋsgo

⁸ La yãmba, m buuda bɛɛba, da laa-y tõnd yel-beeda ye! D sã n lʋɩ me, d na le yiki. D sã n be likẽ me Soaala-Wẽnd la d vẽenem.

⁹ M na sakame tɩ b puug b sũuri tɩ m beeg-b lame. M na sak n ta daar ning sẽn wate tɩ b na n yik n bʋ n sõng-ma. B na n le tall-ma n wa vẽenemẽ la m na pẽg b zemsga tʋʋma.

¹⁰ Dẽ na n yɩɩ d bɛɛba nifẽ la yãnd na n yõk-ba, bãmb sẽn da sokd tõndo: «Y Wẽnnaama pʋs n maanda bõe?» Ad-y d nao wã na n taba bãmba wala b sẽn tabd sor zug begdo, la tõnd n na ges rẽ ne sũ-noogo.

¹¹ Daar n wate tɩ b na n le yik na-tẽnga lalse. Y lalga sẽn gũbg tẽnga na n lʋɩɩme, y toaaga na n yalgame.

¹² Baraare, y saam-biisa na lɛɛg n wa, b na lɛɛg n wa b tẽngẽ. Sɩngda Asiri n wat Ezipt, n sɩngd Nil n wat Efrat, n sɩngd mogra noor n wat tãn-wogdã.

¹³ Dũni wã sẽn kellã na n tiig n lebga zĩ-peen-daaga tẽnga rãmb wẽnem yĩnga.

¹⁴ Dɩk-y y rũn-kɩɩm dasaare, n legl y buuda neba, Soaala. B bee kɛɛnga, tɩ tɩɩs gũbg b pʋ-weese. Tall-y-b wa pĩnda, n taas Bazã la Galaad.

¹⁵ Wala Ezipt tẽng yiib wakato, le maan-y tʋʋm bãna.

¹⁶ Bu-zẽmba na yãende la ne b pãnga sẽn yaa a soabã, b na rɩ yãnd sẽn ya yãnde. B fãa na yɛɛse n lebg mugs la wʋmse.

¹⁷ Wala wiisi la bõn-vuudri buud fãa b na n lelma tẽng tom; b na n yii b soondg zĩisẽ n wa yãmb taoore, pãng soaba Wẽnde, la yãmb taoore b na n saoo kalwaare.

¹⁸ Wẽnd bʋgo n le zem yãmba, Soaala? Yãmb sakame tɩ b beeg yã, yãmb kõta y bu-kella beegre sugri. Ka wakat fãa la y sũura puugd ne tõnd ye, tɩ sẽn noom yãmbã yaa y wilg y nonglma ne tõndo.

¹⁹ Zoe-y tõnd nimbãaneg yɛsa, da yaas-y n sõdg d yel-wẽna ye. Lob-y d yel-wẽna mogra pʋga.

²⁰ Wilg-y yã a Abraam la a Zakoob yagense, wilg-y tɩ y nonglma ka be sɛɛb ye; y sẽn kãab d yaab rãmb al pĩndã n ket n yɛse.