A Miise 5 - SEBR SÕNGO

Bɛtelyɛɛm

¹ La foom Bɛtelyɛɛm Efrata, yaa Soaala n gomde, fo yaa tẽn-bila a Zɩɩda soolma fãa pʋgẽ. Yaool n yaa fo pʋgẽ la sẽn na n dɩ-a a Israyɛl naama, mam zĩigẽ, na n doge. A ka zamaan-yaooga ned ye, ya kʋdem-wẽnnẽ neda.

² Rẽ n so tɩ Soaala-Wẽnd na n yĩm f yelle n tãag paga rogem wakato. Dẽ poore saam-biisa sẽn kell pa-weerã na n lɛɛg n wa Israyɛl kamb sʋka.

³ La ned ninga sẽn na n wa rɩ naama na n lʋɩ-la a buuda taoore tɩ b kẽnd ne yẽesem la b kilsd b Soaala-Wẽnnaama pãng la b ziir. Bãmb na n vɩɩnda laafi ne b buud a Israyɛl, la al dũni wã tɛka, neba fãa na n bãngame tɩ b yaa nin-kãsenga.

⁴ La Israyɛl pe-kɩɩma na n waa ne laafi a Israyɛl yĩnga. Asiri rãmba sã n wa rat n kẽ tõnd tẽngã, n kẽ d na-rota pʋsẽ, d na yiis nanams wʋsgo sẽn na n wa zab ne ba.

⁵ Bãmb zab-teeda yĩnga, b na n tõoga Asiri, la Nemrod tẽnga. B na fãag tõnd ne Asiri rãmba b sã n wa gãndg toaagã n na n kẽ n sãamd d tẽngã.

A Israyɛl bu-kelle

⁶ A Israyɛl bu-kellã na n zĩnda buud toɛ-toɛ sʋka wala meenem Soaala-Wẽnd sẽn tool n na n bʋk-ba, wala sa-ko-bɛɛla, sẽn madgd moogo la mooga ka teeg ninsaal pãnga, la a ka gũud ba fɩ ninsaal nengẽ.

⁷ A Israyɛl bu-kellã na n zĩnda buud toɛ-toɛ sʋka wala bõnyẽega we-rũms sʋka, wala gɩgemd-pol sẽn piʋʋgd piis sʋka n fãood n lubdẽ, la a tat n tõsda tɩ ned ka tõe n taa n deeg ye.

⁸ Israyɛl bu-kelle, wɩk f kanga, f bɛɛba zugu tɩ fãa meneme!

Teeg-yaalse

⁹ Naaba-Wẽnd n gomde: «Daar n wate, tɩ m na n menes y wiidã la y bilim-bilma.

¹⁰ M na n sarma f tẽn-bɛda fãa, f tãnsoben-dota fãa.

¹¹ M na n sãama f tɩtã, b kõn le yãend neb sẽn bʋgd ãds yãmb sʋk ye.

¹² M na n luba y wẽn-naandsa fãa, y kug-sendi wã fãa. Y kõn le waoog bũmb sẽn ya yãmb nug tʋʋmd ye.

¹³ M na n vigsa y ra-luga fãa sẽn paamd y waoogrã, m na n wã-la y tẽnsã.

¹⁴ M sũura na n puugame, m na n doka m sũur ne bu-zẽmba sẽn ka reeg m noore.»